Ti panangpakawan ket panangpalabas iti basol ken iti aniaman a sakit ti nakem nga impaayna. No mangpakawanka, dina kayat a sawen a tagtagibassitem ti di umiso nga aramid wenno kasla saan a napasamak dayta.

PRINSIPIO TI BIBLIA: “Itultuloyyo ti agiinnanus ken situtulok nga agpipinnakawan uray no adda pangibatayan ti maysa nga agreklamo maibusor iti sabali.”​—Colosas 3:13.

“No ay-ayatem ti maysa a tao, saan a dagiti kamalina ti kitkitaem no di ket ti panagreggetna nga agbalin a nasaysayaat.”​—Aaron.

No agipempenka iti sakit ti nakem, dangdangram ti bagim ken ti emosionmo, ken uray ti panagasawayo.

“Naminsan, nagpakawan ni lakayko ta nasaktanna unay ti riknak. Diak pinakawan a dagus. Idi agangay, pinakawanko met laeng, ngem nasapsapa koma nga inaramidko dayta. Naliklikanmi koma ti saan a nasayaat nga epekto dayta iti relasionmi.”​—Julia.

SUBOKEM TI BAGIM

No masaktanka manen iti mabalin nga ibaga wenno aramiden ti asawam, isaludsodmo iti bagim:

• ‘Arsagidak kadi unay?’

• ‘Nakaro kadi unay ti basolna ta kasapulan nga agpakawan, wenno palabsek lattan dayta?’

PAGSARITAANYO NGA AGASSAWA

• Kasano kapaut ti panagpinnakawanta?

• Ania ti mabalinta nga aramiden tapno naparpartak ti panagpinnakawanta?

TIP

• No nasaktanka, saanmo a panunoten nga inranta dayta ti asawam.

• Ikagumaam a tarusan ti asawam, ken laglagipem a “mamin-adu a maitibkoltayo amin.”​—Santiago 3:2.

“Alisto laeng ti agpinnakawan no basolyo a dua, ngem narigrigat ti mangpakawan no maysa laeng ti nakabasol. Agkasapulan iti kinapakumbaba ti panagpakawan ken panangpakawan.”​—Kimberly.

PRINSIPIO TI BIBLIA: “Alistuam ti makiareglo.”​—Mateo 5:25.