NO NAKAPANKAN iti bassit nga isla iti Sangir Besar idiay Indonesia sumagmamano a tawenen ti napalabas, baka nakitamon ti tallo a kakabsat a sister iti igid ti baybay. Pagaammoda iti isla gapu iti ministerioda​—tultulonganda dagiti tattao a mangadal iti Biblia. Ngem iti daydi a tiempo, adda naidumduma a trabaho nga ar-aramidenda.

Umuna, mapanda iti igid ti baybay tapno agkitada kadagiti dadakkel a bato nga isangladda. Dadduma kadagita a bato ket kas kadakkel ti bola ti soccer. Sumaruno, agtugawda iti kayo a bangkito sa agusarda iti martilio a pangburak kadagita a bato tapno agbalin a babbabassit ngem iti itlog ti manok. Kalpasan dayta, ikargada dagita a bato kadagiti plastik a timba sa iyulida iti pagnanaedanda. Intono kuan, isakoda dagita a bato sa bunagen dagiti trak a mausar iti panagaramid iti kalsada.

Ni Hulda ti maysa kadagita a sister. Ad-adu ti tiempona nga agtrabaho ngem iti dadduma. Kaaduanna nga usarenna ti kuarta a maurnongna para kadagiti inaldaw a kasapulan ti pamiliana. Ngem adda pay sabali a kalat a pampanunotenna. Kayatna ti maaddaan iti tablet tapno ma-access-na ti JW Library^® app. Ammo ni Hulda a dagiti video ken dadduma pay a linaon ti app ket makatulong tapno mapasayaatna ti ministeriona ken lallalo a maawatanna ti Biblia.

Dua nga oras kada agsapa iti maysa ket kagudua a bulan, nagburak ni Hulda kadagiti bato a maikarga iti bassit a trak. Idi agangay, nakaurnong met laengen iti igatangna iti tablet.

Imbaga ni Hulda: “Uray no permi ti bannogko ken nasakit ti bagik gapu iti kabuburakko kadagiti bato, nalipatak amin dagita idi maus-usarkon daytoy baro a tablet-ko a tumulong kaniak nga agbalin a mas epektibo iti ministerio ken tapno nalaklakak nga isagana dagiti gimong.” Imbagana pay a nakatulong ti tablet-na nangruna idi rugrugi pay laeng ti pandemic. Amin ngamin nga aktibidad iti kongregasion ket maar-aramid iti virtual a pamay-an. Makipagragsaktayo ken Hulda ta naragpatna ti kalatna.