PENUSAH ATI KETEGAL DITINGGAL MATI UDAH DIPANSIK MAYUH ORANG BARU-BARU TU. Tang baka ke udah dipadah tadi, chara ti pemadu manah ari pakar suah iya sebaka enggau lalau ari Bup Kudus. Taja pia, Bup Kudus ukai semina ngembuan lalau ti ulih dikena barang maya. Tang Bup Kudus mega nyediaka penerang ti nadai ditemu ba bup bukai, ke ulih ngelantangka orang ke tusah ati.

• Orang ke mati dijamin enda merinsa

  “Orang ke mati nadai nemu utai,” ku Bup Kudus ba Pengajar 9:5. “Semua pelan sida lesap.” (Masmur 146:4) Bup Kudus nyemakaka pemati enggau orang ke tinduk jenak.—John 11:11.

• Berasai lantang ketegal pengarap ti tegap ngagai Petara ke bepengerindu

  Masmur 34:15 madahka, ‘Jehovah ngemataka orang ke lurus lalu mendingka sabak sida.’ * Madahka asai ati nengah sampi ukai semina nulung ngelantangka runding enggau emosi. Sampi nulung kitai bisi kaul ti rapat enggau Penempa kitai, ke bisi kuasa kena ngelantangka kitai.

• Nganti pengidup ti lantang jemah ila

  Gambarka maya orang mati diangkatka idup baru ba bumi! Bup Kudus suah nyebut pasal pekara tu. Baka ni gaya bumi maya nya? Petara “deka ngendas semua ai mata ari mata sida, lalu pemati nadai agi, nadai agi ngulit, nadai agi nyabak, nadai agi pedis, laban utai ti lama nyau nadai agi.”—Pemandang 21:3, 4.

Mayuh orang pechaya ngagai Jehovah, Petara ke disebut dalam Bup Kudus udah meri pengering ti besai kena napi penusah ati. Sida diajar, sida ulih betemu baru enggau orang ti dikesayau ke udah nadai. Ann, ke udah nadai laki ke enggau iya jadi pengelama 65 taun madahka, “Bup Kudus ngajar aku orang ke dikesayau ti udah mati enda merinsa, lalu Petara deka ngangkatka baru orang ke bisi dalam runding Iya. Aku mikirka pekara tu maya aku berasai lelengauka laki aku. Asil iya, aku ulih napi utai ti pemadu jai ke kala nuntung aku!”

Tiina, ke disebut sebedau tu madahka, “Kenyau ari pemati Timo, aku ngasaika sukung sereta bantu Jehovah ba maya ti tusah. Semaya Bup Kudus pasal pengangkat ari mati amat nyata ba aku, lalu nulung aku tan nyentukka maya aku ulih betemu enggau Timo baru.”

Semua jaku sida ngambarka asai ati bejuta iku orang ke andalka semaya Bup Kudus. Taja pan nuan ngasaika semaya tu baka ke mimpi, pansik meh pasal lalau enggau semaya Bup Kudus nya endang amat lalu ulih nyadika bukti. Nuan engka nemu, Bup Kudus meh ke meri bantu ti pemadu manah ngagai orang ke tusah ati.

Peda meh video ba laman web kami, jw.org/iba

 BAKA NI GAYA ORANG KE UDAH MATI?

DEKA NUAN NINGAKA BERITA MANAH?