ITI tengnga ti natikag a desierto kadagiti oras ti rabii, maysa a kita ti pusa a maawagan iti sand cat ti rummuar manipud iti rukibna sa sumardeng. Agpaliiw ken riknaenna ti aglawlaw. Kalpasanna, agar-arudok ken siuulimek a magna iti kadaratan.

Pagammuan ta tukmaanna ti di nakadlaw a biktimana—ti gerbil a maysa a kita ti utot. Kalpasanna, agtultuloy nga aganup iti agpatnag. Pasaray lumagto tapno ad-adu pay ti mabiktimana. No ad-adu ti maanupanna ngem iti kabaelanna a kanen, ti nabati ket gaburanna iti darat. Parbangonen no agsubli iti rukibna ken manmanon a rummuar iti agmalem. Usigem ti dadduma a makapainteres nga impormasion maipapan iti daytoy parsua a manmano a makita:

• Napigsa ti panagdengngegna isu a nalakana a mabirokan ti biktimaenna uray adda iti uneg ti darat wenno daga

• Tapno makabirok ti kalakian iti asawaenna, mangpataud iti nasinggit ken kasla taul nga uni. Napigsa ti panagdengngeg ti kabaian isu a maallingagna uray adayo

• Makatulong ti muldotan a dapanna tapno saan a lumumlom iti kadaratan ken proteksionna iti nakaro a kinapudot ti darat

•  Napuskol dagiti puraw a muldot iti uneg ti tunggal lapayagna tapno di mastrek dagiti mayangin a darat

• Narigat a tuntonen ta napuskol dagiti muldot ti dapanna isu a dandani awan madlaw a tugotna

• Agbiag babaen iti danum a maalana iti biktimana

• Umabut iti 80°C ti kapudot ti darat ti Kara-Kum Desert. No dadduma, makadanon iti -25°C ti kalamiis ti angin