Kinuna ni Jesus: “Bumusorto ti nasion iti sabali a nasion ken ti pagarian iti sabali a pagarian. Addanto napipigsa a ginggined, ken bisin ken makapapatay a saksakit iti nadumaduma a lugar.” (Lucas 21:10, 11) No kasano a ti lamma ti ramay (fingerprint) ti pagilasinan iti kinasiasino ti maysa, amin dagitoy a pasamak ti mangbukel iti nalawag a pagilasinan nga “asidegen ti Pagarian ti Dios.” Aggigiddan kadin a mapaspasamak dagita iti intero a lubong? Kitaem dagiti ebidensia.

1. GUBAT

Idi 1914, bimtak ti kakaruan pay laeng a gubat! Masansan nga ibaga dagiti historiador a dakkel ti nagbaliwan ti historia idi 1914 ta bimtak ti kaunaan a sangalubongan a gubat. Dayta ti damo a pannakausar ti tangke, bomba nga itinnag dagiti eroplano, masinggan, makasabidong a gas, ken dadduma pay a makapapatay nga armas iti adu a lugar. Sinaruno dayta ti maikadua a sangalubongan a gubat a damo a nakausaran dagiti bomba atomika. Manipud idi 1914, adun a gubat ti napasamak iti agduduma a lugar a nakatayan ti minilion a tattao.

2. GINGGINED

Kada tawen, agarup 100 a napipigsa a ginggined ti mangmangyeg iti “nagkaro a pannakadadael,” kuna ti Britannica Academic. Inreport met ti United States Geological Survey a “maibatay kadagiti nabayagen a rekord (manipud idi agarup 1900), ekspektarentayo ti agarup 16 a napipigsa a ginggined iti kada tawen.” Patien ti dadduma a kasla laeng immadu ti ginggined ita gapu kadagiti nasaysayaat a pamay-an ti panangdetek. Ngem di mailibak nga ad-adu itan ti agrigrigat ken matmatay gapu iti napipigsa a ginggined.

 3. BISIN

Ti bisin ket kadawyan a resulta ti gubat, korapsion, panagsuek ti ekonomia, saan a nasayaat a pannakaasikaso ti agrikultura wenno kurang a panagsagana para iti dakes a paniempo. Kuna ti “2018 Year in Review” ti World Food Programme: “Iti intero a lubong, kurang ti taraon ti 821 a milion a tattao ket awanen ti makan ti 124 a milion kadakuada.” Kada tawen, agarup 3.1 a milion nga ubbing ti matmatay iti malnutrision. Kadagiti amin a natay nga ubbing idi 2011, agarup 45 a porsiento ti natay iti bisin.

4. SAKIT KEN EPIDEMIA

Kuna ti maysa a publikasion ti World Health Organization: “Timmaud dagiti nakaro nga epidemia bayat ti maika-21 a siglo. Nagsubli manen dagiti nabayagen a sakit a kas iti kolera, yellow fever, ken plague (makaakar unay a sakit a patauden ti bakteria). Limtaw met dagiti baro a sakit a kas iti SARS, trangkaso nga agwaras iti intero a lubong, MERS, Ebola ken Zika.” Ti COVID-19 pandemic ti kaudian. Uray adun ti ammo dagiti sientista ken doktor maipapan kadagiti sakit, awan pay ti naaramidda nga agas a makaikkat iti amin a sakit.

5. SANGALUBONGAN A TRABAHO A PANANGASABA

Impadto ni Jesus ti maysa pay a paset ti pagilasinan: “Ti naimbag a damag maipapan iti Pagarian maikaskasabanto iti intero a daga tapno maammuan ti amin a nasion; kalpasanna, umayton ti panungpalan.” (Mateo 24:14) Uray kumarkaro dagiti problema ditoy lubong, nasurok a walo a milion a tattao iti amin a nasion ti mangipakpakaammo iti naimbag a damag maipapan iti Pagarian ti Dios iti 240 a pagilian iti nasurok a 1,000 a lengguahe. Ita pay laeng a mapaspasamak dayta.

Mapaspasamak itan dagiti pagilasinan nga inted ni Jesus. Apay a paginteresantayo dayta? Gapu ta imbaga ni Jesus: “Inton makitayo a mapaspasamaken dagitoy a banag, masiguradoyo nga asidegen ti Pagarian ti Dios.”​—Lucas 21:31.

Makatulong ti pannakakitatayo iti pagilasinan nga inted ni Jesus ken ti kronolohia ti Biblia tapno maawatantayo nga impasdek ti Dios ti Pagarianna idiay langit idi 1914. a Iti dayta a tiempo nga intronona ti Anakna a ni Jesu-Kristo kas Ari. (Salmo 2:2, 4, 6-9) Dandanin agturay ti Pagarian ti Dios ditoy daga, ket ikkatennanto amin a gobierno ti tao ket pagbalinenna a paraiso ti daga a pagnaedan dagiti tattao iti agnanayon.

Asidegen a matungpal ti sasao iti pagtuladan a kararag nga insuro ni Jesus: “Umay koma ti Pagariam. Maaramid koma ti pagayatam ditoy daga, a kas sadi langit.” (Mateo 6:10) Ngem ania ti ar-aramiden ti Pagarian manipud iti pannakaipasdekna idi 1914? Ken ania ti manamnamatayo inton ti nailangitan a Pagarian ti mangiturayen iti amin a tao?