Mapukpukawen dagiti nasayaat a kababalin. Bugbugkawan dagiti iritable a pasiente dagiti doktor; pagsawsawan dagiti awan respetona a kostumer dagiti waiter; kabkabilen dagiti nasukir a pasahero dagiti flight attendant; uy-uyawen, butbutngen, ken kabkabilen dagiti delingkuente nga ubbing dagiti titserda; adda dagiti politiko nga agar-aramid iti saan a nasayaat, ken adda met dagiti politiko a mangipampannakkel kadagiti nasayaat nga ar-aramidda.

 Mabasatayo iti Biblia no ania a talaga dagiti nasayaat a kababalin. Ilawlawagna met no apay a mapukpukawen dagita ita.

 Iti intero a lubong, nalawag a makita a mapukpukawen dagiti nasayaat a kababalin.

•   Sigun iti nabiit pay a surbey ti Gallup, patien dagiti Amerikano nga ita pay laeng a kastoy kababa ti moral a kababalin dagiti taga-United States iti napalabas a 22 a tawen.

•   Idi nasurbey ti nasurok a 32,000 a tattao iti 28 a pagilian, 65 a porsiento ti nangibaga nga ita pay laeng a nakitada a nakabasbassiten ti mangipakpakita kadagiti nasayaat a kababalin.

 Nabayagen a naisurat iti Biblia dagiti kababalin a makitkitatayo ita.

•   “Laglagipem a napeggadto dagiti maudi nga aldaw. Adunto dagiti tattao a naimut, naagum, napangas, ken napalangguad. Nauyawdanto, sukirendanto dagiti nagannak kadakuada, didanto bigbigen ti naimbag a nakem, . . . awanan asi, . . . [ken] nauyong.”—2 Timoteo 3:1-3, Ti Baro a Naimbag a Damag Biblia.

 Para iti ad-adu pay nga impormasion no kasano a matungtungpal daytoy a padto, basaem ti artikulo nga “Impakpakauna Kadi ti Biblia ti Kababalin ken Ar-aramid Dagiti Tattao Ita?”

 Uray no bumasbassiten dagiti mangipakpakita kadagiti nasayaat a kababalin iti intero a lubong, minilion ti nakapaneknek a ti Biblia ket nagsayaat a libro a mangibaga no ania dagiti nasayaat a kababalin. Dagiti pammagbagana ket “kanayon a mapangnamnamaan . . . , ita ken iti agnanayon.” (Salmo 111:8) Kitaentayo ti dadduma a pagarigan:

•   Ti kuna ti Biblia: “Aramidenyo . . . kadagiti tattao ti amin a kayatyo nga aramidenda kadakayo.”—Mateo 7:12.

   Kaipapananna: Masapul a nasayaat ken nadayaw ti panangtratotayo iti sabsabali, a kas met iti kayattayo a panangtratoda kadatayo.

•   Ti kuna ti Biblia: “Gapu ta inwaksiyon ti kinaulbod, sawenyo ngarud ti kinapudno iti kaarrubayo.”—Efeso 4:25.

   Kaipapananna: Masapul a napudnotayo iti amin nga ibagbaga ken ar-aramidentayo.

 Para iti ad-adu pay nga impormasion iti daytoy a topiko, mabalinmo a basaen dagitoy:

•   Ti isyu Ti Pagwanawanan a napauluan, “Ania ti Makatulong Kenka nga Agaramid iti Umiso a Desision?”

•   Ti artikulo a “Panangrespeto iti Panagduduma—Kasano a Makatulong ti Biblia?”