Gambarka siti raban soldadu benung beratika lebak. Lalu, sida tepedaka siti utai ti narit ati: Dua iku lelaki orang Israel, benung bediri ba ujung lebak nya. Bala soldadu Pilistin alit ati laban sida ngumbai seduai tu enda ulih ngereja nama-nama. Orang Pilistin udah lama nekan orang Israel ke indah enda ulih ngaduka utai ari besi ke dikena sida betanam enti nadai tulung ari munsuh sida orang Pilistin. Nya kebuah soldadu Israel mega amat nadai senyata ti manah. Nambahka nya, tu semina dua iku lelaki! Enti seduai tu soldadu ke mai senyata pan, nama ulih digaga seduai? Orang Pilistin bejaku ngeleseka seduai: ‘Datai kitu! Kami deka ngajar seduai!’—1 Samuel 13:19-23; 14:11, 12.

 Ke amat iya, endang bisi utai ke deka diajar, tang orang Pilistin ke deka diajar. Dua iku orang Israel nya belanda meraka lebak lalu niki tebing lebak nya. Tebing nya amat renjan nyentukka seduai iya patut bepaut ba tebing ngambika ulih niki. Tang seduai enda ngetu-ngetu niki nyentuk ngagai seduai datai ba orang Pilistin nya! (1 Samuel 14:13) Soldadu Pilistin diatu ulih meda orang ke datai mansang nya. Iya enggau seiku agi orang ke sama nitih bebaika senyata. Tang kati amat seduai iya aja ke deka ngelaban siti raban soldadu? Kati iya gila?

 Iya ukai gila; iya seiku lelaki ke amat tegap ba pengarap. Nama iya Jonatan, lalu nembiak Kristian kemayaharitu ulih belajarka mayuh utai ari cherita iya. Taja pan kitai enda amat beperang, tang kitai ulih belajarka mayuh utai ari Jonatan pasal pemerani, penetap ati sereta runding ti enda berundingka diri empu ngambika kitai ulih ngemansangka pengarap ti bendar.—Isaiah 2:4; Matthew 26:51, 52.

 Kena nemu kebuah Jonatan mansang ngelaban raban soldadu Pilistin, kitai patut beratika sejarah pengidup iya. Jonatan anak tuai raja keterubah Israel, Saul. Lebuh Saul dichiri nyadi raja, Jonatan udah nyadi nembiak lelaki, engka beumur 20 taun tauka tuai agi. Jonatan engka ngembuan kaul ti manah enggau apai iya ke suah bekunsika pengasai ati enggau iya. Keterubah iya, Jonatan nemu apai iya ukai semina seiku lelaki ke tinggi, sigak, soldadu ti kering, tang, keberat agi, seiku lelaki ke ngembuan pengarap enggau pemaruh ati. Jonatan ulih meda kebuah Jehovah milih Saul nyadi raja. Indah nabi Samuel madahka, nadai orang bukai baka Saul ba menua nya!—1 Samuel 9:1, 2, 21; 10:20-24; 20:2.

 Jonatan tentu temegah ati ulih nitihka apai iya ngelaban munsuh nembiak Jehovah. Perang suba ukai baka perang diatu ke ngenuluka menua diri. Suba, Jehovah milih menua Israel kena ngarika iya, lalu orang Israel suah diserang menua ke nyembah petara ti pelesu. Orang Pilistin ke nyembah petara baka Dagon suah nekan tauka indah ngerusakka nembiak Jehovah.

 Ba Jonatan, beperang nya baka pengawa orang ke tetap ati ngagai Petara Jehovah. Lalu, Jehovah merekatka pengawa Jonatan. Enda lama pengudah Saul nyadi raja, iya ngasuh anak iya nguluka 1,000 iku soldadu. Jonatan nguluka sida ngelaban soldadu Pilistin ba Geba. Taja pan sida nadai mayuh senyata ti manah, Jonatan menang ba perang nya laban bisi tulung ari Jehovah. Ketegal nya, orang Pilistin ngempuruka mayuh agi soldadu. Mayuh ari bala soldadu Saul takut. Sekeda lari, ngelalaika diri, lalu sekeda indah beperang nanahka orang Pilistin! Tang pemerani Jonatan enda kala lemi.—1 Samuel 13:2-7; 14:21.

 Ba hari ke dipadah ba pun cherita tu, Jonatan ngaga pemutus mai seiku nembiak iya ke mai senyata, belalai mupuk ari dia. Lebuh seduai datai ngagai Mikmas, endur soldadu Pilistin nirika kem, Jonatan madahka pelan iya ngagai orang bujang ke sama enggau iya. Seduai deka ngayanka diri ngagai soldadu Pilistin ke bisi dia. Enti orang Pilistin nya nyakap seduai datai ngelaban, tu reti nya Jehovah meri tanda ke nunjukka Iya deka nulung nembiak Iya. Orang bujang nya setuju enggau jaku iya, engka iya diperansang enggau jaku Jonatan ke madahka: ‘Nadai utai ulih nagang Jehovah ngasuh tua menang, enda ngira pemimit tubuh kitai.’ (1 Samuel 14:6-10) Nama reti jaku iya?

 Jonatan endang ngelala Petara. Iya nemu, suba, Jehovah udah nulung nembiak iya ngalahka munsuh ke amat mayuh agi ari sida. Kadang-kadang, iya mega ulih ngena seiku orang aja kena mai pemenang. (Pengulu 3:31; 4:1-23; 16:23-30) Nya alai, Jonatan nemu, ukai senyata, pengering, tauka pemayuh tubuh ke ngasuh nembiak Petara menang; nya bepanggai ba pengarap sida. Ketegal pengarap, Jonatan ngawakka Jehovah nentuka sekalika Jonatan enggau orang bujang iya patut nyerang raban soldadu Pilistin. Iya milih siti tanda ke ulih nunjukka Jehovah setuju enggau pengawa iya. Lalu pengudah Jehovah madahka diri setuju, Jonatan enggau berani mansang beperang.

 Peratika dua iti utai ke bisi ba pengarap Jonatan. Keterubah, iya amat bebasa sereta rinduka Petara Jehovah. Iya nemu, Petara ti Bekuasa enda bepanggai ba pengering mensia kena ngereja peneka Iya, tang Jehovah gaga ati merekatka mensia ke tetap ati ti gawa ke Iya. (2 Bansa Israel 16:9) Kedua, Jonatan ngiga bukti ke nunjukka Jehovah setuju enggau pengawa iya sebedau iya ngereja pengawa nya. Kemayaharitu, kitai enda begigaka tanda ti nyelai ari Petara kena nentuka sekalika Iya setuju enggau pengawa kitai. Ketegal kitai bisi jaku Petara ba Bup Kudus, kitai bisi semua utai ke diguna kena nemu peneka Petara. (2 Timoti 3:16, 17) Kati kitai bebendar ngulihka jaku lalau ari Bup Kudus sebedau ngaga pemutus ti besai? Enti pia, baka Jonatan, kitai deka nunjukka diri ibuhka peneka Petara lebih agi ari peneka diri empu.

 Nya alai, dua iku lelaki nya, seiku soldadu enggau seiku orang bujang, mansang niki lebak nya lalu nyerang soldadu Pilistin. Lebuh soldadu Pilistin nyau sedar seduai benung deka nyerang, sida nganjung orang kena ngelaban seduai. Orang Pilistin ukai semina bisi mayuh agi soldadu, tang sida mega ba endur ti tinggi agi. Nya alai, ke amat iya, sida ulih munuh seduai enggau jampat. Tang Jonatan nyerang soldadu Pilistin seiku-seiku lalu ngalahka sida. Orang bujang ke nitihka iya ari belakang lalu munuh sida. Seduai enggau jampat munuh 20 iku soldadu! Lalu Jehovah ngereja siti agi utai. Bup Kudus madahka: “Semua orang Pilistin ti diau di menua pesisir nyau takut magang. Bala orang ke ngayau enggau bala soldadu ke bepalan ba kem nya nyau getar-getar takut. Tanah berenyang, lalu sida begau abis ati.”—1 Samuel 14:15.

 Ari jauh, Saul enggau bala soldadu iya meda penyarut ke nyadi entara orang Pilistin, sekeda indah belaban enggau pangan diri! (1 Samuel 14:16, 20) Orang Israel diatu nyadi berani lalu angkat ngelaban, engka ngambi senyata ari soldadu Pilistin ke udah dibunuh. Jehovah meri nembiak iya pemenang ti besai sehari nya. Lalu, Iya enda kala berubah. Enti kitai arapka Iya, baka Jonatan enggau orang bujang iya, kitai endang nadai kebuah deka ngesal ke pemutus ti udah digaga kitai.—Malaki 3:6; Rome 10:11.

 Pemenang ke diulih sida besai reti ba Jonatan. Tang ba Saul, nya enda laban Saul udah ngereja sekeda penyalah ti besai. Iya nunjukka diri enda ngasi lebuh iya ngenjuk piring ngagai Jehovah. Tu ukai pengawa ti patut digaga iya, tang patut digaga nabi ke udah dipilih Jehovah, Samuel, ke mega seiku orang Lewi. Lebuh Samuel datai, iya madah ngagai Saul pasal perintah iya ke enda ulih meruan ketegal enda ngasi. Lalu lebuh Saul nganjung soldadu iya beperang, iya mega meri siti pesan ke enda tentu manah: “Awakka orang ke makai sehari tu sebedau aku malas munsuh aku, tulah.”—1 Samuel 13:10-14; 14:24.

 Jaku Saul nunjukka iya benung berubah nyadi orang ke enda manah. Kati lelaki ke bepengarap, baruh ati, diatu udah berubah nyadi orang ke sumbung? Jehovah nadai kala ngasuh pesan ke enda manah nya diberi ngagai bala soldadu ke berani sereta bagas. Lalu, baka ni enggau jaku Saul ke madahka “sebedau aku malas munsuh aku”—kati Saul ngumbai perang semina pasal iya aja? Kati iya enda ingat pasal pengelurus Jehovah lalu semina berundingka pengingin diri ke deka malas, nyadi tebilang tauka mujur ba perang?

 Jonatan enda nemu pasal sumpah tulah ti enda manah ke digaga apai iya. Lebuh iya pulai ari beperang, iya lelak, lalu iya ngedarka tungkat ti dibai iya, ngachuk ba idang manyi, lalu makai ai manyi nya mimit. Iya lalu berasai kering. Pengudah nya, seiku ari orang iya madahka pasal sumpah apai iya ke nagang orang makai. Ku Jonatan nyaut: “Naka meh penyai utai ti dikereja apai ngagai bala kitai! Peda kita, aku berasai kering agi lebuh aku udah makai ai manyi nya mimit! Kada enda manah agi sehari tu, enti bala kitai makai bekal ti dirampas kitai ari orang Pilistin. Uji nuan ngira, tentu mayuh agi orang Pilistin ulih bunuh kitai!” (1 Samuel 14:25-30) Jaku iya endang amat. Jonatan anak ti taluk, tang iya enda sengapa taluk. Iya enda sengapa besetuju enggau sebarang utai ke dipadah tauka dikereja apai iya, lalu runding ke baka tu ngasuh iya dipebasa orang bukai.

 Maya Saul nemu Jonatan udah ngelanggar sumpah iya, Saul agi enggai ngumbai pesan ke diberi iya nya, pesan ti beli. Tang, iya indah ngumbai anak iya empu patut dibunuh! Jonatan enda bekelikuh tauka minta kasih. Peratika saut iya ke enda berundingka diri empu. Ku iya: “Aku sedia deka mati.” Taja pia, orang Israel semua bejaku: ‘Kati Jonatan ti udah menang ngarika orang Israel deka diukum bunuh? Enda patut! Kami besemaya dalam nama Jehovah ti idup, nadai selambar buk ari pala iya deka lenyau. Utai ti udah dikereja iya sehari tu udah dikereja iya ari tulung Petara.’ Nama penyadi? Saul ngalahka diri. Ayat Bup Kudus madahka: “Nya meh chara orang mayuh ngelepaska Jonatan ari ukum bunuh.”—1 Samuel 14:43-45.

 Jonatan ngembuan nama ti tampak ketegal pemerani, pengawa iya ti bagas, sereta ulah iya ti enda berundingka diri empu. Lebuh iya napi utai ti mar, nama iya ti tampak ke nulung iya. Kitai mega patut berunding pasal utai ke digaga kitai ngambika ngembuan nama ti tampak. Bup Kudus madahka, nama ti tampak, amat berega. (Pengajar 7:1) Baka Jonatan, enti kitai nyaga nama diri ngambika tampak ba Jehovah, nama kitai ti tampak tu tau nyadi utai ti berega.

 Taja pan Saul mayuh penyalah, Jonatan agi enggau taluk belaban nyadi soldadu Saul. Kitai semina ulih ngambarka aja pengasai Jonatan ke amat nesal lebuh meda apai iya majak sumbung sereta enda ngasi. Utai enda manah tu benung nyadi ba apai iya, lalu Jonatan enda ulih ngereja nama-nama kena nagang iya.

 Penanggul nya nyadi besai agi maya Jehovah ngasuh Saul mansang beperang ngelaban orang Amalek. Sida orang Amalek balat jai nyentuk ke maya jeman Moses, Jehovah madahka deka ngeluska semua orang Amalek. (Pemansut 17:14) Saul diasuh ngerusakka semua jelu tupi sida, sereta munuh raja sida, Agag. Saul menang ba perang nya, lalu Jonatan tentu bisi belaban sepiak apai iya baka selama. Tang Saul enggau terang nunjukka diri enggai ngasika Jehovah. Iya enda munuh Agag lalu nyimpan sekeda reta enggau jelu tupi ke diulih. Nabi Samuel madah ngagai Saul jaku ngakim ti penudi ari Jehovah: ‘Nuan udah nulak pesan Jehovah, nya alai diatu Iya udah nulak nuan nyadi raja.’—1 Samuel 15:2, 3, 9, 10, 23.

 Enda lama udah nya, Jehovah ngambi roh kudus iya ari Saul. Laban nadai berekat ari Jehovah, asai ati Saul nyadi charut, kadang-kadang iya balat ringat, mangah, indah takut. Nya baka roh ti jai udah nganti roh Petara ti manah. (1 Samuel 16:14; 18:10-12) Jonatan tentu tusah ati meda apai iya ke suba manah, tang diatu udah berubah! Taja pia, Jonatan tetap taluk ngereja pengawa ngagai Jehovah. Iya enggau naka ulih nyukung apai iya, indah bisi maya nya iya nyebut utai ti amat ngagai apai iya taja pan apai iya enggai ninga. Tang Jonatan nentuka diri terus betatika Jehovah ke nyadi Apai enggau Petara iya ti enda berubah.—1 Samuel 19:4, 5.

 Kati kala nuan meda seiku orang ke dikerinduka nuan, engka diri sebilik, berubah nyadi orang ke enda manah? Tu tau ngasuh pedis. Chunto Jonatan ngingatka kitai pasal utai ke ditulis seiku pemasmur: ‘Apai enggau indai aku nyangka deka ninggalka aku, tang Jehovah deka ngibun aku.’ (Masmur 27:10) Jehovah amat taluk. Iya deka nyadi Apai nuan ti pemadu manah, enda ngira utai ke digaga mensia ti enda sempurna ke ngasuh nuan asa.

 Jonatan engka nemu pasal Jehovah ke enggai Saul nyadi raja agi. Kati asai Jonatan? Kati iya bisi kala berunding pasal gaya lebuh iya nyadi raja ila? Kati iya bisi ngembuan juluk ati deka ngemetulka sekeda penyalah apai iya, lalu netapka siti teladan nyadi seiku raja ti taluk sereta ngasi? Kitai enda nemu utai ke diperundingka iya; kitai semina nemu, sekalika iya bisi ngadang utai nya tauka enda, utai nya sigi enda ulih nyadi. Kati tu reti nya, Jehovah udah ngelengkaka lelaki ti tetap ati tu? Enda, Iya ngena Jonatan nyadika siti ari teladan ti pemadu manah ba Bup Kudus pasal kaul entara kaban ti taluk. Kaul ke baka nya deka dipejuraika ba artikel pasal Jonatan ke nangkanka tu.