Bayat ti panaglabas ti tawen, adda dagiti agassawa a saan unayen a mangipakpakita iti dungngo iti maysa ken maysa. Madanaganka kadi no kasta ti mapaspasamak iti panagasawam?

•  Ti masapul a maammuam

•  Ti mabalinmo nga aramiden

 Napateg ti kinadungngo tapno tumibker ti panagasawa. No kasano a napateg ti regular a suplay ti makan ken danum tapno agtalinaed a natibker ken nasalun-at ti pisikal a bagi, ti agtultuloy a panangipakita iti kinadungngo pasalun-aten ken patibkerenna ti panagasawa. Kasapulan dagiti assawa ti regular a pammatalged iti ayat ken pannakaseknan ti asawada uray no dinekdekadan nga agassawada.

 Saan a managimbubukodan ti pudno nga ayat. Iyun-unana ti pagragsakan ti sabali. Gapuna, makita ti nakonsiderar nga asawa a kasapulan ti asawana ti dungngona ket ikagumaanna nga ipaay dayta imbes nga ipakitana laeng no kaano a kayatna nga ipakita.

 Gagangay a mas kasapulan dagiti asawa a babbai ti maipakitaan iti kinadungngo. Mabalin nga ay-ayaten unay ti asawa a lalaki ni baketna. Ngem no ipakitana laeng dayta nga ayat iti rugi ken ngudo ti aldaw wenno sakbay ti seksual a relasionda, mabalin a pagduaduaan ni baketna no pudno met laeng a maseknan kenkuana ni lakayna. Adayo a nasaysayaat nga ipakita ti kinadungngo iti intero nga aldaw.

 Ipakitam ti kinadungngo babaen ti sasao. Marikna ti asawam nga ipatpategmo babaen ti panangibagam kadagiti simple a sasao a kas iti “Ay-ayatenka” wenno “Ipatpategka unay.”

 Prinsipio ti Biblia: “Ti naruay iti puso sawen ti ngiwat.”​—Mateo 12:34.

 Tip: Saanmo laeng koma nga ipakita ti kinadungngom iti berbal a sasao. Isuratmo dagita—iti bassit a papel, e-mail, wenno teks.

 Ipakitam ti kinadungngo babaen ti aramid. Ipakpakitam nga agpayso ti imbagam nga “Ay-ayatenka” babaen ti arakup, bisong, wenno panangiggem iti imana. Mabalin met nga ipakitam ti pudpudno a pannakaseknam babaen ti panangapros, nadungngo a panangmingming, wenno sagpaminsan a panagregalo. Ken mabalin met a tulongam ni baketmo kas iti panangbagkatmo kadagiti awitna, panangilukat iti ruangan, panaginnaw, panaglaba, wenno panagluto. Para iti adu, saan laeng a basta panangtulong dagita, panangipakita pay dayta iti kinadungngo!

 Prinsipio ti Biblia: “Agayattayo koma, saan nga iti sao wenno babaen iti dila, no di ket iti aramid.”​—1 Juan 3:18.

 Tip: Tratuem a siaayat ni baketmo a kas idi agnobiokayo.

 Adda koma tiempoyo iti maysa ken maysa. Ti panagkaduayo patibkerenna ti panagasawayo ken ipatalgedna iti asawam a maragragsakanka a makikadua kenkuana. Siempre, mabalin a narigat ti mangiplano iti panagkaduayo a dakdakayo laeng no adda annakyon wenno no adu ti masapul nga aramiden iti tunggal aldaw. Mabalin nga iplanoyo ti agaramid iti simple a banag kas iti panagpagnapagna a dakdakayo laeng.

 Prinsipio ti Biblia: ‘Siguraduenyo ti napatpateg a bambanag.’​—Filipos 1:10.

 Tip: Adda dagiti okupado nga agassawa a nangilatang iti tiempo para iti regular a panagdeytda a dua iti rabii wenno iti ngudo ti lawas.

 Am-ammuem ti asawam. Agduduma ti kasapulan ti tunggal maysa a kinadungngo. Pagsaritaanyo no ania ti kayat ti tunggal maysa kadakayo a pamay-an a maipakitaan iti kinadungngo ken no ad-adu pay ti kasapulan. Kalpasanna, ikagumaam nga ipaay dayta iti asawam. Laglagipem, napateg ti kinadungngo tapno tumibker ti panagasawa.

 Prinsipio ti Biblia: “Ti ayat . . . saanna a sapulen dagiti bukodna a pagimbagan.”​—1 Corinto 13:4, 5.

 Tip: Imbes a pilitem ti asawam nga ipakitaannaka iti dungngo, isaludsodmo iti bagim, ‘Ania ti mabalinko nga aramiden tapno agbalin a nadungdungngo kaniak ti asawak?’