Bup Kudus nadai madahka kemaya Jesus ada enggau nyemetak, baka ke diterangka ba rujukan tu:

•   “Haribulan pengada Kristus enda ditemu enggau silik.”—New Catholic Encyclopedia.

•   “Nadai orang nemu enggau nyemetak haribulan Kristus ada.”—Encyclopedia of Early Christianity.

 Taja pan Bup Kudus enda nyaut enggau nyemetak tanya tu tadi, ‘Kemaya Jesus ada?’ tang iya bisi madahka pasal dua iti utai ke nyadi sebedau enggau sepengudah iya ada, ti nunjukka iya ukai ada ba 25 Disember.

Ukai ba maya musin chelap a

1.   Pesan ngerejista diri. Enda lama sebedau Jesus ada, raja Rome ke benama Augustus “ngasuh semua orang ba serata dunya ngerejista nama diri.” Semua orang patut “mansang ngagai nengeri diri empu” kena ngerejista. Ba apai indai Jesus, seduai iya patut bejalai pengelama seminggu tauka lebih. (Luke 2:1-3) Raja Rome engka deka bala rayat ngerejista diri ketegal hal chukai sereta mejal sekeda orang nyadi soldadu, nyadi tentu bala rayat enda gaga ati enggau atur tu. Tang enti iya ngasuh sida ngerejista diri maya musin chelap, tentu sida lebih agi pedis ati enggau iya. Nyadi, tentu Augustus enggai ngasuh sida ngerejista maya musin chelap.

2.   Pendiau bala pengibun bedus. Maya nya, “bala pengibun bedus diau ba padang, ngibun raban bedus sida.” (Luke 2:8) Bup Daily Life in the Time of Jesus madahka raban bedus diau ba padang (iya nya, enda dikurung dalam kandang) berengkah ari “seminggu sebedau pengerami Paska [ujung bulan Mac]” nyentuk ngagai tengah bulan November. Bup nya nampung: “Sepemanjai musin chelap, bala bedus dikurung dalam kandang ke bisi atap kena ngelindung sida ari chelap. Ari fakta tu kitai nemu, haribulan alai Krismas diintu tentu enda betul, laban nya ba maya musin chelap, tang bup Injil madahka maya nya bala pengibun bedus diau ba padang.”

Ba pun musin ruruh b

 Kitai nemu Jesus mati kena hari pengerami Paska, 14 Nisan, 33 Masihi. (John 19:14-16) Tu maya musin bungai c. Kitai mega nemu iya ngereja pengawa nginjil pengelama tiga taun setengah, lalu iya berengkah enggau pengawa nya lebuh iya beumur kira-kira 30 taun. Tu nunjukka iya ada ba pun musin ruruh ba taun 2 Sebedau Masihi.—Luke 3:23.

 Nadai bukti ke nunjukka Jesus Kristus ada kena 25 Disember. Nyadi, nama kebuah Krismas diintu maya nya? Bup Encyclopædia Britannica madahka bala tuai gerija engka milih hari nya laban iya “sama enggau maya orang Rome ngintu ‘hari pengada mata hari.’” Nitihka bup The Encyclopedia Americana, mayuh pakar pechaya haribulan tu dipilih ngambika “orang ke megai pengarap lama nyamai agi nerima agama Kristian.”