AGARUP lima a tawenen ti napalabas, da Choong Keon ken Julie, agassawa nga agtawen itan iti agarup 35, ket agserserbi idi kas regular pioneer iti Sydney, Australia. “Adda part-time a trabahomi ken komportable ti biagmi,” kinuna ni Choong Keon. “Iti lugar a pagnanaedanmi, napintas ti klima ken nanam-ay a biag. Kanayon a makalangenmi ti pamiliami ken dagiti gagayyemmi.” Ngem makonkonsiensia da Choong Keon ken Julie. Apay? Ammoda a kabaelanda ti mangipaay iti ad-adu a tiempo nga agserbi ken Jehova, ngem dida met agtigtignay a mangaramid iti dayta.

Iti maysa a kombension idi 2009, adda palawag a nangtukay iti riknada. Inturong ti ispiker ti palawagna kadagiti makabael a mangpalawa iti ministerioda. Kinunana: “Panunotenyo daytoy: Ti maysa a drayber maisikkona laeng ti luganna iti kannigid wenno kannawan no agtartaray ti lugan. Umasping iti dayta, iturongnatayo laeng ni Jesus a mangpalawa iti ministeriotayo no talaga nga ikagkagumaantayo a ragpaten ti kalattayo.” * Narikna dagitoy nga agassawa a kasla isuda a mismo ti kasarsarita ti ispiker. Iti dayta met laeng a kombension, adda nainterbiu nga agassawa a misionero nga agserserbi iti Taiwan. Inyestoriada dagiti naragsak a kapadasanda iti ministerio ken imbagada a dakkel pay ti panagkasapulan sadiay. Narikna manen da Choong Keon ken Julie a kasla nairanta kadakuada dagita a sasao.

“Kalpasan dayta a kombension,” kinuna ni Julie, “inkararagmi ken Jehova nga ikkannakami iti tured a mangipatungpal iti planomi nga umakar iti Taiwan.” Sana kuna: “Ngem madanagankami. Kaslakam la iti ubing a damona ti tumapog iti adalem a paset ti swimming pool.” Nakatulong kadakuada ti kuna ti Eclesiastes 11:4: “Ti mangsipsiput iti angin saanto nga  agimula iti bin-i; ket ti kumitkita kadagiti ulep saanto nga agapit.” Kinuna ni Choong Keon: “Insardengmi ti ‘agsiput ken kumita’ ket inrugimi ti ‘agmula ken agapit.’” Dida namingga a nagkarkararag. Nagbasada iti kapkapadasan dagiti misionero, nag-e-mail-da kadagiti immakaren iti Taiwan, inlakoda dagiti lugan ken mueblesda, sa immakarda iti Taiwan tallo a bulan kalpasanna.

Nasurok a 100 a kakabsat a lallaki ken babbai manipud iti nagduduma a pagilian ti agserserbi ita iti Taiwan kadagiti lugar nga agkasapulan iti ad-adu nga agibumbunannag iti Pagarian. Naggapuda iti Australia, Britain, Canada, France, Japan, Korea, Espania, ken Estados Unidos. Agduduma ti tawenda manipud 21 agingga’t 73. Babbalasang ti nasurok a 50 kadakuada. Ania ti nakatulong kadagitoy a nareregta a kakabsat tapno maitungpalda ti ministerioda iti sabali a pagilian? Ammuentayo.

Ni Laura, maysa a balasang a taga-Canada, ket agserserbi kas payunir iti makinlaud a Taiwan. Ngem agarup 10 a tawen sakbayna, saanna idi a magusgustuan ti mangasaba. Inlawlawag ni Laura: “Bassit la ngamin idi a tiempo ti us-usarek iti ministerio.” Kalpasanna, inawis dagiti gagayyemna a mapanda mangasaba idiay Mexico iti makabulan. “Dayta ti umuna a gundaway a binusbosko ti adu a tiempo iti ministerio, ket nasdaawak ta nakaragragsak gayam!”

Gapu iti dayta a nagsayaat a kapadasanna, natignay ni Laura nga umakar iti kongregasion iti Canada nga agus-usar iti sabali a lengguahe. Nagadal iti Chinese sa immakar iti maysa a Chinese a grupo. Pinagbalinna a kalatna ti umakar iti Taiwan, ket immakar sadiay idi Septiembre 2008. “Immabot iti dandani makatawen sakbay a nairuamak iti baro nga aglawlaw,” kuna ni Laura, “ngem ita, diakon mapanunot ti agsubli idiay Canada.” Ania itan ti makunana iti trabaho a panangasaba? “Matagtagiragsakko itan,” kinunana. “Awanen ti naragragsak pay ngem iti pannakakitam kadagiti iyad-adalam iti Biblia nga agbalbaliw bayat a maam-ammoda ni Jehova. Namin-adun a nariknak ti kasta a rag-o gapu iti panagserbik iti Taiwan.”

Agarup walo a tawenen ti napalabas, immakar iti Taiwan ti agassawa a da Brian ken Michelle, agpada nga agtawenen iti agarup 35 a taga-Estados Unidos. Idi damo, mariknada a kasla bassit ti maar-aramidanda iti ministerio. Ngem imbaga kadakuada ti maysa nga eksperiensiado a misionero: “Uray no tract laeng ti maitedmo iti maysa a tao, laglagipem a mabalin a dayta ti umuna a gundaway a maipaayan iti mensahe maipapan ken Jehova. Uray iti kasta laeng a pamay-an, addan nagpateg a maar-aramidam iti ministerio!” Dayta a makaparegta a komento ti nakatulong kada Brian ken Michelle a di sumuko. Kinuna pay kadakuada ti sabali a kabsat: “Tapno dika maupay iti panagsursurom iti Chinese, rukodem ti nagrang-ayam saan nga iti kada aldaw no di ket iti kada asamblea.” Idi agangay, nakasursuroda met laeng iti Chinese ket nalalaingda itan a payunir.

Ania ti mabalin nga aramidem tapno matignayka nga agsursuro iti sabali a lengguahe? Agpasiarka iti pagilian a kayatmo a pagserbian. Tumabunoka kadagiti gimong sadiay, makilangenka kadagiti kakabsat, ken makikaduaka iti ministerio. Kinuna ni Brian: “No makitam nga adu ti umawat iti mensahe ti Pagarian ken mariknam ti nabara nga ayat dagiti kakabsat, maguyugoyka a mangsango kadagiti karit iti panagserbi iti sabali a pagilian.”

Agisursuro iti Ingles ti dadduma nga immakar iti Taiwan tapno masuportaranda ti panagpayunirda. Aglaklako met iti ikan da Kristin ken Michelle. Kinuna ni Kristin, “Itattak la a mapadasan ti kastoy a trabaho, ngem daytoy ti makatulong kaniak tapno makapagtalinaedak iti pagilian.” Idi agangay, addan dagiti regular a kostumer ni Kristin. Gapu iti daytoy a part-time a trabaho, masuportaranda dagiti pinansial a kasapulanda ken ad-adu pay ti tiempoda para iti kangrunaan a trabahoda—ti panagpayunir wenno panagkalap iti tattao.

Simmangpet idiay Taiwan ti agassawa a da William ken Jennifer a taga-Estados Unidos agarup pito a tawenen ti napalabas. “Makabannog no dadduma ti agsursuro iti lengguahe, agpayunir, agaywan iti kongregasion, ken mangged para iti pinansial a kasapulan ti pamilia,” kinuna ni William. Ania ti nakatulong kadakuada nga agballigi ken agtalinaed a naragsak? Nangaramidda kadagiti nainkalintegan a kalat. Kas pagarigan, gapu ta saanda a nangnamnama a makasursuroda a dagus iti Chinese, saanda a naupay uray nabayag ti panagrang-ayda.

Malagip ni William ti imbaga kenkuana ti maysa nga agdaldaliasat a manangaywan, “Tagiragsakem ti biahe, saan laeng a ti papanam.” Kayatna a sawen a kalpasan a naikeddengtayo ti naespirituan a kalattayo, tagiragsakentay koma dagiti agdama nga ar-aramidentayo agingga a maragpattayo ti kalattayo. Kinuna ni William a ti panangyaplikarda iti dayta a balakad ti nakatulong kadakuada nga agassawa nga agbalin a mannakibagay, dumngeg iti balakad dagiti panglakayen, ken mangaramid iti kasapulan a panagbalbaliw tapno agballigi ti ministerioda iti sabali a pagilian. Innayonna, “Tinulongannakami met daytoy a mangtagiragsak iti kinapintas ti isla a nakaibaonanmi.”

Kas kada William ken Jennifer, ni Megan a maysa a balasang a payunir a taga-Estados Unidos ‘tagtagiragsakenna met ti biahe’ bayat a ragragpatenna ti kalatna nga agbalin a nalaing nga agsao iti Chinese. Kada ngudo ti lawas, makikadua kadagiti agibumbunannag a mangasaba iti maysa a nagpintas a teritoria—ti puerto ti Kaohsiung, ti kadakkelan a sangladan ti barko iti Taiwan. Mapan ni Megan kadagiti barko tapno ikasabana ti naimbag a damag kadagiti mangngalap a taga-Bangladesh, India, Indonesia, Pilipinas, Thailand, ken Vanuatu. “Gapu ta ababa laeng a tiempo ti kaadda dagiti mangngalap iti puerto, dagus nga iyadalanmi ida iti Biblia. Tapno  makasaritami amin ida, masansan a paggigiddanek nga iyadalan ti uppat wenno lima kadakuada.” Ket komusta met ti panagsursurona iti Chinese? Kinunana, “Kayatko nga al-alistoak koma a makasursuro, ngem kanayon a pampanunotek ti imbaga kaniak ti maysa a brother, ‘Aramidem ti amin a kabaelam, ket ni Jehova ti tumulongto kenka.’”

Sakbay nga immakar iti sabali a pagilian ni Cathy a taga-Britain, inammona pay no ania a teritoria ti natalged a pagserbian dagiti babbalasang. Inkararagna dayta ken Jehova ken nagsurat iti sumagmamano a sanga nga opisina tapno agdamag no ania dagiti posible a peggad a maipasango kadagiti kakabsat a babbai. Kalpasanna, inusigna a naimbag dagiti subalit ti suratna ket napilina ti Taiwan.

Idi 2004, iti edad a 31, immakar ni Cathy iti Taiwan ket inkagumaanna ti agbiag iti simple. Kinunana: “Dinamagko kadagiti kakabsat no sadino ti paggatangan iti nalalaka a prutas ken natnateng. Nakatulong dagiti singasingda tapno mayan-anayko ti badyetko.” Ania ti nakatulong kenkuana nga agbiag a simple? Kuna ni Cathy: “Masansan nga ikararagko ken Jehova a tulongannak a makontento iti simple a taraon ken kawes nga adda kaniak. Mariknak a sungsungbatan ni Jehova dagiti kararagko ta isursuronak no ania a talaga dagiti kasapulak ken tultulongannak nga agbalin a kontento.” Innayonna: “Naragsakak iti simple a biagko gapu ta daytoy ti tumultulong kaniak a mangipamaysa kadagiti naespirituan a bambanag.”

Saan laeng a simple ti biag ni Cathy, makaparagsak pay. Inlawlawagna no apay: “Mangaskasabaak iti lugar nga adu ti mangipangpangag iti naimbag a damag. Talaga a nagragsak!” Idi kasangsangpetna iti Taiwan, adda laeng dua a Chinese a kongregasion iti siudad a nagpayuniranna. Ngem ita, addan pito a kongregasion sadiay. Kuna ni Cathy: “Ti mismo a pannakakitak iti napartak a panagrang-ay ken ti pannakiramanko iti trabaho a panagani ti mangparparagsak kaniak iti inaldaw!”

Komusta itan da Choong Keon ken Julie a nadakamat itay? Idi damo, narikna ni Choong Keon a bassit ti maitultulongna iti kongregasion gapu ta saanna unay nga ammo ti agsao iti Chinese. Ngem saan a kasta ti panagrikna dagiti kakabsat iti kongregasion. “Idi nagudua ti kongregasionmi, naikkanak iti adu a kanayonan a responsabilidad kas maysa a ministerial nga adipen,” kuna ni Choong Keon. “Nariknak a talaga nga agserserbiak iti lugar nga addaan dakdakkel a panagkasapulan. Nakadakdakkel dayta ta kasapulanda payen ti kas kaniak!,” nakaisem a nangibaga. Maysa itan a panglakayen ni Choong Keon. Innayon ni Julie: “Mariknami itan nga adda magapgapuananmi. Marikriknami pay ti pannakapnek ken rag-o a dimi pay pulos narikrikna idi. Immaykami ditoy tapno tumulong, ngem nariknami a dakami ti natulongan daytoy a nagsayaat a kapadasanmi. Agyamankami ken Jehova ta impalubosna a makapagserbikami ditoy!”

Iti adu a dagdaga, adu pay a trabahador ti kasapulan para iti naespirituan a panagani. Dandanika kadin aggraduar ket pampanunotem no ania ti pangusaram iti biagmo? Baro wenno balasangka kadi pay ken kayatmo ti ad-adda nga agpausar iti organisasion ni Jehova? Kayatmo kadi nga ipaayan ti pamiliam iti adu a pakalaglagipan iti panagserbida ken Jehova? Retiradoka kadin ken aduanka iti nagsasayaat a kapadasan a mabalinmo nga iranud iti sabsabali? Manamnamam nga agsagrapkanto iti adu a bendision no palawaem ti ministeriom babaen ti panagserbim iti lugar nga agkasapulan iti ad-adu nga agibumbunannag iti Pagarian.