Ania ti Kuna ti Biblia Maipapan iti Pornograpia? Dakes Kadi ti Cybersex?
Sungbat ti Biblia
Saan a direkta a dakamaten ti Biblia ti pornograpia, cybersex, wenno umasping nga ar-aramid. Ngem nalawag a dakamaten ti Biblia no ania ti marikna ti Dios iti panagdenna dagiti saan nga agassawa wenno ti di umiso a panangmatmat iti seks. Usigem dagitoy a teksto ti Biblia:
“Papatayenyo, ngarud, dagiti kameng ti bagiyo nga adda iti rabaw ti daga no maipapan iti pannakiabig, kinarugit, panaggartem iti sekso.” (Colosas 3:5) Ti panagbuya iti pornograpia rubrobanna dagiti di umiso a tarigagay, ken pagbalinenna ti maysa a narugit iti imatang ti Dios.
“Tunggal maysa nga agtultuloy a mangmatmat iti maysa a babai tapno gartemanna nakikamalalan kenkuana iti pusona.” (Mateo 5:28) Ti ladawan dagiti immoral nga ar-aramid pakaruenna ti di umiso a pampanunot a mangituggod iti dakes nga ar-aramid.
“Ti pannakiabig ken tunggal kita ti kinarugit wenno kinaagum saan koma nga uray madakamat iti nagtetengngaanyo.” (Efeso 5:3) Saan a rumbeng a dakamaten, buyaen, ken basaen dagiti immoral nga ar-aramid.
“Maiparangarang dagiti aramid ti lasag, ket dagita ti pannakiabig, kinarugit, . . . ken bambanag nga umasping kadagitoy. No maipapan kadagitoy a banag pakpakdaarankayo a nasaksakbay, kas met laeng iti daydi nasaksakbay a panangpakdaarko kadakayo, a dagidiay mangannurot iti kakasta a banag saandanto a tawiden ti pagarian ti Dios.” (Galacia 5:19-21) Ibilang ti Dios a narugit iti moral dagidiay makiramraman iti pornograpia wenno cybersex, phone sex, wenno sexting. No ar-aramidentayo dagita, mapukawtayo ti anamong ti Dios.