BA MENUA Babilon kelia, pakar arkeologi udah tetemuka bejuta iti batu bata ke dikena nirika menua nya. Nitihka pakar arkeologi Robert Koldewey, batu bata nya digaga dalam serumbung api ba luar kuta nya laban ba dia bisi tanah liat ti manah sereta mayuh babas ke ulih dikena nunu batu bata nya.

Pakar arkeologi mega udah tetemuka bukti ke nunjukka pegawai perintah Babilon ngena serumbung api nya ngereja utai ti jai. Paul-Alain Beaulieu nya siku profesor ba Universiti Toronto. Iya landik pasal sejarah sereta bansa jaku menua Asiria kelia. Ku iya madahka: “Sekeda sejarah Babilon nunjukka bala raja deka merintah ngambika orang ke enda ngasika sida tauka orang ke enda bebasaka bala petara orang Babilon, deka dibuai ngagai serumbung api lalu ditunu dia.” Ambika chunto, siti utai ke ditulis ari jeman Raja Nebukadnesar madahka: “Punaska sida, tunu sida, panggang sida, . . . ngagai serumbung api . . . asuh asap nya niki ke atas, tikauka sida dalam api nya ngambika sida mati.”

Tu ngingatka bala pemacha Bup Kudus pasal utai ke dipadah ba Daniel bagi 3. Ba dia, kitai macha pasal Raja Nebukadnesar ke ngaga siti engkeramba emas ti besai ba emperan Dura, iya nya begian luar kuta Babilon. Lebuh tiga iku nembiak Hebrew ke benama Sadrak, Mesak enggau Abednego enggai meremi ngagai engkeramba nya, Raja Nebukadnesar nyadi amat ringat. Iya ngasuh orang “masang api dalam serumbung nya tujuh kali angat agi ari selama,” lalu ‘nikauka tiga iku nembiak Hebrew ngagai serumbung api nya.’ Siku melikat ti bekuasa nyelamatka sida ari mati.—Dan. 3:1-6, 19-28.

Batu bata ke ditemu ba Babilon mega nunjukka Bup Kudus nya betul. Mayuh ari batu bata tu bisi rambai jaku atas sida ke muji raja. Siti ari rambai jaku nya madahka: “Nebukadnesar, Raja Babilon . . . Istana ke digaga aku, Raja ti Besai . . . Awakka peturun aku merintah dia belama iya.” Tu amat sebaka enggau rambai jaku ke ditemu ba Daniel 4:30. Dia Raja Nebukadnesar bejaku enggau ati ti sumbung: “Peda pemanah nengeri Babilon! Aku udah ngaga iya nyadi indu nengeri aku, kena aku ngayanka kuasa, pengering, mulia enggau penampak nama aku ti nyadi raja.”