Kena 2005, siku indu ba India ke benama Sowbhagya udah lenyau laki iya. Sebedau laki iya nadai, laki iya meh alai seduai iya menyanak begantung. Tang diatu, enda senang alai Sowbhagya melanja diri sereta anak indu iya, Meghana ke beumur tiga taun.

 Iya ke teruk agi Sowbhagya enda dilayan enggau manah. Diri sebilik ngelayan seduai iya baka pengemis, lalu suah madahka seduai iya menyanak ngenusahka orang. Ketegal deka ngiga pengelantang, Sowbhagya berengkah ngagai gerija ba menua nya, tang orang ba dia ngemaruhka iya laban iya miskin. Sowbhagya pan berengkah ngiga kereja ngambika ulih ngidupka seduai iya menyanak. Tang, taja pan iya udah bebendar nguji, iya tetap enda bulih kereja.

 Ku Sowbhagya madah, “Aku udah putus asa, nyadi aku mutuska aku deka munuh diri. Tang aku nemu, enti aku mati, anak indu aku deka napi mayuh penanggul. Nya alai, aku ngaga pemutus deka madamka seput kedua-dua kami.” Ketegal berasai enda beguna sereta enda dikesayau, Sowbhagya pansut meli rachun.

 Seraya Sowbhagya pulai ke rumah ngena kerita api, siku ari Saksi-Saksi Jehovah ke benama Elizabeth mansang lalu berengkah berandau enggau iya. Sowbhagya madahka diri nadai kereja, udah nya enggau manah ati Elizabeth madahka diri ka nulung iya ngiga kereja. Elizabeth mega madah, iya benung nuju ngagai pemelajar Bup Kudus iya. Sowbhagya amat tekenyit, laban taja pan iya udah ngelawa mayuh macham gerija, tang iya enda kala ninga pasal orang belajarka Bup Kudus. Elizabeth ngelaluka Sowbhagya belajar mayuh agi pasal Bup Kudus.

 Lebuh Sowbhagya datai ba rumah, iya tetap berunding deka munuh diri. Tang, bisi siku kaban belayan udah mai Meghana raun, nya alai Sowbhagya nganti nyentukka anak indu iya pulai lalu neruska pelan iya.

 Seraya ke nganti, Sowbhagya ngelawa rumah Elizabeth. Elizabeth nyambut penatai iya enggau manah. Maya tu, Elizabeth nunjukka bup Nama Ulih Dipelajarka Kitai ari Bup Kudus? Udah nya seduai iya terus meda ngagai pelajar ke betajuk, “Kini Penunga Orang ke Udah Mati?” Pelajar tu narit ati iya, laban iya baru udah lenyau laki iya. Berengkah ari sehari nya, Sowbhagya ka belajarka Bup Kudus.

 Elizabeth mega mai Sowbhagya datai konvensyen ba minggu ke nangkanka nya, lalu iya pan ka enggau. Program konvensyen nya amat narit ati iya, nyentukka iya ka nyadi siku ari Saksi-Saksi Jehovah. Pengudah iya pulai enggau konvensyen nya, iya pan nerima kangau bulih kereja.

 Sowbhagya terus belajarka Bup Kudus. Diatu, ari ke deka madamka seput diri, iya bisi tuju pengidup. Iya dibaptisa, lalu udah nya anak indu iya Meghana, mega dibaptisa. Diatu, seduai iya sama nyadi pengerintis biasa, lalu Meghana nyadi penyalin sukarela ba opis penyalin di India.

 Sowbhagya enggau Meghana tentu amat beterima kasihka Elizabeth ke mansang ngagai Sowbhagya maya ba kerita api, ngayanka pemanah ati lalu madahka pasal pemendar! Seduai iya amat beterima kasih ngagai Jehovah. Ku Meghana madah, “Enti kami enda belajarka pemendar ba hari nya, kami lama udah mati. Diatu kami amat gaga ati. Aku enggau indai amat keran nganti maya kami ulih merap apai aku baru, ngajar iya pasal Jehovah, lalu madahka baka ni Jehovah udah nyelamatka nyawa kami.”