Maya pandemik, bala menyadi ngubah chara nginjil ngambika ulih bekunsika pesan Bup Kudus ti ngelantangka ati ngagai orang bukai. Ari ke nusui Berita Manah ba endur orang mayuh, tauka ari rumah ke rumah, sida mayuh agi bekunsika berita nya nengah talipun enggau surat. a Mayuh orang beterima kasih ke pengawa sida lalu berekat Jehovah terang dipeda. (Jaku-Dalam 16:3, 4) Peratika sekeda pengalaman ti meransang ari siti menua.

 Sebedau pandemik, Helen suah datai ngabas ngagai seiku indu lalu mai iya belajarka Bup Kudus. Tang indu nya seruran nulak iya. Taja pia, sehari sebedau lockdown berengkah, Helen meri iya Bup Kudus enggau bup ke betajuk Nama ulih Dipelajarka Kitai ari Bup Kudus? Maya lockdown, sekali agi Helen nguji mai iya belajarka Bup Kudus lalu nerangka sida ulih belajar nengah talipun. Kali tu, indu nya deka nerima. Indu nya amat rindu belajar lalu iya minta Helen ngajar iya ninting hari. Indu nya mega datai begempuru enggau tetap nengah talipun. Kelimpah ari nya, iya ukai semina ngena utai ke dipelajarka iya ari Bup Kudus ba pengidup, tang iya bekunsika utai nya enggau orang bukai.

 Bala Saksi ba siti eklisia nulis surat ngagai bala polis kena beterima kasihka pengawa sida. Bala polis tekenyit meda surat nya. Seiku pegawai polis madah ngagai Jefferson, seiku tuai gempuru, “Aku ngumbai Saksi-Saksi Jehovah nya enda rinduka polis.” Jefferson nerang ngagai iya, tu enda betul. Bala polis amat gaga nerima surat ti meransang lalu ngelekatka surat nya ba pintu penama bala polis. Seiku polis bukai madah: “Arapka surat tu ngasuh orang bukai bisi runding ti manah pasal kami.”

 Edna enggau Ednalyn nya pengerintis biasa. b Ketegal rumah sida nadai line internet, sida enda ulih enggau gempuru nengah konferen video. Nyadi sida betalipun ngagai seiku jiran ke ukai Saksi lalu nanya iya enti ulih ngena Wi-Fi iya lalu mayar ungkus internet ke dikena sida. Indu nya ngasuh sida ngena internet nya enggau pechuma. Lebuh Edna enggau Ednalyn mai iya datai ngagai gempuru, iya pan enggau. Indu nya, seiku ari anak iya, enggau dua iku uchu iya belajarka Bup Kudus lalu seruran datai gempuru.

 Bala menyadi ba dia mai jiran sida, orang ke sama kereja, enggau orang bukai ninga cheramah ke dikenataika nengah konferen video. Keterubah, Ellaine, ke gawa ba sepital ba endur nya, kakang ati mai orang ke sama gawa enggau iya. Iya ngumbai sekeda lutur bisi runding ti negatif pasal Saksi-Saksi Jehovah. Tang, iya nganjung mesej lalu mai bala lutur ba sepital nya. Ellaine kakang ati mai dua iku lutur—sepasang laki-bini. Taja pia, pengudah berunding pasal utai tu lalu besampi, iya nganjung mesej kena mai sida. Bini nya nyaut: “Nama deh, nuan ka aku nyadi Saksi-Saksi Jehovah?” Ellaine nerangka, gempuru nya ke semua orang ukai semina Saksi-Saksi Jehovah aja. Ba hari siti Ellaine tekenyit lebuh iya meda laki-bini nya tumu tama ngagai gempuru. Ku iya: “Sebedau gempuru abis, aku nerima siti mesej ari bini nya ke madah: ‘Tu keterubah kali aku enggau gempuru Saksi-Saksi Jehovah. Manah amat. Aku gaga ati. Terima kasih laban mai aku.’”

 Ellaine mai 20 iku lutur datai ngagai gempuru lalu gagit ati meda 16 iku ari sida datai. Baka ku rasul Paul, iya madah: “Aku gaga ati laban aku ‘diberi Petara pemerani nusui Berita Manah Petara’ ngagai orang ke sama gawa enggau aku.”—1 Tesalonika 2:2.

 Pandemik tu mai penusah ngagai semua orang. Tang bala menyadi kitai ba menua tu enggau menua bukai mengkang gaga ati lalu ngembuan runding ti positif seraya sida enggau naka ulih nulung sereta ngelantangka ati orang bukai.—Surat Kereja Rasul 20:35.