Ukum pasal “mata balas mata” nya sebagi ari Ukum Petara ke diberi ngagai bansa Israel kelia nengah Moses, lalu Jesus mega kala nyebut pasal ukum tu maya iya meri Ajar ba Atas Bukit. (Matthew 5:38, King James Version; Pemansut 21:24, 25; Ulang Adat 19:21) Tuju ukum tu ngambi orang ke salah nerima ukum ti setipak enggau pengawa iya. a

 Ukum tu dikena maya bisi orang ngemediska orang bukai enggau sengaja. Ukum ke orang nya nitihka Adat Moses iya nya: “Patah tulang dibalas ngena patah tulang, mata balas mata, ngeli balas ngeli; pemedis ti dikereja iya ngagai orang, deka dikereja ngagai iya empu.”—Adat Lewi 24:20.

•  Nama tuju ukum “mata balas mata”?

•  Kati orang Kristian agi nitihka ukum “mata balas mata”?

•  Salah penemu pasal ukum “mata balas mata”

•  Jesus ngemetulka penemu ti salah

 Ukai reti iya ukum “mata balas mata” ngemendarka seseiku orang malas dendam. Tang, ukum tu nulung bala akim meri ukum ti setipak enggau penyalah ke dikereja orang ke salah, ngambika ukum nya enda kelalu berat tauka kelalu lempung.

 Ukum tu mega ulih nagang orang ari bisi ati deka ngemediska orang bukai enggau sengaja. Ukum Petara nerangka, “Udah nya baru semua orang bukai deka ninga pasal pekara nya lalu takut, lalu nadai agi orang berani ngereja utai ti jai baka nya ba bala kita.”—Ulang Adat 19:20.

 Enda. Orang Kristian enda nitihka ukum tu agi. Ukum tu sebagi ari Adat Moses ke udah enda dikena agi pengudah Jesus meri nyawa iya nyadika tebus.—Rome 10:4.

 Taja pia, ukum tu nulung kitai nemu runding Petara. Ngambika chunto, ukum tu nunjukka Petara amat beberatka pengelurus. (Masmur 89:14) Pia mega, ukum tu madahka pasal standard Petara ba pengelurus. Petara deka disiplin orang ke ngereja penyalah “enggau ati ti lurus.”—Jeremiah 30:11.

 Penemu ti salah: Ukum “mata balas mata” ngujungka dendam ti enda nemu abis.

 Fakta: Adat Moses madahka, “Anang malas, tauka begedika pangan nuan.” (Adat Lewi 19:18) Ukum Petara meransang orang pechaya ngagai Petara enggau atur ke udah ditetapka Iya kena ngetanka pengelurus, ukai malas dendam nitihka chara diri empu.—Ulang Adat 32:35.