I paggafuan na fundu ta passuporta ta interu mundo nga trabahu mi ay ta boluntariu ira nga donasion na Saksi ira ni Jehova. a Awayya na nga maddona ta kahon ira para ta kontribusion ta madduruma nga lugar nga paddayarayawammi. Masingan gapa ta pahina nga Donasion i tanakuan paga ira nga opsion ta paddona. Tatun nga pahina, egga ira i opsion nga pappilian na tadday tapenu maddona para ta interu mundo nga trabahu mi, para ta lokal nga aktibidad mi, onu para tatun nga dua.

 Ari obligadu i Saksi ira ni Jehova nga iyawa i pakkafulu onu maddona tu espesipiko nga balor onu porsiento na kuartu da. (2 Corinto 9:7) Ari kami makkolekta onu mattuki ta study mi ira. Ari gapa nga mapagan i ministro mi ira nu egga i bawtismo, palappa ta natay, kasal, onu tanakuan paga ira nga okasion. Ari mi apan i fundu mi ta pallaku, pannegosio, pappa-bingo, perya, pappakan, raffle, onu tanakuan paga. Ari kami gapa mas-solicit tu donasion ira. Ari nga mekagi nu sinni ira i naddona. (Mateo 6:2-4) Awan gapa tu masingan nga advertisement ira ta website mi anna publikasiommi ira.

 Ta kada kongregasion na Saksi ira ni Jehova, ikagi da i vinulan nga finansial report ira ta study ira nga awayya atendeyan na maski sinni. Regular gapa nga ma-audit i accounting rekord ira na kada kongregasion tapenu masiguradu nga meyusa tu mapia i fundu ira.—2 Corinto 8:20, 21.

•   Kahon ira para ta kontribusion: Awayyam ipay i donasiommu nga cash onu tseke ta kahon ira para ta kontribusion nga egga ta Kingdom Hall, Assembly Hall, onu ta tanakuan paga nga lugar nga paddayarayawammi.

•   Online nga donasion: Ta aru nga nasion, awayyam usan i pahina nga “Maddona ta Saksi ira ni Jehova” tapenu makapaddona gukaban na credit card, debit card, bank transfer, anna tanakuan paga nga elektroniko nga metodo. b “Mangisina” gapa i karuan nga Saksi ira ni Jehova kada vulan gukaban na naka-iskediul nga donasion nga meyusa i maski anni tatun ira nga metodo.—1 Corinto 16:2.

•   Neplano nga Pangiyawa: Ta karuan nga metodo na paddona, kawagan i dati nga papplano anna/onu legal advice. Nu kuammu yaw nga papplano, awayya na nga mapakarianan i pagammu tu tax ta nasiommu. Aru i nabenefisiowan megafu ta mas ammu da ngana i meyannung ta pangiyawa tu donasion nga awayya da kuan durante nga matolay paga ira onu meyawa sonu natay ngana ira. Awayyam kontakan i lokal nga panga nga ofisina na Saksi ira ni Jehova para ta mas aru paga nga informasion nu kayà mu i maddona gukaban na:

  •   bank account

  •   insurance anna pension

  •   real estate

  •   stocks anna bonds

  •   will anna trust

 Para ta mas aru paga nga informasion ta metodo ira ta paddona nga available ta lugar nu, innan i pahina nga “Maddona ta Saksi ira ni Jehova.”