Inikkan ti Dios dagiti tattao iti naisangsangayan a regalo​—ti abilidad a makikomunikar kenkuana ken mangibukbok iti rikriknada babaen ti kararag. Inkararag ni propeta David: “O Managdengngeg iti kararag, umayto kenka ti amin a kita ti tattao.” (Salmo 65:2) Ngem kasano ti panagkararagtayo tapno denggen ken bendisionan ti Dios?

No agkararagka, mayebkasmo iti Dios dagiti linaon ti pusom​—ti pudpudno a rikriknam. (Salmo 62:8) Maay-ayo ti Mannakabalin-amin kadagiti naimpusuan a kararag.

Nupay adu ti titulo ti Dios, maymaysa laeng ti naganna. “Siak ni Jehova. Dayta ti naganko.” (Isaias 42:8) Nausar ti nagan a Jehova iti agarup 7,000 a daras iti Nasantuan a Kasuratan. Adu a propeta ti immawag iti Dios babaen ti naganna. Imbaga ni Abraham: ‘Pangngaasim, Jehova, palubosannak pay a makisao kenka.’ (Genesis 18:30) Masapul met nga usarentayo ti nagan ti Dios a Jehova no agkararagtayo.

Maawatan ti Dios dagiti pampanunot ken rikriknatayo aniaman ti lengguahetayo. Ipasigurado ti Saona: “Saan a mangidumduma ti Dios, no di ket awatenna ti tao iti tunggal nasion nga agbuteng kenkuana ken agaramid iti umiso.”​—Aramid 10:34, 35.

Ngem tapno bendisionannatayo ti Dios, adda pay ti masapul nga aramidentayo malaksid iti kararag. Maammuantayo dagita kadagiti sumaruno nga artikulo.