Petara enda bepilih mata lalu deka meri berekat ngagai semua mensia.

Petara besemaya ngagai Abraham, “Aku deka . . . ngena nuan merekatka semua bansa.”—Pemungkal 12:3.

Utai ke dipelajarka kitai: Petara rinduka semua kitai, nya alai iya deka merekat semua ruang bilik, lelaki, indu enggau anak mit ke ngasika Iya.

Petara kasih sereta sinuka orang ke deka ngelala Iya.

Petara ti Pemadu Bekuasa meri nabi Moses penau ngereja pengawa ajih. Taja pia, enggau baruh ati Moses agi besampi: “Padahka pelan Nuan ngagai aku, ngambika aku ulih nemu Nuan enggau dalam agi lalu majak ngerinduka ati Nuan.” (Pemansut 33:13) Peminta Moses ngerinduka ati Petara. Nya kebuah Petara meri Moses mayuh agi penemu sereta ngasuh Moses ngelala Iya enggau dalam agi. Ngambika chunto Moses belajar, Petara “kasih sereta siru.”—Pemansut 34:6, 7.

Utai ke dipelajarka kitai: Petara merekat tiap iku kitai, enda ngira lelaki, indu tauka anak mit ti bebendar deka ngelala Iya enggau dalam agi. Nengah Bup Kudus, Petara madahka chara nyembah Iya. Iya mega madahka pengeran Iya deka ibuh lalu meri kitai berekat.

Kitai bulih berekat enti belajar pasal Jesus enggau pengawa ke dikereja iya.

Bup Kudus madahka pasal pengidup enggau utai ke diajar Jesus. Petara meri Jesus kuasa kena ngereja mayuh pengawa ajih, baka ngeraika orang ke buta, ke bengal enggau orang ke bisi penimpang. Indah iya ngidupka orang ti udah mati. Ari pengawa Jesus, tu nunjukka utai ti deka dikereja Petara jemah ila ngagai semua mensia. Jesus madahka baka ni kitai bulih berekat nya. Ku iya: ‘Tu pengidup ti meruan belama iya, ngambika sida ngelala Nuan, Petara ti bendar, enggau Jesus Kristus, ke dikirumka Nuan.’—John 17:3.

Jesus sinu, nelap sereta manah ati. Nya kebuah, lelaki tauka indu, tuai tauka biak, sama bela deka semak ngagai iya. Iya mai sida belajarka teladan iya, ngambika sida bulih pengering baru. (Matthew 11:29) Maya jeman Jesus mayuh orang indu dikemaruhka. Tang, Jesus ngintu orang indu enggau basa, siru sereta nelap.

Utai ke dipelajarka kitai: Jesus ngayanka pengerindu ti besai ngagai semua orang. Iya nyadika teladan ke kitai, pasal chara ngintu sereta begulai enggau pangan diri.

Ba Bup Kudus ngajar, ‘Kitai semina bisi siku aja Petara.’ (1 Korint 8:6) Jesus enggau baruh ati diasuh Petara madahka pesan Iya. Enggau terang Jesus madahka, Petara nya besai agi ari iya lalu Petara meh ke nganjung iya ngagai dunya.—John 11:41, 42; 14:28. *