Iti aldaw ti kasarmo, nagsapataka. Dayta a serioso a kari ket tungpal-biag nga obligasion, maysa a determinasion nga agtalinaedka a matalek iti asawam ken solbarenyo ti aniaman a problema a dumteng.

Ngem iti panaglabas ti tawtawen, naapektaran ti nasayaat a relasionyo gapu kadagiti diyo pagkinnaawatan. Kas pay la kadi iti dati ti katibker ti determinasionmo wenno ti pannakariknam iti obligasion a mangtungpal iti karim?

Ti pannakarikna iti obligasion a mangtungpal iti karim ket saan nga isu ti problema, isu ketdi ti solusion. Adu ita ti negatibo ti kapanunotanna iti pannakarikna iti kasta nga obligasion. Ibilang dayta ti dadduma kas kawar a mangibalud kenka iti kamali a desision a naaramidam. Ngem ibilangmo koma dayta kas angkla a makatulong tapno agtalinaed a natalna ken natibker ti relasionyo. Kuna ti misis a ni Megan, “No agapakami ken lakayko, saan man la a sumrek iti panunotmi ti makisina ta mariknami nga adda obligasionmi a mangtungpal iti karimi.” * Uray no adda dagiti nakaro a problemayo, no kombinsidokayo nga awan mamagsina kadakayo, adda nabileg a rasonyo a mangsolusion iti problemayo.—Kitaem ti kahon a “ Determinado a Panangtungpal iti Karim iti Asawam.”

Konklusion: No adda problemayo nga agassawa, masapul a patibkerem itan ti determinasionmo a mangtungpal iti karim idi nagkasarkayo. Kasanom a maaramid dayta?

Kitaem no husto ti kapanunotam. “Tungpal-biag nga agassawa.” Ania ti mariknam kadagita a sasao? Kaslaka naibalud, wenno natalged ti riknam? No adda problema, ti pannakisina kadi ti kanayon a mapanunotmo a posible a solusion? Tapno mapatibkermo ti determinasionmo a mangtungpal iti karim, nagpateg nga ibilangmo ti panagasawa kas permanente a panagtipon.—Prinsipio ti Biblia: Mateo 19:6.

Panunotem ti epekto ti kapadasan dagiti nagannakmo. Mabalin nga adda epektona kenka ti nakitkitam iti nagannakmo. “Nagsina dagiti nagannakko idi ubingak pay,” kuna ti asawa a babai a ni Lea, “isu a madanaganak baka saanen a kasdiay kaserioso ti pangibilangak iti karik idi nagkasarak.” Manamnamam nga adda maaramidam tapno saanen a mapasamak iti panagasawam ti kamali dagiti nagannakmo.—Prinsipio ti Biblia: Galacia 6:4, 5.

Kitaem ti panagsasaom. No madama ti apayo iti asawam, liklikam nga ibaga dagiti makapasakit a sasao a pagbabawyamto met laeng, kas iti “Panawankan!” wenno, “Agsapulakon iti mas mangipateg kaniak!” Dagiti kasta a sasao pakapuyenna ti determinasionmo a mangtungpal iti sapatam. Imbes a masolbar ti problema, agresulta dayta iti panagbinnatoyo kadagiti makapainsulto a sasao. Ti mabalin ketdi nga ibagam ket kasla kastoy: “Madlaw a madi ti riknata a dua. Kasano ngata a makapagtinnulongta tapno masolusionan daytoy a problema?”—Prinsipio ti Biblia: Proverbio 12:18.

Ipakitam a talaga a kayatmo a tungpalen ti karim. Mangidispleyka iti retrato ti asawam iti lamisaanmo iti pagtrabahuam. Dagiti koma nasayaat a bambanag maipapan iti asawam ti iyestoriam. Ikagumaam nga inaldaw a tawagan ti asawam no adda adayo a napanam. No agsaoka, kanayon nga usarem ti “dakami,” “dakami ken baketko,” wenno “dakami ken lakayko.” No kasta ti aramidem, ipakpakitam iti sabsabali ken ipalpalagipmo iti bagim a determinadoka a mangtungpal iti sapatam iti asawam.

Mangkitaka iti nasayaat a modelo a tuladen. Kumitaka kadagiti agassawa a nagballigi a nangsango kadagiti problemada. Isaludsodmo kadakuada, “Ania ti naitulongna iti panagasawayo ti determinasionyo a mangtungpal iti sapatayo idi nagkasarkayo?” Kuna ti Biblia: “Babaen iti landok, ti met laeng landok mapatadem. Gapuna ti maysa a tao patademenna ti rupa ti sabali.” (Proverbio 27:17) Maitunos iti dayta a prinsipio, agpabalakadka koma kadagidiay nagporsegi tapno agballigi ti panagasawada.