Kati pengirau pasal COVID-19 ngasuh nuan lelak? Enti au, ukai nuan aja ngasaika nya. Ba serata dunya, udah bebulan-bulan mensia patut nelebaka diri enggau chara pengidup ti baru, ketegal penyakit berampit tu. Dr. Hans Kluge, ari Gerempung Pengerai Entarabansa (WHO) ba Eropah madah, “Mayuh orang udah bebendar deka mutarka penyakit COVID-19 tu ari majak berampit. Tang nyau kelama, mayuh orang lelak sereta lemi semangat, bisi mega enda peduli agi, ketegal asil iya tetap enda manah. Sida majak lelak ketegal penyakit berampit tu.”

 Enti nuan pan berasai lelak ketegal penyakit berampit tu, anang meh lemi semengat. Ajar Bup Kudus udah nulung mayuh orang sepemanjai timpuh ti tusah tu. Nuan mega ulih ditulung.

•  Nama reti lelak enggau penyakit berampit?

•  Nama kebuah pengelelak ke baka tu ukai pekara ti mit?

•  Nama lalau Bup Kudus ke nulung nuan mutarka pengelelak ketegal penyakit berampit?

•  Ayat Bup Kudus ke ulih nulung

 Lelak enggau penyakit berampit ukai sebengkah penyakit. Tang, tu asai ke diasaika, kena ngambarka asai ati orang, laban chara pengidup sida berubah ketegal penyakit berampit. Lalu penyakit ke benung nyadi tu baka ke nadai ujung. Amat, tiap iku orang bebida. Tang, ba baruh tu bisi madahka sekeda utai ke diasaika orang ke lelak enggau penyakit berampit:

•   Lembau tauka nadai minat ngereja sebarang utai

•   Jadual makai enggau tinduk berubah

•   Jampat mangah

•   Stres enggau pengawa ke ulih digaga enggau manah sebedau tu

•   Tusah fokus

•   Jampat putus pengarap

 Lelak enggau penyakit berampit ulih ngemediska kitai sereta orang bukai. Enti kitai enda bejimat, kitai enda ngemeratka pengerai diri. Belubah-lubah, kitai engka enda peduli pasal COVID-19 agi, taja pan virus ke benung ngelekai nya ulih ngachau nyawa. Nambahka, kitai mega udah lelak enggau semua atur tauka tatak ke digaga. Nyadi, kitai engka deka bibas, taja pan nya ulih ngemedis diri empu sereta orang bukai.

 Ba maya ti tusah tu, mayuh orang ngasaika pengamat ayat tu: “Enti nuan lemi lebuh nuan dituntung penusah, reti iya nuan endang sigi amat lemi.” (Jaku Dalam 24:10) Dalam Bup Kudus, mayuh ayat Bup Kudus ke manah, nulung kitai napi penyakit berampit tu.

•   Jaga takah tang ukai putus kaul

   Ku Bup Kudus: “Pangan endang seruran ngayanka pengerindu.”—Jaku Dalam 17:17.

   Kebuah tu beguna: Kaul ti rapat ulih meransang. (1 Tesalonika 5:11) Enti kelalu kediri, nya ulih ngachau pengerai.—Jaku Dalam 18:1.

   Uji tu: Terus meh ngiga bala kaban nuan nengah video call, talipun, tauka email sereta mesej. Giga meh bala kaban nuan, lalu suahka agi nanya rita sida. Kita ulih bekunsika chara napi penekul sepemanjai timpuh penyakit berampit tu nyadi. Kereja utai ti manah ngagai bala kaban nuan. Nya ngasuh semua kita sama bela berasai nyamai.

•   Kena meh peluang ke bisi tu enggau manah

   Ku Bup Kudus: “[Kena] semua peluang kita enggau badas.”—Epesus 5:16.

   Kebuah tu beguna: Enti nuan ngena peluang ke bisi tu enggau manah, runding nuan positif agi, sereta kurang pengirau.—Luke 12:25.

   Uji tu: Ari ke betatika utai ti enda ulih dikereja, uji perundingka utai ke ulih dikereja nuan. Chunto iya, diatu nuan bisi agi awak ngereja hobi tauka pengawa bukai. Nuan mega ulih ngena awak tu begulai enggau diri sebilik.

•   Tetapka jadual lalu kereja

   Ku Bup Kudus: “Semua utai patut dikereja enggau menyana sereta meruan atur magang.”—1 Korint 14:40.

   Kebuah tu beguna: Mayuh orang ngasaika diri nyamai agi, sereta gaga enti bisi pengawa tauka jadual diri empu.

   Uji tu: Gaga meh jadual ti ngena enggau nuan ke diatu. Tetapka awak ngereja pengawa ba opis, kereja sekula, meresi rumah sereta pengawa kena negapka pengarap. Kereja mega pengawa manah ke bukai, baka begulai enggau diri sebilik, bejalai ba endur ke enda kelalu mayuh orang, sereta besukan. Enti ulih, suah agi meresa jadual nuan, ngambika nuan nemu ngaga ubah ke patut.

•   Nelebaka diri enggau gaya hari kemayaharitu

   Ku Bup Kudus: “Orang ke nemu berunding deka meda penusah datai, lalu belalai.”—Jaku Dalam 22:3.

   Kebuah tu beguna: Ba sekeda endur, gaya hari engka ngasuh nuan tusah bulih udara ti beresi sereta tampak mata panas, taja pan nya beguna ke pengerai tubuh sereta mental.

   Uji tu: Enti musin chelap deka datai, uji atur bilik besai tauka endur nuan gawa ulih tama penampak mata panas. Perundingka sekeda pengawa ke agi ulih digaga nuan ba luar rumah, taja pan maya musin chelap. Enti ulih, giga meh gari ti tebal ngambi nuan ulih tan enti ba endur ke chelap.

   Maya musin angat, mayuh orang deka pansut ari rumah. Nyadi, bejimat meh. Atur kini ke pejalai nuan, lalu pilih meh maya endur nya enda kelalu mayuh orang.

•   Titihka meh atur nyaga pengerai

   Ku Bup Kudus: “Orang ke beli deka arapka sebarang utai.”—Jaku Dalam 14:16.

   Kebuah tu beguna: COVID-19 ulih ngachau nyawa. Enti kitai enda bejimat, kitai ulih ngerampitka penyakit nya ngagai orang bukai.

   Uji tu: Suah meh meresa nama atur pengerai ba endur nuan, lalu tentuka nuan nitihka atur nya. Perundingka, nama empas pengawa nuan ngagai diri empu, diri sebilik sereta orang bukai.

•   Keringka kaul nuan enggau Petara

   Ku Bup Kudus: ‘Datai semak ngagai Petara, lalu Iya deka datai semak ngagai kita.’—James 4:8.

   Kebuah tu beguna: Petara ulih nulung nuan napi sebarang penguji.—Isaiah 41:13.

   Uji tu: Bacha meh Bup Kudus ninting hari. Nya meh chara ti keterubah ke pemadu manah.

 Uji giga Saksi-Saksi Jehovah, kena nemu chara sida ulih terus begempuru sepemanjai penyakit berampit tu nyadi. Engka bisi ari chara sida ulih dititihka nuan. Chunto iya, ba serata dunya, Saksi-Saksi Jehovah ngena video call maya begempuru, ngingatka pemati Jesus, sereta konvensyen.

 Isaiah 33:24: “Nadai orang ke diau dalam menua kitai deka mutap madahka diri sakit.”

 Reti: Petara besemaya, jemah ila nadai agi penyakit.