Tulbek ti Naragsak a Pamilia
No Kasano a Mapagballigian ti Umuna a Tawen ti Panagasawa
Asawa a lalaki: “Diak ninamnama a nagadu gayam ti nagdumaanmi ken baketko! Kas pagarigan, nasapaak nga agririing, idinto ta isu, naladaw nga agriing. Diak maawatan ti agbaliwbaliw a riknana! Maysa pay—no aglutoak, naglaing a mangkritikar, nangruna no usarek ti punas ti plato a pangpunas iti imak.”
Asawa a babai: “Saan a matagtagari ni lakayko idinto ta nairuamak iti pamiliami a naariwawa aglalo no pannangan. No agluto ni lakayko, maymaysa a punas ti pagpunasna kadagiti plato ken iti imana! Masuronak! Apay a kasta dagiti lallaki? Diak maawatan ida. Kasano koma a makapagballigi ti maysa a pagassawaan?”
NO KAKASKASARYO pay laeng, mapaspasaranyo kadi dagita a problema? Agparang kadi a nakapataud ti asawam kadagiti pagkapuyan ken saan a nasayaat nga ugali nga awan met idi agin-innaremkayo pay? Ania ti aramidem tapno maksayan dagiti “inaldaw a problema a mapaspasaran dagiti naasawaan”?—1 Corinto 7:28, Today’s English Version.
Umuna, saanmo a namnamaen a gapu ta nagkinnarikayo idi nagkasarkayo, agbalinkayon nga eksperto maipapan iti panagasawa. Nalabit a nasigokayo a makilangen idi balasang ken barokayo pay, ket mabalin a napasayaatyo dayta bayat nga agin-innaremkayo. Ngem ita ta agassawakayon, masubok dagita a kinasigo kadagiti baro a pamay-an ken nalabit kasapulan a patanorenyo ti dadduma pay a paglaingan. Agkamalikayto kadi? Sigurado dayta. Kabaelanyo kadi a patanoren dagiti paglaingan a kasapulanyo? Wen!
Ti panagkonsulta kadagiti eksperto ken ti panangyaplikar iti balakadda ti kasayaatan a pamay-an tapno mapasayaat ti aniaman a paglaingan. No maipapan iti panagasawa, ni Jehova a Dios ti kalaingan ken eksperto, yantangay isu Daydiay nangparsua kadatayo ken nangipaay kadatayo iti tarigagay a mangasawa. (Genesis 2:22-24) Kitaenyo no kasano a makatulong ti Biblia tapno mapagballigian dagiti karit ken mapatanoryo dagiti sumaganad a paglaingan a kasapulanyo, ket iti kasta, mataginayon ti nasayaat a relasionyo nga agassawa uray iti labes ti umuna a tawen.
1. SURSURUENYO TI AGKINNONSULTA
Ania dagiti karit?
Ni Keiji, * a taga-Japan, malipatanna no dadduma a maapektaran ni baketna kadagiti pangngeddengna. “Inawatko dagiti imbitasion a diak man la kinonsulta ni baketko,” kunana. “Idi agangay, natakuatak a saan gayam a kombiniente kenkuana dagiti nakitulagak.” Kinuna ni Allen a taga-Australia: “Panagriknak, saanak a malalaki no konsultaek pay laeng ni baketko tunggal agdesisionak.” Karit dayta kenkuana gapu iti pannakapadakkelna. Kasta met laeng ti kasasaad ni Dianne, a taga-Britain. Kinunana: “Nairuamak nga agpabalakad iti kapamiliak. Isu nga idi damo, no agdesisionak, dagiti kapamiliak ti pagkonsultaak imbes a ni lakayko.”
Ania ti solusion?
Laglagipem nga ibilbilang ni Jehova dagiti agassawa kas ‘maymaysa a lasag.’ (Mateo 19:3-6) Iti imatangna, awan sabali a kapatgan a relasion iti nagbabaetan dagiti tattao no di ti relasion dagiti agassawa! Nasken ti nasayaat a komunikasion tapno agtalinaed a nalagda ti singgalut ti agassawa.
Adu ti maadal dagiti agassawa no usigenda ti pamay-an ni Jehova a nakikomunikar ken Abraham. Kas pagarigan, pangngaasim ta basaem ti saritaanda a nailanad iti Genesis 18:17-33. Usigem ti tallo a pamay-an a panangpadayaw ti Dios ken Abraham. (1) Inlawlawag ni Jehova ti panggepna nga aramiden. (2) Nagimdeng bayat nga inlawlawag ni Abraham ti kapanunotanna. (3) Agingga a posible, inkabilangan ni Jehova ti kiddaw ni Abraham. Kasanom a suroten ti ulidan ni Jehova no konsultaem ti asawam?
PADASEM DAYTOY: No kasaritam ti asawam maipapan kadagiti bambanag a makaapektar kenkuana, (1) ilawlawagmo no kasanom a tamingen ti kasasaad, ngem ibagam dayta kas singasing, saan a kas pangngeddeng wenno ultimatum; (2) saludsodem ti kapanunotan ti asawam, ken bigbigem ti kalinteganna a mangyebkas iti panangmatmatna; ken (3) ‘ti kinanainkalintegam maammuan koma’ babaen ti panangikabilangam iti pagayatan ti asawam agingga a posible.—Filipos 4:5.
2. SURSURUEM TI AGBALIN A NATAKTIKA
Ania ti karit?
Depende iti naggapuam a pamilia ken kultura, nalabit nairuamka a mangipapilit iti opinionmo ken amangan no makasair pay. Kas pagarigan, ni Liam a taga-Europa, kinunana: “Nakairuaman idiay ayanmi ti nagubsang a panagsasao. Ti kasta a wagas ti panangyebkasko iti riknak ti masansan a pakasairan ni baketko. Masapul a sursuruek ti agbalin a naalumamay.”
Ania ti solusion?
Dimo ipagarup a kayat ti asawam a makisaritaka kenkuana iti wagas a kas iti nakayugaliam. (Filipos 2:3, 4) Makatulong met kadagiti agdadamo nga agassawa ti balakad ni apostol Pablo iti maysa a misionero. Insuratna: “Ti adipen ti Apo saan a kasapulan a makiapa, no di ket kasapulan nga agbalin a naalumamay.” Iti orihinal a Griego, ti sao a naipatarus a “naalumamay” ket mabalin met nga ipatarus a “nataktika.” (2 Timoteo 2:24) Ti kinataktika isu ti abilidad a mangammo iti kinarikut ti kasasaad ken mangrisut a siaannad iti dayta tapno awan ti masair.
PADASEM DAYTOY: No adda pakasuronam iti asawam, panunotem a ti kasasaom ket saan a ti asawam no di ket maysa a nasayaat a gayyem wenno ti amom. Usarem pay ngata ti isu met laeng a sasao wenno tono ti boses? Kalpasanna, mangpanunotka kadagiti rason no apay a maikari ti asawam iti dakdakkel a panagraem ken kinataktika ngem iti gayyem wenno amom.—Colosas 4:6.
3. SURSURUEM NGA IBAKLAY DAGITI KABBARO NGA AKEMMO
Ania ti karit?
Iti damo, mabalin a saan a nataktika ti panagakem ti asawa a lalaki kas ulo, wenno ti asawa a babai mabalin a saan a nairuam a mangipaay iti singasing iti nataktika a wagas. Kas pagarigan, kinuna ni Antonio a taga-Italia: “No agdesision idi ni tatangko maipapan kadagiti pakaseknan ti pamiliami, pulos a dina konsultaen ni nanangko. Isu nga idi addan asawak, kasla ari ti panangidaulok iti pamiliak idi damo.” Kuna met ni Debbie a taga-Canada: “Kalikagumak a nadalimanek unay ni lakayko. Ngem ad-adda laeng a dinak ikankano gapu iti kinaturayko.”
Ania ti solusion para iti asawa a lalaki?
Para iti dadduma nga assawa a lallaki, ti dinakamat ti Biblia a panagpasakup ti asawa a babai iti lakayna ket awan nakaidumaanna iti panagtulnog ti anak iti nagannakna. (Colosas 3:20; 1 Pedro 3:1) Ngem kunaen ti Biblia a ti asawa a lalaki ket “makitiponto iti asawana, ket dagiti dua maymaysadanton a lasag”; saan a kasta ti kunaen ti Biblia maipapan iti nagannak ken ti anakna. (Mateo 19:5) Ti asawa a babai ket dineskribir ni Jehova kas komplimento wenno kadua ni lakayna. (Genesis 2:18) Saanna a pulos a tinukoy ti anak kas komplimento wenno kadua ti nagannak. Ania ti panagkunam—no ti asawa a lalaki tratuenna ni baketna kas maysa nga ubing, raraemenna kadi ti urnos iti panagasawa?
Kinapudnona, idagdagadag ti Sao ti Dios a tratuem ti asawam a babai iti wagas a kas iti panangtrato ni Jesus iti kongregasion Kristiano. Nalaklaka ti panangibilang kenka ni baketmo kas ulona no (1) saanmo a namnamaen a dagus ken di agkamali iti panangipakitana ti panagpasakupna kenka ken (2) ayatem kas iti bukodmo a bagi, uray no tumaud dagiti parikut.—Efeso 5:25-29.
Ania ti solusion para iti asawa a babai?
Bigbigem a ni lakaymo itan ti ulom a dinutokan ti Dios. (1 Corinto 11:3) Padpadayawam ti Dios no padpadayawam ni lakaymo. No laksidem ti kinaulona, ipakpakitam no ania ti panangmatmatmo saan laeng a ken lakaymo no di ket iti Dios ken kadagiti kalikagumanna.—Colosas 3:18.
No pagsaritaanyo dagiti parikut, sursuruem nga atakaren ti parikut saan ket a ti kababalin ni lakaymo. Kas pagarigan, adda kinaawan hustisia a kayat ni Reyna Ester nga ilinteg ti asawana a ni Ari Asuero. Imbes nga atakarenna a mismo ti asawana, sitataktika nga inyebkasna ti riknana. Immanamong ni lakayna iti singasingna ket idi agangay inaramid ti ari ti umiso. (Ester 7:1-4; 8:3-8) Ad-adda nga ayatennaka ni lakaymo no (1) ipaayam iti tiempo tapno masursurona a naimbag ti baro nga akemna kas ulo ti pamilia ken (2) tratuem a siraraem, uray no makaaramid iti biddut.—Efeso 5:33.
PADASEM DAYTOY: Imbes a pampanunotem dagiti ugali a nasken a balbaliwan ni lakaymo, ilistam dagiti nasken a balbaliwam. Kadagiti assawa a lallaki: No maupay ni baketmo gapu iti wagas a panangitungpal wenno dimo panangitungpal iti kinaulom, saludsodem kenkuana no ania dagiti balbaliwam, sa ilistam ti singasingna. Kadagiti assawa a babbai: No marikna ni lakaymo a saanmo a raraemen, saludsodem kenkuana no ania dagiti balbaliwam, ken ilistam ti singasingna.
Taginayonem a Rasonable Dagiti Inanamaem
Ti panagsursuro a mangtaginayon iti naragsak, balanse a relasion kas agassawa ket umasping iti panagsursuro nga agbisikleta. Namnamaem a matumbaka sagpaminsan bayat a sumaysayaat ti kompiansam nga agbisikleta. Kasta met, rumbeng a namnamaem a makaaramidka kadagiti nakababain a kamali bayat nga umad-adu ti kapadasam kas asawa.
Dimo liplipatan ti agangaw. Ikabilangam a naimbag dagiti pakaseknan ti asawam, ngem sursuruem a katawaan dagiti kamalim. Dimo palabsen dagiti gundaway a mabalinmo a paragsaken ti asawam bayat ti umuna a tawenyo kas agassawa. (Deuteronomio 24:5) Kangrunaan iti amin, agpaiwanwankayo nga agassawa iti Dios. No aramidenyo dayta, tinawen a bumileg ti singgalutyo kas agassawa.
^ par. 9 Nabaliwan ti dadduma a nagan.
ISALUDSODMO ITI BAGIM . . .
- Ti kadi asawak ti kasingedan a pangyeb-ebkasak iti riknak, wenno sabali a tao ti pagkonkonsultaak?
- Iti las-ud ti naglabas a 24 nga oras, ania ti espesipiko nga inaramidko tapno ipakitak nga ay-ayatek ken raraemek ti asawak?
Baka Kayatmo Met ti
TI PAGWANAWANAN
Panangrisut Kadagiti Parikut iti Panagasawayo
Makatulong dagiti prinsipio ti Biblia tapno marisut dagiti problemada iti naayat ken nadayaw a pamay-an. Usigem ti 4 a kangrunaan a pamay-an.
POSIBLE NGA AGBALIN A NARAGSAK TI PAMILIAM
Agpatulong iti Dios Tapno Naragsak ti Panagasawayo
Sumayaat ti relasionyo nga agassawa no isaludsodyo dagitoy.
SUNGBAT DAGITI SALUDSOD MAIPAPAN ITI BIBLIA
Ania ti Ibaga ti Biblia Maipapan iti Panagasawa?
Dagiti prinsipio ti Biblia a makatulong tapno maliklikan wenno masolusionan dagiti problema.
AGRIINGKAYO!
No Kasanoyo a Sanguen Dagiti Pagdumaanyo
Nariknam kadin a dikayo agkabagayan iti asawam?
AGRIINGKAYO!
No Kasano nga Ipakita ti Respeto
Saan laeng koma a sagpaminsan nga ipakitam ti respeto iti asawam, no di ket kanayon koma. Kasanom a maipakita a resrespetuem ti asawam?
