Agpapada Kadi Amin a Relihion? Agturongda Kadi Amin iti Dios?
Sungbat ti Biblia
Saan nga agpapada ti amin a relihion. Adu a relihion ti nadakamat iti Biblia a saan a makaay-ayo iti Dios. Adda dua a kategoria.
Kategoria 1: Panagdaydayaw kadagiti palso a didiosen
Nagusar ti Biblia kadagiti sasao a mangdeskribir iti panagdaydayaw kadagiti palso a didiosen, kas iti “sang-aw,” “kinaubbaw,” ken ‘awan ti magunggona.’ (Jeremias 10:3-5; 16:19, 20) Imbilin ni Jehova a a Dios iti nagkauna a nasion ti Israel: “Dika maaddaan kadagiti aniaman a sabali a didios maibusor iti rupak [wenno, “malaksid kaniak”].” (Exodo 20:3, 23; 23:24) Idi nagdaydayaw dagiti Israelita kadagiti didiosen, “gimmil-ayab ti unget ni Jehova.”—Numeros 25:3; Levitico 20:2; Uk-ukom 2:13, 14.
Saan a nagbaliw ti panangmatmat ti Dios iti panagdaydayaw kadagidiay maaw-awagan iti “didios.” (1 Corinto 8:5, 6; Galacia 4:8) Ibilbilinna kadagidiay mayat nga agdayaw kenkuana nga isardengda ti makikadua kadagiti mangan-annurot iti palso a relihion. Kunana: “Rummuarkayo manipud iti tengngada, ket isinayo ti bagbagiyo.” (2 Corinto 6:14-17) No agpapada ti amin a relihion ken iturongda dagiti tattao iti Dios, apay ngarud nga imbilin dayta ti Dios?
Kategoria 2: Panagdaydayaw iti pudno a Dios iti pamay-an a dina anamongan
Adda tiempo a nagdaydayaw dagiti Israelita iti Dios babaen ti panangtuladda kadagiti patpatien ken kaugalian dagiti agdaydayaw kadagiti palso a didiosen, ngem saan nga inawat ni Jehova daytoy a panangpadasda a paglaoken ti pudno ken palso a relihion. (Exodo 32:8; Deuteronomio 12:2-4) Kinondenar ni Jesus dagiti papanguluen ti relihion idi kaaldawanna gapu iti wagas ti panagdayawda iti Dios. Agpampammarangda a relihioso, ngem aginsisingpetda ta ‘saanda nga inkankano ti nadagdagsen a bambanag iti Linteg, nga awan sabali, ti kinahustisia ken asi ken kinamatalek.’—Mateo 23:23.
Kasta met ita, ti laeng relihion a naibatay iti kinapudno ti mangiturong kadagiti tattao iti Dios. Masarakan dayta a kinapudno iti Biblia. (Juan 4:24; 17:17; 2 Timoteo 3:16, 17) Dagiti relihion a dagiti pannursuroda ket maikontra iti Biblia iyad-adayoda dagiti tattao iti Dios. Adu a pannursuro nga ipagarup dagiti tattao a nagtaud iti Biblia ket naggapu kadagidiay agdaydayaw kadagiti palso a didiosen. Karaman kadagita ti Trinidad, di matay a kararua, ken agnanayon a pannakatutuok. Ti panagdaydayaw a mangiparparegta kadagita a pannursuro ket “kinaubbaw,” wenno awan serserbina, ta suksukatanda dagiti pagalagadan ti Dios kadagiti tradision ti relihion.—Marcos 7:7, 8.
Kagura ti Dios ti panaginsisingpet dagiti relihion. (Tito 1:16) Tapno matulongan dagiti tattao a makaasideg iti Dios, masapul nga apektaran ti relihion ti inaldaw a panagbiagda, saan laeng a basta panangsurot kadagiti ritual ken seremonia. Kas pagarigan, kuna ti Biblia: “No ti asinoman a tao pagarupenna iti bagina nga isu [relihioso] ket kaskasdi a saanna a ngedngedan ti dilana, no di ket itultuloyna nga allilawen ti bukodna a puso, ti porma ti panagdaydayaw daytoy a tao ket barengbareng. Ti [relihion] a nadalus ken di natulawan iti panangmatmat ti Dios ken Amatayo isu daytoy: panangtaripato kadagiti ulila ken iti balo a babbai kadagiti rigatda, ken panamagtalinaed ti maysa iti bagina nga awanan mulit manipud iti lubong.” (Santiago 1:26, 27) Inusar Ti Baro a Naimbag a Damag Biblia ti sasao a “pudno a relihion” para iti daytoy nadalus ken awanan panaginsisingpet a panagdaydayaw.
a Jehova ti nagan ti pudno a Dios a naipakaammo iti Biblia.