MAYUH orang nemu cherita pasal Jesus ke diukum bunuh. Maya nya, bisi dua iku penjenayah sama dipantang enggau iya. (Mat. 27:35-38) Taja pia, sekeda orang enggai pechayaka cherita Bup Kudus pasal Jesus ke udah dikuburka enggau chara ti manah sereta bebasa.—Mrk. 15:42-46.

Sekeda pakar bup Injil enda pechaya orang ke diukum bunuh ba tiang ulih dikuburka enggau manah sereta basa. Tang sida pechaya orang Rome ba jeman nya ngintu bangkai penjenayah enggau chara ti bebida. Penulis majalah Smithsonian ke benama Ariel Sabar nerangka kebuah orang pechayaka utai tu. Iya nulis: “Ukum dipantang ba tiang semina ditujuka ngagai orang ke pemadu jai dalam masyarakat. Lalu sekeda pakar madah, nya nyelai enti orang Rome ngemendarka sida dikubur enggau chara ti bebasa.” Perintah Rome amat deka ngemaluka bala penjenayah tu. Nya alai, bangkai sida ditinggalka ba tiang ngambika diempa jelu babas. Udah nya, bangkai ke tinggal deka dibuai ngagai kubur.

Taja pia, utai ti ditemu arkeologi nunjukka utai ti bebida pasal sekeda orang Judah ke diukum bunuh. Ba taun 1968, tulang seiku lelaki ke diukum bunuh ba abad keterubah bisi ditemu. Tulang nya ditemu ba kubur orang Judah semak Jerusalem. Tulang nya ditepu dalam siti kutak endur tulang orang ke udah mati disimpan. Bisi siti tulang tumbit ti ditemu ke dipantang ngena paku lawang pemanjai 11.5 cm (4.5 inci) ba tiang kayu. Ariel madahka: “Tulang tumbit nya enggi seiku lelaki ke benama Yehochanan. Tulang iya nyadi bukti ke nunjukka utai ti ditulis ba bup Injil pasal Jesus ti udah dikuburka engka betul.” Ku Ariel nampung baru: “Tulang tumbit Yehochanan nunjukka orang ke dipantang ba tiang maya jeman Jesus ulih dikuburka nitihka chara orang Judah.”

Tulang tumbit Yehochanan ngasuh orang bisi mayuh macham runding pasal chara Jesus dipantang ba tiang. Taja pia, utai ke udah ditemu kitai nya, sekeda penjenayah tu dikuburka, ukai dibuai sengapa aja. Nya alai, cherita Bup Kudus pasal Jesus ke udah dikuburka enggau chara ti manah sereta dibasa ulih dipechaya. Lalu, bisi bukti ke nyukung utai ke dipadah Bup Kudus tu.

Ke penting agi, Jehovah udah madahka Jesus deka dikuburka begulai enggau orang ke kaya. Lalu nadai orang ulih nagang Jaku Petara dikeamatka.—Isa. 53:9; 55:11.