Ibagbaga ti dadduma nga agassawa a saan nga agkatunosan a nasaysayaat para kadagiti annakda no agdiborsioda imbes a makitkita dagiti annakda nga agkaraapada. Ngem ania ti agpayso?

•  Ania dagiti epekto ti panagdiborsio kadagiti annak?

•  Naragragsak kadi ti anakko no makidiborsioak?

•  Ti masapul a maammuak no duakami a mangpadakkel kadagiti annakmi kalpasan ti diborsio

•  Adda kadi nasaysayaat a solusion?

 Ipakita ti research a saan a nasayaat dagiti epekto ti panagdiborsio kadagiti annak. Dagiti annak dagiti nagdiborsio ket dakdakkel ti posibilidadna a:

•   makarikna iti pungtot, danag, ken depresion

•   maaddaan kadagiti problema iti ugali

•   saan a pumasa wenno agsardeng nga ageskuela

•   makaptan iti sakit

 Kasta met, adu nga ubbing ti mangpabasol iti bagida nga isuda kano ti rason a nagdiborsio dagiti nagannakda wenno mabalin a nalapdanda koma dayta.

 Mabalin nga agtultuloy iti kinaadulto dagiti problema dagiti annak a nagdiborsio dagiti nagannakda. Dakkel ti posibilidadna a nababa ti panagkitada iti bagida ken narigatda nga agtalek iti sabsabali. Dakkel met ti posibilidadna a makidiborsiodanto no agproblema ti panagasawada.

 Laglagipem: Uray no ibagbaga ti dadduma a mayat a makidiborsio a pagsayaatan dayta dagiti annakda, ipakita ti research a saan nga agpayso dayta. “Kakaasi dagiti annak dagiti nagdiborsio,” insurat ti eksperto iti panangaywan kadagiti ubbing a ni Penelope Leach. a

 Prinsipio ti Biblia: “Sapulenyo dagiti pagimbagan ti dadduma, saan la a dagiti bukodyo a pagimbagan.”—Filipos 2:4.

 Adda dagiti mangibaga a wen. Ngem laglagipem a kaaduanna a saan nga agpada ti kasapulan ti nagannak ken ti anak. Kayat ti maysa a tao a mayat a makidiborsio nga agbaliw ti biagna. Ngem kaaduanna a kayat ti anak a saan nga agbaliw ti biagna ken saan nga agsina dagiti nagannakna.

 Kalpasan nga inadal dagiti autor ti libro a The Unexpected Legacy of Divorce ti rinibu a panagdiborsio, insuratda: “Maysa a banag ti nalawag: imbaga dagiti annak a saanda a nagbalin a naragragsak. Imbes ketdi, prangka nga imbagada, ‘Idi nagdiborsio dagiti nagannakko, saanakon a naragsak.’” Innayon ti libro a para kadagiti annak, ti lubong ket “saanen a natalged ken nakabutbuteng ta dagiti tao a kadekketan kadakuada ket saandan a mapangnamnamaan.”

 Laglagipem: Posible a saanen a naragsak dagiti annak no nagdiborsio dagiti nagannakda.

 Prinsipio ti Biblia: “Ti naladingit nga espiritu ibusenna ti pigsa.”—Proverbio 17:22.

 Ikagumaan ti dadduma a nakidiborsio a pagtinnulongan a padakkelen dagiti annakda a kasla agassawada pay laeng. Ngem saan a nalaka dayta. Ipakita ti research a dagiti nagdiborsio ket masansan a:

•   basbassit ti orasda kadagiti annakda

•   agduma ti isuroda a prinsipio

•   pagustuanda lattan ti kayat dagiti annakda ta makonsiensiada wenno nabannogdan

 Nalaklaka met kadagiti annak dagiti nagdiborsio ti saan nga agtulnog kadagiti nagannakda. Ngamin, uray dagiti nagannakda, saanda met nga inaramid ti umiso kas iti panangtungpalda iti karida a saanda nga agsina. Mabalin nga irason dagiti annak, ‘Apay koma nga agtulnogak kadakuada?’

 Laglagipem: Kaaduanna a saan a nalaka para kadagiti nagdiborsio ti agtinnulong a mangpadakkel kadagiti annakda. Ngem narigrigat dayta para kadagiti annak.

 Prinsipio ti Biblia: “Diyo rurruroden dagiti annakyo, tapno saanda a maupay.”—Colosas 3:21, footnote.

 Kalpasan ti diborsio, adu a panangikagumaan ti kasapulan tapno mangabaruanan. Masansan a nasaysayaat koma nga usaren ti agassawa ti pigsa ken tiempoda a mangpreserba iti panagassawada. “Saan a permanente ti saan a nasayaat a panagassawa a kas iti panagkunatayo,” kuna ti libro a The Case for Marriage. “Kaaduan a saan a naragsak nga agassawa a saan a nagdiborsio ti rumagragsak a rumagragsak ti panagassawada bayat a bumaybayag.” Kaaduanna a mas pagsayaatan dagiti annak no saan nga agdiborsio dagiti nagannakda.

 Saanna a kayat a sawen a saan a pulos a mabalin ti panagdiborsio. Kinapudnona, ipalubos ti Biblia ti panagdiborsio no maibatay dayta iti seksual nga immoralidad. (Mateo 19:9) Ngem ibaga met ti Biblia a “panunoten ti masirib ti tunggal addangna.” (Proverbio 14:15) Masapul a panunoten a naimbag dagiti problemado nga agassawa nga agplamplano nga agdiborsio ti amin nga epekto ti aramidenda a desision, a pakairamanan ti epekto dayta kadagiti annakda.

 Siempre, adu ti masapul a maaramid imbes nga agin-innanus lattan. Mangted ti Biblia iti kasayaatan a balakad a tumulong kadagiti agassawa tapno maaddaanda kadagiti kualidad a kasapulan tapno agpaut ken agbalin a naragsak ti panagasawada. Saan a nakaskasdaaw dayta ta ni Jehova, nga Autor ti Biblia, ti nangyurnos iti panagasawa.—Mateo 19:4-6.

 Prinsipio ti Biblia: “Siak, ni Jehova a Diosyo, Daydiay mangisursuro kadakayo tapno magunggonaankayo.”—Isaias 48:17.