Orutu Orunane okambumba okaṱiṱi kOvakriste mbe yandja omuhunga kOvahongonone va Jehova mouparanga wouye. Owo ve tjita nao momiano vivari mbi:

•   Owo ve nomerizirira wokurongerisa omahongero okuza mOmbeibela okupitira momambo, ozombongarero zombongo, nozoskole zOvahongonone va Jehova.—Lukas 12:42.

•   Owo ve hongorera po otjiungura tjokuzuvarisa tjOvahongonone va Jehova, nu ve tya omuano ovimariva vyouharupu mu mavi ungurisiwa motjira tjetu.

 Meserewondo etenga ‘ovaapostele novatarere vombongo’ moJerusalem aave toora omikambo omisemba kombongo aihe yOvakriste. Orutu Orunane wina ru kongorera omuhunga mbwo. (Oviungura 15:2) Tjimuna ovarumendu ovaṱakame mbo, ouṋepo wOrutu Orunane kavanane votjira tjetu. Owo ve kongorera omuhunga okuza kOmbeibela, nu ve yakura kutja Jehova Mukuru wa zika Jesus Kristus otjOtjiuru tjombongo.—1 Ovakorinte 11:3; Ovaefese 5:23.

 Ouṋepo wOrutu Orunane ooKenneth Cook, Jr., Gage Fleegle, Samuel Herd, Geoffrey Jackson, Stephen Lett, Gerrit Lösch, Mark Sanderson, David Splane, na Jeffrey Winder. Owo ve karera pomberoo ohongora moWarwick tja New York, mo-U.S.A.

 Orutu Orunane rwa zikamisiwa mozokomiti hamboumwe nḓe hongorera po oviungura vyetu moviṋenge pekepeke. Okaṋepo akehe ke karera mu imwe yozokomiti nḓa poo kombanda yanao.

•   Okomiti yOvaworonganise: Ovarumendu ovakambure mbe karera mokomiti ndji, ve hongorera po oviṋa mbi mavi tjama noveta, omaumba, nondatumisire ndji tjitwa kOvahongonone va Jehova mena rongamburiro yawo, noviuṋe vyarwe mbi ṱuna kOvahongonone va Jehova.

•   Okomiti yOkuvatera Ouṋepo wEṱunḓu roBetel: Okomiti ndji i nomerizirira wokuhongorera po ozondyero nḓe notjiṋa nokuvatera ouṋepo weṱunḓu roBetel.

•   Okomiti yOmapitisiro: Okomiti ndji hongorera po omapirindiro nomahindiro womambo nga zikamena kOmbeibela, owo wina ve hongorera po oviungura vyokutunga, omatuwo womerikotameneno, ozomberoo zomatorokero, notutavi twozomberoo.

•   Okomiti yOviungura vyOmbongo: Okomiti ndji i hongorera po oviungura vyetu vyokuzuvarisa “ombuze Ombwa yOuhona.”—Mateus 24:14.

•   Okomiti Ohonge: Okomiti ndji i rongerisa omirari mbi yandjwa pozombongarero zombongo, pozoskole zOuhona, nozoprograma zomakamburiro wovipuratenwa nouvidio.

•   Okomiti Otjange: Okomiti ndji i rongerisa omirari mbi yandjwa momambo nga pirindwa nomambo nge ri korungovi rwetu, nokuhongorera po otjiungura tjomatorokero.

 Pendje noviungura mbi ve ungura mozokomiti nḓa, Orutu Orunane ru hakaena otjivike atjihe okutara kovihepwa vyotjira. Pombongarero ndji, ouṋepo wOrutu Orunane u tara kOmatjangwa kutja maye tja vi, nokuyandjera ombepo ondjapuke okuvehongorera po kutja ve kare nomutima umwe.—Oviungura 15:25.

 Imba ovarumendu Ovakriste ovaṱakame mbe vatera ozokomiti zOrutu Orunane. (1 Ovakorinte 4:2) Owo ve ungurisa ondjiviro yawo okuvatera ozokomiti zOrutu Orunane. Auhe wawo wa pewa otjiungura okuungura pu nokomiti nu otjivike atjihe ve kara pombongarero ndji. Owo kave toora omikambo, posi ya ve yandja ondunge ndji vatera kutja omikambo mbyo vi ungurisiwe nu aruhe ve kongorera omikambo mbyo. Owo wina ve hindwa i yOrutu Orunane okukavarura ovakambure ovakwao mouye auhe, poo okukayandja omahungi povitjitwa, tjimuna ombongarero ndji tjitwa rumwe mombura, nOskole ya Gilead.