BA SITI pulau ti mit di Indonesia, ke dikumbai Sangir Besar, bisi tiga iku menyadi indu Kristian kitai. Beberapa taun ti udah, sida gawa ba tebing tasik. Orang ba pulau nya ngelala sida ketegal pengawa nginjil sida. Sida nulung orang meretika Bup Kudus. Ba maya nya mega, sida benung ngereja pengawa bukai.

Keterubah, sida bejalai dalam tasik, lalu ngiga batu ti besai. Udah nya, sida mai batu nya pulai ke tebing. Sekeda batu nya ngemesai bul bola sepak. Udah nya, sida duduk ba bangku kayu ti mit, lalu ngena tukul mechahka batu nya nyadi mit. Batu ke dipechah nya mit agi ari telu manuk. Pengudah nya, sida nyimpan batu ti mit nya dalam beledi plastik, lalu mai iya niki tangga ngagai endur alai sida diau. Sida ngisi batu nya dalam beg ti besai, lalu beg nya diengkah ba lori. Batu nya deka dikena ngaga jalai.

Siku ari sida betiga nya Hulda. Situasi iya ngemendarka iya ngena mayuh agi awak ngereja pengawa tu ari sida ke bukai. Kesuah iya, duit ke diulih iya deka dikena mayar utai ke diguna sida sebilik ninting hari. Tang diatu, iya deka ngena sekeda ari duit ke diulih iya meli utai bukai. Iya deka meli siti tablet ngambika ulih ngena aplikasi JW Library^®. Hulda nemu, video sereta utai bukai dalam aplikasi nya deka nulung iya ngemansangka agi pengawa nginjil iya, sereta nulung iya meretika agi Bup Kudus.

Pengelama sebulan setengah, Hulda gawa dua jam lebih agi ninting pagi, ngambika ulih mechahka batu kena ngisi siti lori ti mit. Pengujung iya, Hulda udah ngumpul duit ti chukup kena meli tablet.

Ku Hulda: “Aku berasai amat lelak sereta pedis isi ketegal kereja tu. Tang pengudah aku ulih meli tablet nya, semua pemedis aku lenyau magang. Tablet nya nulung aku ngemansangka pengawa nginjil aku, lalu aku senang agi nyediaka diri ke gempuru.” Iya mega madah tablet nya nulung iya lebuh pandemik berengkah laban maya nya semua pengawa raban gempuru dipejalaika nengah online. Kitai gaga ati enggau Hulda laban iya ulih nyapai juluk ati iya.