“Kaykayatko ti mapan idiay Kingdom Hall-mi ta makaduak sadiay dagiti kapammatiak,” kuna ni Nicole a tin-edyer a sister idiay Colombia. Kasta met kadi ti marikriknam?

 Iti intero a lubong, aggigimong dagiti Saksi ni Jehova iti agarup 63,000 a Kingdom Hall. Komportable dagitoy a patakder a pangidaydayawanmi iti Dios. Ngem saan la a paggigimongan dagita. Kuna ni David a maysa a regular pioneer idiay Colombia: “Ti Kingdom Hall-mi papintasenna dagiti isursuromi. Ap-apresiaren ti adu a bisitami ti Kingdom Hall-mi ta mamanmantenermi a naimbag dayta.” Ngem adda dagiti ar-aramidenmi tapno agbalin a kasta. Ikagkagumaanmi a dalusan ken manteneren dagiti Kingdom Hall-mi. Kasano ti pannakamantener dagiti Kingdom Hall-mi?

 Responsabilidad dagiti kongregasion nga agus-usar iti Kingdom Hall a manteneren dayta isu a kanayon a dalusan dagiti kakabsat ti Kingdom Hall-da. Regular met nga aginspeksionda tapno maliklikan a maperdi dagiti paset ti Kingdom Hall, ken agtarimaanda kadagiti babassit a naperdi.

 Ti Local Design/Construction Department (LDC) ket mangibabaon kadagiti brother nga agserbi kas maintenance trainer tapno matulongan dagiti kakabsat nga agmantener iti Kingdom Hall-da. Innem agingga iti sangapulo a Kingdom Hall ti iggem ti maysa a maintenance trainer. Bisbisitaenna dagiti Kingdom Hall ken sansanayenna dagiti kakabsat iti kongregasion no kasanoda a dalusan ken manteneren ti Kingdom Hall-da. Kada tallo a tawen, inspeksionenna ti tunggal pasdek ken ammuenna no adda dagiti problema iti kinatalged wenno adda dagiti masapul a matarimaan.

 Ap-apresiaren dagiti kakabsat ti training nga ipapaay dagiti maintenance trainer. Kuna ti sister a ni Indhumathi a taga-India: “Nagmayat ti training. Agyamyamankami ta nasursuromi no kasano a manteneren ti Kingdom Hall-mi.” Kuna ti brother a ni Evans a taga-Kenya: “Nasursuromi a no tarimaanenmi a dagus dagiti babassit a perdi sakbay a kumaro, dakkel ti mainutmi.”

 Ti tinawen a magasgastos iti pannakausar ken pannakamantener ti maysa a Kingdom Hall ket mabalin nga umabut iti ginasut agingga iti rinibu a doliar, a depende iti lokasion ti Kingdom Hall, ti kabayagnan, ken ti kaadu ti kongregasion a mangus-usar iti dayta. Paggapgapuan dagiti pondo a maus-usar?

 Ti trabaho a panangmantener iti Kingdom Hall ket masupsuportaran babaen kadagiti donasion. Kuna ti brother a ni Alexander a taga-Kazakhstan: “Dadduma a pondo ket maus-usar para iti Internet ken dadduma pay a paggastuan, kas iti danum ken koriente. Dadduma met ti mausar para kadagiti gagangay a kasapulan iti Kingdom Hall, kas iti tisyu, gloves, mausar a pagdalus, ken pagpintura.” Ti dadduma pay a pondo ket maidonar para iti sangalubongan a trabaho tapno mausar kadagiti daddadakkel a proyekto a panagmantener iti intero a lubong.

 No ti matantia a magasto iti panagmantener iti Kingdom Hall ket nasursurok ngem iti gagangay a paggastuan iti uneg ti dua wenno tallo a bulan, masapul nga agkonsulta dagiti panglakayen iti LDC maintenance trainer. No aprobaran ti LDC ti proyekto, kaaduanna a ti pondo a mausar ket aggapu iti donasion para iti sangalubongan a trabaho. Bayat ti 2023 a tawen serbisio, 8,793 kadagitoy a proyekto ti nalpas ket 76.6 a milion a doliar ti nagastos. Kitaentayo ti dua kadagitoy a proyekto.

 Idiay Angola, adu ti problema ti maysa a 15 ti tawennan a Kingdom Hall. Masapul a masuktanen ti electrical system-na, addan birri dagiti paderna, ken ibagbaga dagiti kaarruba a no agtudo, agturong kadagiti balbalayda ti danum nga aggapu iti Kingdom Hall. Inyurnos ti LDC a masolusionan dagitoy a problema ket gimmastosda iti 9,285 a doliar. Agyamyaman dagiti kaarrubada ken nagbilibda iti pannakaaramid ti proyekto.

 Idiay Poland, maysa a Kingdom Hall ti adda perdin ti atepna isu nga agtedted no agtudo, ken perdi metten ti karpetna. Inaprobaran ti LDC a matarimaan ti atep ken masuktan ti karpet. Immabut iti 9,757 a doliar ti nagastos iti daytoy a proyekto. Gapu iti dayta, sumagmamano a tawen a mausar ti Kingdom Hall a saan a kasapulan a ma-renovate.

 Gapu iti panagmantenertayo, saantayo laeng a makainut iti donasion no di ket maidaydayawtayo pay ni Jehova. Kuna ti brother a ni Shaun a taga-Tonga: “Gapu iti trabaho a panagmantener, maidaydayawtayo ni Jehova babaen ti nadalus, naurnos, ken presentable a Kingdom Hall a maibagay a pakaikabilan ti naganna. Gapu iti dayta, saankami a mabain a mangawis kadagiti tattao nga umay iti Kingdom Hall-mi.”

 Makatulongtayo amin a mangdalus ken mangmantener iti lugar a pagdaydayawantayo. Kuna ni Marino a maintenance trainer idiay Australia: “Amintayo ket mabalin a makiraman iti nagsayaat a pribilehio a mangaywan kadagiti Kingdom Hall-tayo. Dakkel ti maitulong dayta tapno makainuttayo iti pondo a mabalin a mausar para kadagiti talaga a kasapulan a proyekto.”

 Maen-enjoy ti brother a ni Joel a taga-India ti tumulong iti panagmantener iti Kingdom Hall-da. Kunana: “No makipagtrabtrabahoak kadagiti kakabsat, kasla mapadpadasakon no kasanonto ti biag idiay baro a lubong.” Kuna ni Nicole, a nadakamat itay: “Iti laeng napalabas, timmulongak nga ag-mop bayat a tartarimaanen dagiti brother ti agtedtedted iti CR. Uray no saan a siak ti nakatarimaan iti perdi, nakatulongak tapno awan ti maaksidente.”

 No kayatmo ti agboluntario a tumulong iti panagmantener iti Kingdom Hall-yo, makisaritaka kadagiti panglakayenyo. Malaksid iti dayta, makatulong ti donasionmo tapno mamantener ti Kingdom Hall-yo ken ti dadduma pay a Kingdom Hall iti intero a lubong. Mabalinyo ti agdonar kadagiti kahon a pagitinnagan iti donasion iti Kingdom Hall-yo wenno babaen ti donate.pr418.com. Agyamyamankami unay iti kinaparaburyo.