Otja Ovahongonone va Jehova tu tunga omaṱunḓu, wetu oveni na inga wovandu varwe. Eṱe tu yandja ondengero kOmuute ngwa uta omaṱunḓu. (Genesis 2:21-24; Ovaefese 3:14, 15) Mombeibela eye u honga omirari mbi vatera ovandu mouye auhe kokutja ve kare notukupo otusemba notuṋingandu.

 Eṱe tu kondja pu matu yenene okuṱakamisa omarakiza wOmbeibela, mena rokutja yetu vatera okurira ovarumendu, ovakazendu, novanene ovasemba. (Omiano 31:10-31; Ovaefese 5:22–6:4; 1 Timoteus 5:8) Ounongo mbuza mOmbeibela wina u vatera ouṋepo womaṱunḓu mbu ri kozongamburiro pekepeke kutja ve kare nonḓoneno. (1 Petrus 3:1, 2) Tara kovihorera vyovandu mbe he ri Ovahongonone va Jehova nu mba kupasana kunomundu ngwa karira Omuhongonone wa Jehova:

•   “Ozombura zetu ozondenga hamboumwe za ri noviposa nomaputi. Ivete tja za nokurira Omuhongonone wa Jehova, eye wa uta okukara norusuvero nomuretima. Omarundurukiro nga tjita ngo tjiri ya vatera orukupo rwetu.”—Clauir, ngwaza koBrazil.

•   “Ami ee pirukire omurumendu wandje Chansa indu tja uta okurihonga Ombeibela ku nOvahongonone va Jehova, mena rokutja ee munu kutja owo ve haṋa omaṱunḓu. Korusenina, mba kamuna kutja Ombeibela ya vatere orukupo rwetu.”—Agness, ngwaza koZambia.

 Tji matu zuvarisa tu raisira ovandu kutja okuungurisa ounongo mbu ri mOmbeibela mau ve vatere

•   Okutoorora epanga romorukupo nounongo

•   Okutuurunga ombura ondenga morukupo

•   Okutjinda ouzeu wovakwe

•   Okuṱiza otjimariva

•   Okuisa oviposa

•   Okurihonga okuisira

•   Okuhonga ovanatje

 Otjiperi kutja, povikando tjiva pe kara nao. Otjotjihorera, ondjivisiro yombura 1998 ndja za konganda ongonḓonone indji o Sofres ya muna kutja orukupo 1 motukupo 20 tji munomundu umwe ngwe ritanaura okurira Omuhongonone wa Jehova mu kara ouzeu ounene.

 Jesus wa hunganeka kutja imba mbe kongorera omahongero we mave munu ouzeu okuza komaṱunḓu wawo oveni. (Mateus 10:32-36) Omunamakuruhingi Will Durant wa tja kehi yOuhonapare wa Roman, “Oukriste aa u varwa otja mbu haṋa omaṱunḓu,” a nu Ovahongonone va Jehova tjiva ve muna omatokero otjingewo ndino. Hapo ihi matji hee kutja Ovahongonone va Jehova ve eta ohaṋi?

 WIndu tji pa ri otjiposa tjokutja Ovahongonone va Jehova ve haṋa omaṱunḓu Otjombanguriro tja Europa ohunga nousemba wovandu tja tja, omaṱunḓu mu muna ouṋepo mbu he ri Ovahongonone va Jehova mu kara otjindandi indu tji mave panḓa “okuyakura nokuraisa ondengero kousemba wokutja umwe meṱunḓu ma kare nouyara wokukara nongamburiro ye omuini.” Otjombanguriro wina tja tja: “Ongaro ndjo i munuka motukupo atuhe mu mu nozongamburiro nḓa haṋika, na i twi twOvahongonone va Jehova.” b Kutja tu ṱunwa i youzeu mbu ri pokati kozongamburiro, Ovahongonone va Jehova ve kondja okuṱakamisa erakiza rOmbeibela ndi: “Amu yarura ouvi mouvi. . . . Tji mape sorwa, kareye nohange novandu avehe.”—Ovaroma 12:17, 18.

 Ovahongonone va Jehova ve ṱakamisa erakiza rokukupasana ‘moukriste,’ pu mape hee kutja ve sokukupasana ku nomundu ngu ve nongamburiro imwe. (1 Ovakorinte 7:39) Erakiza ndi ra za mOmbeibela nu rivatera. Otjotjihorera, orupa ndwa pitisiwa mombura ndji 2010 mo Journal of Marriage and Family rwa tja “ovakupasane tji ve ri kongamburiro imwe, tji ve nozongaro zemwe nu tji ve kambura moviṋa vimwe” potuingi owo ve kara noupanga ouwa kumwe. c

 Posi yokutja, Ovahononone va Jehova kave tunduuza imba mbe ri kongamburiro yawo okuhaṋika ku nomundu ngu vakupasana ngu he ri Omuhongonone wa Jehova. Ombeibela i tja: “Omurumendu omukriste tja kupu omukazendu ngu he ri omukriste, nomukazendu ngwi a itavere okukara puna ye, indino ingwi omurumendu ke nokusokuisa omukazendu we. Nomukazendu omukriste tja kupwa i omurumendu ngu he ri omukriste, nomurumendu ngwi a itavere okukara puna ye, indino ingwi omukazendu ke nokusokuhaṋika nomurumendu we.” (1 Ovakorinte 7:12, 13) Ovahongonone va Jehova ve ṱakamisa erakiza ndo.