IDI agarup 670 B.C.E., ti Asiria ti kadakkelan nga imperio iti intero a lubong. Sigun iti British Museum Blog, ti sakupna ket “manipud iti Cyprus iti laud agingga iti Iran iti daya, ken adda idi tiempo a nasakupna met ti Egipto.” Ti kabeserana a Nineve ti kadakkelan idi a siudad iti lubong. Ipagpannakkelna idi dagiti nagdadakkel a monumento, nagpipintas a hardin, nalabor a palasio, ken naglalawa a libraria. Adu ti naikitikit kadagiti pader ti nagkauna a Nineve. Makita kadagita a ni Ari Ashurbanipal, kas iti dadduma nga ari ti Asiria, inawaganna ti bagina kas “ari ti lubong.” Iti dayta a tiempo, kasla awan ti makaparmek iti Asiria ken Nineve.

Ngem idi nadanon ti Asiria ti kabilgan a paset ti panagturayna, impadto ni Sofonias a propeta ni Jehova: “Dadaelen [ni Jehova] ti Asiria, ket dadaelennanto ti Nineve, kas iti namaga a desierto.” Impadto met ni Nahum a propeta ni Jehova: “Ipanawyo ti pirak, ipanawyo ti balitok! . . . Awan nagyan ti siudad, napanawan, ken nadadael! . . . Pumanawto ti asinoman a makakita kenka ket ibagada, ‘Nadadaelen ti Nineve!’” (Sof. 2:13; Nah. 2:9, 10; 3:7) Idi nangngeg dagiti tattao dagita a padto, mabalin a pinampanunotda: ‘Posible ngata dayta? Maparmekto kadi ti mannakabalin nga Asiria?’ Kasla imposible a mapasamak dayta.

Nupay kasta, napasamak ti kasla imposible! Di nagbayag, sakbay ti 600 B.C.E., ti Asiria ket pinarmek dagiti Babilonio ken Medo. Idi agangay, awanen ti agnanaed iti Nineve ken napunas daytan iti lagip dagiti tattao! Sigun iti publikasion a The Metropolitan Museum of Art idiay New York, kalpasan ti adu a tawen, “ti siudad ket naabandona ken nagaburanen, ken ti Biblia laeng idin ti pakaammuan ti maipapan iti Nineve.” Kuna ti Biblical Archaeology Society Online Archive nga idi rugrugi ti 1800’s, “awanen ti makaammo no talaga nga adda idi ti nabileg a kabesera ti Asiria.” Ngem idi 1845, rinugian a kinali ti arkeologo a ni Austen Henry Layard ti lugar nga ayan gayam ti Nineve. Dagiti nadiskobre a rebba ket ebidensia a nakarangrang-ay idi a siudad ti Nineve.

Natungpal amin dagiti padto maipapan iti Nineve. Dayta ti mangpatibker iti panagtalektayo a matungpalto met dagiti padto ti Biblia nga agpatingga dagiti agdama a napolitikaan a turay.​—Dan. 2:44; Apoc. 19:15, 19-21.