Ti empatia ket “ti abilidad a makipagrikna iti sabali babaen ti panangikabil iti bagi iti situasion ti maysa a tao.” Kuna ti eksperto iti salun-at ti isip a ni Dr. Rick Hanson a nayanaktayo nga addaan iti abilidad a mangipakita iti empatia.

PANUNOTEM: Apay a maipakitatayo ti empatia, kualidad nga awan iti dadduma a parsua? Ilawlawag ti Biblia a ti Dios pinarsuana ti tao a kaladladawanna. (Genesis 1:26) Gapu ta naaramidtayo a kaladladawan ti Dios, kaipapanan dayta a maiparangarangtayo ti personalidadna ken maipakitatayo dagiti nagsasayaat a kualidadna. Gapuna, no tulongan ti maysa ti sabali gapu iti empatia, maipakpakitana ti empatia ti naasi a Namarsua, ni Jehova a Dios.​—Proverbio 14:31.

Ipakpakitaannatayo ti Dios iti empatia ken dina kayat a makitanatayo nga agrigat ken agsagaba. Maipapan kadagiti Israelita idi un-unana, a nagan-anus iti naulpit a panangadipen ti Egipto ken sinaruno ti narigat nga 40 a tawen a kaaddada iti let-ang, kuna ti Biblia: “Iti amin a panagrigatda, naparigatan met.” (Isaias 63:9) Saan la a basta ammo ti Dios ti rigatda, nariknana pay dayta. Kinunana: “Ammok dagiti panagrigrigatda.” (Exodo 3:7) Kuna ti Dios: “Asinoman a mangsagid kadakayo, sagsagidenna ti alintatao ti matak.” (Zacarias 2:8) No adda mangpasakit kadatayo, masaktan met ti Dios.

Ipasigurado ti Biblia a nupay mabalin a makonkonsiensiatayo ken mariknatayo a ditay maikari iti empatia ti Dios, “dakdakkel ti Dios ngem ti pusotayo ken ammona ti amin a banag.” (1 Juan 3:19, 20) Ad-adda nga am-ammonatayo ti Dios ngem kadatayo a mismo. Ammona ti amin a pampanunoten, marikrikna, ken kasasaadtayo. Adda empatiana kadatayo.

 Ipasigurado kadatayo ti Kasuratan

• “Umawagkanto, ket sumungbat ni Jehova; agpatulongkanto, ket ibagana, ‘Adtoyak!’”​—ISAIAS 58:9.

• “‘Ta sigurado nga ammok ti pampanunotek para kadakayo,’ kuna ni Jehova, ‘ikkankayo iti talna, saan a didigra, tapno maaddaankayo iti nasayaat a masakbayan ken namnama. Umawagkayto ken agkararagkayto kaniak ket denggenkayto.’”​—JEREMIAS 29:11, 12.

• “Urnongem koma dagiti luluak iti lalat a pagkargaam. Saan aya a naisurat dagita iti librom?”​—SALMO 56:8.

No ammotayo nga adda empatia ti Dios kadatayo, makatulong kadi dayta tapno maibturantayo dagiti pakarigatan? Kitaentayo ti kapadasan ni Maria:

“Nagsaem idi ti riknak ken kasla awan ti hustisia idi natay ti 18 ti tawenna nga anakko kalpasan ti dua a tawen a pananglabanna iti kanser. Kagurak idi ni Jehova ta awan man la ti inaramidna ken dina pinaimbag!

“Kalpasan ti innem a tawen, maysa a gayyemko iti kongregasion ti siaayat ken siaasi a dimngeg kaniak idi impeksak ti riknak a dinak ay-ayaten ni Jehova. Kalpasan ti adu nga oras a dimdimngeg laeng, natignayak iti teksto a kinotarna, ti 1 Juan 3:19, 20 a kunana: ‘Dakdakkel ti Dios ngem ti pusotayo ken ammona ti amin a banag.’ Inlawlawagna a maawatan ni Jehova dagiti pakarigatantayo.

“Ngem narigatanak latta a nangikkat iti gurak! Kalpasanna, binasak ti Salmo 94:19 a kunana: ‘Idi immadu dagiti pakadanagak, liniwliwa ken pinaragsaknak.’ Kasla naisurat daytoy a teksto para kaniak! Idi agangay, mabang-aranakon no maipeksak ken Jehova ti pakarigatak ta ammok a dengdenggen ken maawatannak.”

Makaliwliwa a maammuan a maawatannatayo ti Dios ken makipagrikna kadatayo! Ngem apay a nakaad-adu ti agsagsagaba? Dusdusaennatayo kadi ti Dios gapu kadagiti dakes nga aramidtayo? Adda kadi aramidento ti Dios tapno agpatingga ti amin a panagsagaba? Masungbatan dagitoy a saludsod kadagiti sumaruno nga artikulo.