Asino ti Mapan Idiay Impierno?
Sungbat ti Biblia
Ti impierno (“Sheol” ken “Hades” iti orihinal a lengguahe ti Biblia) ket tumukoy iti tanem, saan a lugar ti uma-apuy a pagtutuokan. Asino ti mapan idiay impierno? Dagiti naimbag ken dakes a tattao. (Job 14:13; Salmo 9:17) Kuna ti Biblia a daytoy tanem ti sangatauan ti “balay a natudingan [wenno papanan] ti amin a sibibiag.”—Job 30:23, Ti Biblia, PBS.
Uray ni Jesus ket napan iti impierno idi natay. Ngem “saan a nabaybay-an idiay impierno,” gapu ta pinagungar ti Dios.—Aramid 2:31, 32, The Bible in Basic English.
Agnanayon kadi ti impierno?
Amin a mapan idiay impierno agsublidanto, ta pagungarento ida ni Jesus babaen ti pannakabalin ti Dios. (Juan 5:28, 29; Aramid 24:15) Maipapan iti dayta a panagungar iti masanguanan, kuna ti padto iti Apocalipsis 20:13 nga “inted da patay ken Impierno dagiti natay nga adda kadakuada.” (The Bible in Basic English) Awanton ti impierno inton awanen ti linaonna; awanto metten ti mapan manen sadiay gapu ta “awanton ni patay.”—Apocalipsis 21:3, 4; 20:14.
Ngem saan nga amin a natay ket mapan iti impierno. Ipakita ti Biblia a nakaro ti kinadakes ti dadduma a tao ta saanda a pulos agbabawi. (Hebreo 10:26, 27) No matay dagita a tattao, saanda a mapan idiay impierno, no di ket idiay Gehenna, maysa a simbolo ti agnanayon a pannakadadael. (Mateo 5:29, 30) Kas pagarigan, impasimudaag ni Jesus a mapan idiay Gehenna ti dadduma kadagiti managinsisingpet a panguluen ti relihion idi kaaldawanna.—Mateo 23:27-33.