KATI mensia deka mengkang tetap ati ngagai Petara, enti sida balat diuji, lalu penetap ati sida nya baka ke nadai meri sida nama-nama penguntung, kelebih agi ba reta tengkira? Nya meh utai ke kala dipejuraika, lalu diatu deka disaut dalam cherita siku lelaki ke benama Jop.

Lebuh orang Israel agi ba Ejip, Jop, iya nya siku ari kaban belayan Abraham, diau ba siti endur ke dikumbai tanah Arab kemayaharitu. Ba serega, bala melikat benung bekumpul, lalu Sitan, iya nya siku melikat ke ngelaban Petara, mega bisi dia. Maya nya, Petara madahka asai ati diri pasal nembiak Iya ke tetap ati iya nya Jop. Petara amat andal iya deka mengkang tetap ati ngagai Iya. Indah, Jehovah madah nadai siku pan mensia bukai ke ngembuan penetap ati baka Jop. Tang Sitan nuduh Jop nyembah Petara ketegal Petara merekat sereta ngelindung iya. Sitan mega nuduh, enti semua utai ke dikembuan Jop nya dirampas, Jop tentu enggai nyembah Petara agi.

Petara ngemendarka Sitan ngerampas semua utai ke dikembuan Jop. Chunto iya, reta tengkira, nabanka nyawa bala anak Jop, sereta ngasuh Jop kena penyakit ti balat. Jop enda nemu, semua utai tu nyadi ketegal Sitan. Nya kebuah, iya amat enda nemu nama kebuah Petara nejuka iya napi semua penguji tu. Taja pia, Jop tetap enda nyumpah tauka ngutuk Petara.

Jop bisi tiga iku kaban ti pelesu datai ngabas iya. Sida nyebut mayuh jaku baka ke ditulis ba bup Jop. Sida mega nguji ngasuh Jop andal, Petara meh ke benung ngukum Jop ketegal dosa ke dikereja iya belalai. Sida mega ngumbai, Petara enda rindu sereta enda andalka penyembah Iya. Tang Jop enda nerima jaku pelesu sida. Enggau ati ti andal, Jop madahka diri deka terus ngetanka penetap ati diri ngagai Jehovah nyentukka ujung nyawa iya!

Tang Jop ngereja siti penyalah; iya kelalu deka ngetanka diri. Siku lelaki ke biak agi ti benama Elihu, udah ningaka semua randau sida. Elihu ngelalau Jop laban Jop enda ulih meda bukti Jehovah ke nyadi Pemerintah ti Pemadu Tinggi nya jauh penting agi ari ke ngetanka diri. Enggau tegas, Elihu mega ngelalau bala kaban Jop ke pelesu nya.

Udah nya, Jehovah ngemetulka runding Jop ti salah. Ari beratika utai ke digaga Petara ke ngalitka ati, Jehovah meransang Jop berundingka pengemit mensia enti dibandingka enggau pemesai kuasa Petara. Jop nerima lalau Petara enggau ati ti baruh. Ketegal Jehovah nya Petara ti “pengasih sereta penyayau ti besai,” Iya ngeraika penyakit Jop, ngelipat ganda ke reta tengkira Jop, sereta meri iya sepuluh iku anak. (James 5:11) Ketegal udah mujur ngetanka penetap ati ngagai Jehovah taja diuji, Jop ulih ngemuktika jaku tuduh Sitan nya bula, lalu mensia ulih mengkang tetap ati ngagai Jehovah taja diuji.

​—Diambi ari bup Jop.