OMBEIBELA I RUNDURURA OMIINYO VYOVANDU

Ku ami, Mukuru kaa ri ko

Nda serekarerwa i Andreas Golec

OMBURA MA KWATWA: 1974

EHI KAZA: OGERMAN DEMOCRATIC REPUBLIC

EKURUHUNGI: KA KAMBURA MU MUKURU

EKURUHUNGI RANDJE

Ami mba kwaterwa mokarongo ka Saxony kaake tjiukwa otja German Democratic Republic (ousupi oGDR). Ponganda pu mbe kurira pa ri ongaro ombwa nu yorusuvero, nu ovanene vandje ve ndji hongere ongaro ombwa yomeritjindiro. OGDR ya ri kehi youhonapare woKomunesa, kunao ovandu ovengi moSaxony okukara nongamburiro mu Mukuru kaya ri otjiṋa otjinanḓengu. Nu ami ee munu kutja Mukuru ke ko, oure wozombura 18 zomuinyo wandje ee ripura nohoromende yoKomunesa nokukambura kutja Mukuru ke ko.

Ongwaye tjee nanukirwa i ohoromende yoKomunesa? Orondu ee tjaterwa i oumune wokutja ovandu avehe ve ṱeki pamwe. Kombanda yanao, ee kambura kutja omauini maye sokuhaṋewa pu pe ṱeki, ihi ma tjiti kutja ape ha kara ovatumbe novasyona. Kunao, ee ungura oukukutu motjira tjomitanda tjohoromende yoKomunesa. Tji mba ri nozombura 14, ee ungura ozoiri ozengi moviungura vyotjiwaṋa vyokuwonga ozombapira kokutja zeka yenene okuungura ozombapira zarwe. Otjihuro tja Aue aatji tjaterwa tjinene i ozongondjero zandje, mena ranao ouhonapare we ndji pa ondjambi. Nandarire kutja mba ri omuṱiṱi mba yenena okutjiwa ovanane tjiva wopolotika yoGDR. Ami ee munu kutja mba toora omukambo mbu ri wo nu oruyaveze rwandje rwa ri oruwa tjinene.

Okuzambo pa tjitwa otjiṋa tji tje ndji wisa momuinyo. Mombura ndji 1989 omira ya Berlin ya wira pehi, nu omananeno yoKomunesa yoEastern Europa ya isapewa. Otjiṋa tjarwe tji tje ndji temisa ya ri okutjiwa kutja mwa ri ouhasemba moGDR. Otjotjihorera ovandu mbe hina aave yandja oruvara kohoromende yoKomunesa aave tjindwa nonḓengu yokehi. Nu ee ripura kutja, pe ya vi otjiṋa hi tji tjitwe? Hapo ohoromende yoKomunesa kai kambura kutja ovandu avehe ve ṱeki pamwe? Hapo ohoromende yoKomunesa ya ri ovizeze uriri? Ami tjiri mba ri nomerikendero tjinene.

Kunao, mba uta okuyandja ombango komisiki nokuperenda. Indu tji mba uta okurihonga poskole yomisiki mba ri nondando yokuyenda komahongero wokombanda okukarira omuimbure womisiki. Nu mba nakaura ongaro ombwa yomeritjindiro ndji mbe rihongere tji mba ri omuṱiṱi. Nambano otjiṋa tji tja ri otjiṋandengu ku ami ya ri okurya omuinyo nokukara novakazendu pekepeke. Nandarire kutja ee imbura omisiki nokuperenda ngunda mba ri nomerikendero. Nu oviperendero mbye perende aavi raisa ondira ndji mba ri na yo. Ee ripura kutja, Hapo moruyaveze mamu katjitwa tjike? Nokutja ondando yokuhupa oyatjike?

Indu tji mba kamuna omaziriro ngee paha, oyo ye ndji temisire tjinene. Ongurova imwe poskole, aatu hungire ohunga noruyaveze. Mandy wa ri omuhongwa nu wina wa ri omuhongonone wa Jehova. Ongurova ndjo eye we ndji pa ondunge ombwa. Eye wa tja: “Andreas tji mo vanga omaziriro komapuriro woye ohunga nehupo noruyaveze, kakonḓonone nawa mOmbeibela.”

Hi mba ri nongamburiro momambo we ngo, posiya mba tya okukatara omaziriro mOmbeibela. Mandy we ndji raera kutja hi kalese etjangwa ra Daniel ekondwa 2, nu oviṋa mbi mba lesa mo vye ndji temisire. Nu omaprofetero nga aaye hungire ohunga nongongorasaneno yomauhonapare omanamasa wouye nga kozohoromende zoruveze rwetu. Mandy we ndji raisira omaprofetero warwe wOmbeibela ohunga noruyaveze rwetu, nu mba uta okumuna omaziriro komapuriro wandje! Nu ee ripura omapuriro nga, hapo ouṋe ngwa tjanga omaprofetero nga? Ouṋe ngwa hunganeka oruyaveze mondja? Hapo mape ya tjiri Mukuru okeri?

OMUANO OMBEIBELA MU YA RUNDURURA OMUINYO WANDJE

Mandy we ndji yandja kovakupasane ooHorst na Angelika Ovahongonone va Jehova, mbe ndji vatera okuzuva Ombeibela nawa. Ami mba hakahana okumuna kutja Ovahongonone va Jehova ootjira atji yerike tji tji yandja ombango kena ra Mukuru, Jehova. (Epsalme 83:19, EEP; Mateus 6:9) Mbe ri honga kutja Jehova Mukuru wa kwizikira ovandu okukahupa nga aruhe moparadisa kombanda yehi. Epsalme 37:9 mari tja: “Imba mbe undja ku Muhona mave rumatisiwa ehi.” Ihi tje ndji raisira kutja omaundjiro nga oyovandu avehe mbe vanga okuhupa otja komirari vya Mukuru mbi ri mOmbeibela.

Ya ri ouzeu ku ami okurundurura ongaro yandje kutja i hitasane nomirari vyOmbeibela. Ami mba ri nomeritongamisiro orondu mba ri nondoṋeno motjitamba tjomizumbi. Kunao, ee hepa okurihonga okurira omurisusuparise. Nu wina, kaya ri oupupu ku ami okuisa ongaro yomeritjindiro ombi. Nu mbi nondangi ku Jehova kokutja u raisa omuretima, otjari nokupuratena ku imba mbe kondja okuṱakamisa imbi Ombeibela mbi honga!

Ohoromende yoKomunesa nongamburiro yokutja Mukuru ke ko vye ndji hindire oure wozombura 18. Posiya Ombeibela nai i rundurura ehupo randje eyuva arihe. Imbi mbi mbe rihonga vya isa po omerikendero wandje ohunga noruyaveze, nu vye ndji pa ondando yokuhupa. Ami mba papitisiwa mombura ndji 1993 otjOmuhongonone wa Jehova, mo-2000 mba kupa Tabitha omukambure omukwetu omupyuke. Tu ungurisa oruveze rwetu otja pu matu yenene okuvatera varwe okurihonga ohunga nOmbeibela. Nu mbi hakaena kuna ovandu ovengi mba ri tjimuna ami, mbe kambura mohoromende yoKomunesa nu mbe ha kambura mu Mukuru. Mbi tjaterwa tjinene indu tji mbe ve raere kutja omomuano uṋe mu mave yenene okutjiwa Jehova.

OMUANO MU MBA MUNA OUWA

Indu tji mba uta okukara puna Ovahongonone va Jehova, ovanene vandje va urumine tjinene. Posiya owo va kauta okumuna kutja okukara puna Ovahongonone va Jehova kwa eta ouwa mehupo randje. Nai ovanene vandje ve lesa Ombeibela nokuyenda kozombongarero zombongo zOvahongonone va Jehova, notjiṋa hi tji ndji pa ondjoroka tjinene.

Ami na Tabitha tu nondjoroka morukupo rwetu mena rokutja tu kondja okuṱakamisa omirari vyOmbeibela ohunga norukupo. Otjotjihorera okuṱakamisa eronga rokurira omuṱakame komukweṋu ngu mwa kupasana tji tu pa omasa okukayenda komurungu morukupo rwetu.—Ovaheberi 13:4.

Nai hi nomerikendero ohunga nehupo noruyaveze. Nu mbi ri muna otja umwe weṱunḓu rovakambure mouye auhe mbe yorokera ohange yatjiri nombwaneno. Meṱunḓu ndi tu tjindasana otjovandu mbe ṱeki pamwe. Ihi ya ri otjiṋa tjee kambura mo, nu tjee vanga okuyenenisa mehupo randje.

[Omambo wokehi]

Ena ra rundururwa.

 [Picture]

Mbi ri puna omukazendu wandje Tabitha motjiungura tjokuzuvarisa.

​​​​​​​​