DALAM Bup Kudus, bup Daniel bisi nyebut pasal Raja Belsasar. Tang betaun-taun orang ke mantah Bup Kudus enda arapka raja nya bisi. (Dan. 5:1) Sida ngumbai pia laban bala arkeologi nadai tetemuka bukti ke nunjukka raja nya bisi. Taja pia, pekara tu berubah ba taun 1854. Nama kebuah?

Ba taun nya, seiku pengari ari menua Britain ke benama J. G. Taylor meresa beberapa iti tembawai ba nengeri Ur kelia, di selatan Iraq. Lebuh dia, iya tetemuka utai ke baka silinder ke digaga ari tanah liat ba menara ti besai. Pemanjai tiap iti silinder nya kira 10 cm (4 inchi) lalu bisi urup ke dipasak ba silinder nya. Siti ari silinder nya ngundan sampi minta idup gayu ari raja Babilon ke benama Nabonidus enggau anak iya ke tuai, Belsasar. Ketegal tu, sida ke mantah Bup Kudus enggai enda pan, patut setuju enggau bukti ke nunjukka Raja Belsasar nya amat bisi.

Bup Kudus ukai semina madahka Belsasar amat bisi, tang mega madahka Belsasar nya raja. Taja pia, sida ke mantah Bup Kudus agi enda arap. Ambika chunto, seiku saintis ba abad ke-19 ke bansa English, William Talbot, bisi nulis pasal utai ti disebut sida ke mantah nya. Sida madahka: “Bel-sar-ussur [Belsasar] merintah sama maya enggau apai iya Nabonidus. Tang nadai bukti ke nunjukka tu amat.”

Taja pia, pekara nya udah diputarka lebuh tulis ba silinder ke bukai madahka Raja Nabonidus betaun-taun nadai ba Babilon. Sapa ke merintah menua nya lebuh iya nadai dia? Bup Encyclopaedia Britannica madahka: “Maya Nabonidus dibuai ngagai menua bukai, iya ngasuh Belsasar nyadi raja sereta kepala soldadu.” Nya alai, Belsasar merintah nyadi raja ba menua Babilon maya nya. Ketegal nya Alan Millard, seiku arkeologi ke mega pakar bansa jaku madahka iya setuju lebuh bup Daniel ngumbai Belsasar nya ‘raja.’

Endang amat, nembiak Petara amat arapka utai ti disebut ba bup Daniel laban ba sida bup nya ditulis nengah iring ari roh kudus Petara.—2 Tim. 3:16.