KASTOY ti mabasa iti libro a Mateo: “Simrek ni Jesus iti templo ket pinaruarna amin dagidiay aglaklako ken aggatgatang idiay templo, ket binalintuagna dagiti lamisaan dagiti agsuksukat iti kuarta ken dagiti bangko dagidiay aglaklako kadagiti kalapati. Ket kinunana kadakuada: ‘Adda a naisurat, “Ti balayko maawaganto iti balay a pagkararagan,” ngem pagbalbalinenyo a rukib dagiti mannanakaw.’”—Mat. 21:12, 13.

Ipakita dagiti dokumento maipapan iti pakasaritaan dagiti Judio a sobra ti ngina ti lako dagiti negosiante iti templo. Kas pagarigan, kuna ti Mishnah (Keritot 1:7) nga idi umuna a siglo C.E., immabut agingga iti maysa a balitok a denar ti presio ti maysa a paris ti maidaton a kalapati. Mabalin a katupag dayta ti 25 nga aldaw a sueldo idi ti ordinario a trabahador. Mapalubosan idi dagiti marigrigat a mangidaton iti kalapati wenno pagaw; ngem ngimmina ti presio dagita nga uray la didan kabaelan ti gumatang. (Lev. 1:14; 5:7; 12:6-8) Kinagura daytoy ni Rabbi Simeon ben Gamaliel isu a kinissayanna dagiti masapul nga idaton. Nagsuek ti presio ti dua a kalapati iti maminsangagasut a nababbaba ngem iti dati a bayadna.

Gapu iti dayta, umiso laeng ngarud nga inawagan ni Jesus iti “mannanakaw” dagiti aglaklako idiay templo gapu iti inaagum nga aramid ken ugalida.