Dimmakkelak iti napanglaw a lugar iti siudad ti Montreal. Innem la a bulanko idi natay ni Tatang, isu a ni nanangkon ti nangibaklay iti amin a responsabilidad iti pamiliami. Walokami nga agkakabsat ket siak ti inaudi.

Bayat ti panagdakkelko, paseten ti inaldaw a panagbiagko ti droga, sugal, kinaranggas, ken pannakikadua kadagiti kriminal. Iti edad a 10, nagbalinak a babaonen dagiti babayadan a babbai ken dagiti agpapautang iti nangato ti interesna. Kanayon nga agulbodak ken maay-ayatanak a mangsuitik kadagiti tattao.

Idi agtawenak iti 14, paglaingakon ti mangloko kadagiti tattao. Kas pagarigan, gumatangak iti adu a nababa ti klasena a relo, pulseras, ken singsing sa markaak iti 14-carat a balitok ken ikkak iti tatak a kasla orihinal, sakonto ilako iti kalkalsada ken paradaan ti mall. Maay-ayatanak iti kasta a nalaka a panguartaan. Naminsan, uray la $10,000 ti naglakuak iti maysa nga aldaw!

Idi 15 anyosak, naparuarak iti reform school (institusion a tumultulong iti panagbalbaliw dagiti menor de edad a nakabasol iti linteg) isu nga awanen pagawidak. Kumporme lattan ti nagturturogak​—iti kalsada, parke, wenno iti balay dagiti am-ammok.

Masansan nga imbestigarandak dagiti polis gapu iti sinisuitik nga aramidko. Ngem diak pulos naibalud ta saanak met a naglaklako iti tinakaw. Nupay kasta, namin-adu a nagmultaak iti dakkel gapu iti panagsuitik, panagusar iti sabali a nagan, ken panaglako nga awanan permit. Gapu ta awan kabutengko, siak idi ti parasingir dagiti agpapautang a dakkel ti interesna. Delikado dayta a trabaho isu nga agitugotak no kua iti paltog. Sagpaminsan met a nakikaduaak iti sindikato.

Damo a naammuak ti maipapan iti Biblia idi agtawenak iti 17. Agkabkabbalaykami idi iti nobiak idi rugianna ti makipagadal kadagiti Saksi ni Jehova. Ngem diak nagustuan dagiti moral  a pagannurotan ti Biblia, isu a pinanawak ti nobiak ket nakikabbalayak iti sabali a babai.

Idi nakipagadal met ti maikadua a nobiak kadagiti Saksi, daytan ti namagpanunot kaniak! Dakkel ti nagbalbaliwanna. Talaga a nagustuak ta nasingsingpet ken naan-anusen! Pinatgak ti awis a makigimong iti Kingdom Hall dagiti Saksi ni Jehova. Sibabara nga inawatdak dagiti disente ken nasingpet a tattao. Talaga a naiduma dayta iti lubong a namulagatak! Diak pulos narikna ti ayat ken dungngo ti pamiliak bayat ti kinaubingko. Ti pammateg a nariknak kadagiti Saksi ni Jehova ti mismo nga il-iliwek. Idi imbaga dagiti Saksi nga iyadalandak iti Biblia, dagus nga immanamongak.

Mamatiak a ti naadalko iti Biblia ti nangsalbar iti biagko. Planok idi ti mapan agtakaw ken ti dua a kakaduak tapno adda pagbayadko iti nasurok a $50,000 nga utangko gapu iti sugal. Ngem imbag ta immatrasak met laeng iti planomi! Intuloy latta dagiti dati a kakaduak ti napan nagtakaw. Naaresto ti maysa, ken napapatay ti maysa.

Bayat ti panagadalko iti Biblia, nabigbigko nga adu gayam ti masapul a balbaliwak. Kas pagarigan, naadalko ti kuna ti 1 Corinto 6:10: “Dagiti mannanakaw, wenno dagiti naagum a tattao, wenno dagiti managbarbartek, wenno dagiti manangrabngis, wenno dagiti manangkikil didanto tawiden ti pagarian ti Dios.” Urayak la nakasangit idi nabasak dayta a teksto. Kasapulan gayam a naan-anay a baliwak ti panagbiagko. (Roma 12:2) Naranggas ken nauyongak, ken indakdakkelko ti nagul-ulbod.

Nupay kasta, naadalko iti Biblia a naasi ken manangpakawan ni Apo Jehova. (Isaias 1:18) Sipapasnek a nagkararagak, ket impakpakaasik ken Ama Jehova a tulongannak tapno naan-anay a makapagbalbaliwak. Gapu iti tulongna, in-inut a nabalbaliwak ti personalidadko. Ti maysa a kapatgan nga inaramidko ket ti panangikasarko iti nobiak.

Idi 24 ti tawenko, tallon ti anakmi. Masapul nga agbirokakon iti disente a pagtrabahuan, ngem nababa ti adalko ken awan ti mangirekomenda kaniak. Nagkararagak manen a sipapasnek ken Ama Jehova. Kalpasanna, nagbirokak iti trabaho. Imbagak kadagiti pagap-aplayak a kayatkon ti agbalbaliw ken agbalin a mapagpiaran iti trabaho. Adda dagiti gundaway nga imbagak nga agad-adalak iti Biblia ken kayatkon ti agbalin a nasaysayaat a tao. Adu kadagiti nagaplayak ti saan a nangawat kaniak. Ngem kalpasan a naibagak ti napalabasko iti maysa manen nga interbiu, kinuna ti nanginterbiu: “Diak talaga ammo no apay, ngem kasla adda mangibagbaga kaniak nga alaenka iti daytoy a trabaho.” Patiek a daytoy ti sungbat ti karkararagko. Idi agangay, nagpabautisarkami nga agassawa kas Saksi ni Jehova.

Sibibiagak ita gapu ta iyap-aplikarko dagiti prinsipio ti Biblia ken agbibiagak kas maysa a Kristiano. Addaanak met iti nasayaat a pamilia, ken nadalus itan ti konsiensiak gapu ta kombinsidoak a pinakawannakon ni Apo Jehova.

Iti naglabas a 14 a tawen, binulan nga agarup 70 nga oras a mangaskasabaak ken mangisursuro iti sabsabali maipapan iti Biblia. Ket itay nabiit, agkaduakamin ken baketko iti daytoy a trabaho. Iti napalabas a 30 a tawen, maragsakanak ta 22 a katrabahuak ti natulongak nga agdayaw ken Jehova a Dios. Mapmapanak pay laeng kadagiti pag-shopping-an​—ngem saanen a tapno mangloko. Ita, mapanakon sadiay tapno ipakaammok ti pammatik kadagiti tattao. Adda kayatko nga ited kadakuada: ti namnama a biag iti baro a lubong iti masanguanan nga awanen dagiti manangloko.​—Salmo 37:10, 11.