Sekeda pemeri berega laban diberi orang ke bekuasa tauka orang ke balat dipebasa kitai. Sekeda agi pemeri, taja pan enda entu berega, tang amat dikerinduka laban pemeri nya datai ari diri sebilik ti dikesayau tauka ari pangan ti tau dikearapka. Tu meh utai ke nyadi ba Jordan lebuh iya nerima pemeri ari Russell, ke disebut ba artikel sebedau tu. Baka ni utai nya sama enggau tebus ke diberi?

Kesatu, Bup Kudus madahka ‘Iya [Petara] udah ngirumka Anak Tunggal Iya ngagai dunya, ngambika kitai tau idup ulih iya.’ (1 John 4:​9) Tu ke ngasuh pemeri nya berega amat. Nadai orang ke bekuasa agi ari Petara. Ku seiku pemasmur Hebrew nulis pasal Petara: “Nuan siku aja ti TUHAN [Jehovah], Raja ti Pemadu Tinggi ke serata dunya.” (Masmur 83:18) Kitai enda layak nerima pemeri ke datai ari penuduk ti tinggi agi.

Kedua, Petara nya “Apai” kitai. (Isaiah 63:16) Nama kebuah? Iya meri kitai pengidup. Nambahka nya, Iya ngibun kitai baka apai ke ngibun bala anak iya. Ku Jehovah ngumbai nembiak Iya menya: “Israel, nuan endang anak ke balat dikesayauka Aku ke balat dikerinduka Aku . . . Ati Aku lelengauka nuan. Aku deka kasihka nuan.” (Jeremiah 31:20) Petara ngasaika utai ti sama ke bala penyembah Iya kemaya hari tu. Iya ukai semina Penempa kitai ti pemadu bekuasa, tang Iya mega Apai sereta Pangan ti ­taluk ke kitai. Enda ke tu ngasuh semua pemeri ari Iya berega amat?

Sekeda pemeri berega laban diberi ari pengerindu ti bendar, ukai ketegal patut meri. Orang ke meri pemeri enggau gerah jari enda ngarapka balas.

Petara meri Anak Iya ke kitai laban Iya rinduka kitai. Bup Kudus madahka: ‘Baka tu ku jalai pengerindu Petara udah dipandangka ngagai kitai: Iya udah ngirumka Anak Tunggal Iya ngagai dunya.’ Nama kebuah Iya ngereja tu? ‘Ngambika kitai tau idup ulih iya.’ (1 John 4:⁠9) Kati Petara patut ngereja nya? Enda! “Lebuh sida ditebus Jesus Kristus,” nya chara Petara mandangka “pengasih” Iya.​​—Rome 3:​24.

Nama kebuah pemeri nya mandangka “pengasih” Petara? Bup Kudus madahka: ‘Petara udah ngayanka pengerindu Iya ke kitai, iya nya lebuh kitai agi nyadi orang ke bedosa, Kristus mati ngarika kitai!’ (Rome 5:⁠8) Pengerindu ti enda berundingka diri meransang Petara nulung mensia ke lemi, nadai daya sereta bedosa. Kitai enda layak nerima pengerindu nya sereta enda ulih malas pengerindu Iya. Pemeri Iya endang mandangka pengerindu Iya ti pemadu besai dalam sejarah.

Sekeda pemeri berega laban ngambarka siti-siti utai besai ke dilengkaka orang ke meri. Lebuh orang sanggup ngelengkaka utai ti amat berega ba iya, lalu meri utai nya ngagai kitai, kitai amat beterima kasih ke pemeri nya.

Petara “meri Anak Tunggal Iya.” (John 3:​16) Iya tau enda ibuh meri orang ti dikesayauka Iya ngagai kitai. Jesus nya “Anak ke dikerinduka” Petara sereta ‘gamal Petara ti enda ulih dipeda.’ Bup Kudus madahka, Petara nempa Jesus dulu agi ari semua utai. Nya alai, pengelama bebiliun-biliun taun nya, Petara enggau Jesus bisi kaul ti rapat.​​—Kolosi 1:​13-​15.

Tang Jehovah “enda ngalau Anak Iya Empu.” (Rome 8:​32) Iya meri utai ti pemadu manah ngagai kitai. Nadai pemeri ti berega agi ari nya.

Sekeda pemeri berega laban amat diguna, indah ba maya ti patut begunaka iya. Ngambika chunto, nuan amat beterima kasih ngagai orang ke sanggup mayar ungkus berubat ti nyelamatka nyawa ke enda ulih dibayar nuan! Pemeri nya berega amat, enda pia?

“Semua mensia mati dibai Adam, nya alai semua mensia deka idup dibai Kristus.” (1 Korint 15:22) Ketegal semua kitai peturun Adam, nya kebuah kitai “mati,” enda ulih nyeliah ari penyakit enggau pemati, tauka enda ulih bebaik enggau Petara sereta dilepaska ari dosa. Lalu ketegal kitai mensia ke bedosa, kitai enda ulih ‘ngidupka’ diri empu tauka orang bukai. Bup Kudus madahka: ‘Kitai sigi enda ulih nebus diri empu. Kitai enda ulih mayar rega nyawa kitai ngagai Petara, laban bayar nyawa mensia kelalu besai. Utai ti dibayar kitai, sigi nadai kala chukup.’ (Masmur 49:​7, 8) Kitai amat begunaka tulung laban kitai enda ulih mayar rega tebus. Enti ditejuka, kitai nadai daya.

Ketegal pengerindu ti besai, Jehovah sanggup mayar ungkus “berubat” ti nyelamatka nyawa ke diguna kitai, ngambika nengah Jesus “semua mensia deka idup.” Baka ni tebus ulih ngemujurka tu? “Darah Anak Iya, Jesus, nuchi kitai ari semua dosa.” Amat, arapka darah Jesus muka  peluang ngambika dosa diampun sereta bulih pengidup ti meruan belama iya. (1 John 1:7; 5:​13) Lalu nama deka digaga tebus ngagai orang ti dikesayauka kitai ke udah mati? “Laban enti pemati datai ulih siku mensia, pengangkat ari mati mega datai ulih siku mensia [Jesus].”​​—1 Korint 15:21. *

Nadai pemeri ke kala datai ari penuduk ti tinggi agi tauka diperansang pengerindu ti besai baka genselan Jesus. Nadai orang kala meri kitai utai ti berega amat baka ke diberi Petara Jehovah. Lalu nadai pemeri bukai ke beguna agi ari tebus ke ngelepaska kitai ari dosa enggau pemati. Endang amat, nadai pemeri ke ulih telabanka rega tebus Jesus.