Ipakita dagiti panagadal a dagiti managyaman a tattao ket naragragsak ken nasalsalun-at, nalaklakada a sanguen dagiti problema, ken ad-adu ti gagayyemda. Imbaga ti researcher a ni Robert A. Emmons a ti managyaman a tao ket “maprotektaran kadagiti dakes nga epekto ti gura, apal, kinaagum, ken sakit ti nakem.” a

 Kasano a pagsayaatan dagiti ubbing no managyamanda? Sigun iti uppat a tawen a panagadal kadagiti 700 nga agtutubo, dagidiay managyaman ket basbassit ti posibilidadna nga agkusit iti eksam, agdroga, agbartek, wenno maaddaan iti dadduma pay a dakes a kababalin.

•   Ti pannakarikna a maikarika iti amin a banag pakapuyenna ti panagyaman. Marikna ti adu nga ubbing a maikarida iti naimbag a bambanag nga adda kadakuada. Mabalin a saan a managyaman ti maysa no ti panagriknana ket maikari iti naimbag a bambanag a maaw-awatna imbes a regalo dagita kenkuana.

   Kasta ti ugali ti adu a tattao ita. “Isursuro ti lubong kadagiti tattao a masapul nga alaenda ti aniaman a kayatda,” kuna ti ina nga agnagan Katherine. “Gabgabsuonannatayo ti media kadagiti piktiur ti amin a banag a ‘pakaikariantayo’ kano ken ibagana a masapul a datayo ti umuna a maaddaan kadagita.”

•   Isuroyo ti kinamanagyaman bayat nga ubbingda pay. Imbaga ti ina nga agnagan Kaye: “Nalaka a sursuruan dagiti ubbing. Ti panangisuro kadakuada kadagiti nasayaat nga ugali bayat nga ubbingda ket kas iti panangitugkel iti pasok a tumulong iti diretso a panagdakkel ti maysa a mula.”

•   Isuroyo ti ibagada. Masursuro uray dagiti babassit nga ubbing ti ag-thank you wenno agyaman no adda maited kadakuada a regalo wenno no maipakitaanda iti naimbag. Bayat a dumakdakkel ken agmatmataenganda, in-inutto a mas maapresiarda ti kinaparabur kadakuada ti dadduma.

   Prinsipio ti Biblia: “Ipakitayo a managyamankayo.”—Colosas 3:15.

   “Kanayon nga ag-thank you ti tallo ti tawenna nga apokomi, ken kanayon nga ibagana ti please no adda dawatenna. Nasursurona dayta kadagiti nagannakna. Ti ugalida a kanayon nga agyaman ti nakasursuruanna no kasano nga ipakita ti panagyaman.”—Jeffrey.

•   Isuroyo ti aramidenda. Isuroyo kadagiti annakyo a mangaramidda iti thank-you note no makaawatda iti regalo. Kasta met, no ikkanyo dagiti ubbing iti trabahoda iti balay, tultulonganyo ida a mangtarus nga adu a trabaho ti kasapulan tapno agbalin a komportable ti balay.

   Prinsipio ti Biblia: “Naragragsak ti mangted ngem ti umawat.”—Aramid 20:35.

   “Tumultulong iti pamiliami ti dua a tin-edyermi. Agsaganada iti makan, agluto, ken aramidenda ti dadduma a trabaho iti balay. Makatulong dayta tapno maapresiarda ti adu a sakripisiomi kas nagannak, isu a mas managyamanda.”—Beverly.

•   Isuroyo ti ugali a masapul nga ipakitada. Ti kinapakumbaba pagbalinenna ti maysa a mas managyaman. Bigbigen dagiti napakumbaba a kasapulanda ti tulong ti dadduma tapno agballigida iti aniaman nga aramidenda, ket dayta ti rason a pagyamananda ti suporta ti sabsabali.

   Prinsipio ti Biblia: “Agpakumbabakayo, nga ibilangyo a nangatngato ti sabsabali ngem dakayo, a sapulenyo dagiti pagimbagan ti dadduma, saan la a dagiti bukodyo a pagimbagan.”—Filipos 2:3, 4.

   “No dadduma, bayat ti pannangan, agay-ayamkami maipapan iti panangapresiar. Agsisinnublatkami a mangibaga iti banag a pagyamyamananmi. Isu a dagiti positibo ken dagiti banag a pagyamyamananmi ti mapanunotmi, imbes a dagiti negatibo wenno bambanag a para laeng iti pagimbaganmi.”—Tamara.

 Tip: Ipakitayo ti nasayaat nga ulidan. Nalaklaka a masursuro dagiti ubbing ti agyaman no kanayon a mangngegdakayo a mangibaga iti panagyamanyo iti sabsabali—ken kadakuada.