Hapo Mukuru u zuvira ozongumbiro zetu?
Hapo ove wa rora okuripura kutja Mukuru u ku zuvira tji mo kumbu? Indu tji u ripura nao, tjiwa kutja ka ove erike. Ovandu ovengi ve kumba ku Mukuru ohunga nomauzeu wawo, posi yokutja omauzeu ngo kaye zapo. Hapo iho matji hee kutja Mukuru ka puratene kozongumbiro zetu po? Kako. Ombeibela i tu tunduuza kutja Mukuru u puratena kweṱe indu tji matu kumbu otja kombango ye. Ngatu tare ku imbi Ombeibela mbi i hungira.
MUKURU U PURATENA.
“Ove ngu u zuvira ozongumbiro. Ovandu koṋa akuhe mave ya kOve.”—Epsalme 65:2.
Ovandu tjiva ve kumba mena rokutja tji tjita kutja ave he rikende tjinene, nandarire kutja ve muna kutja kape nomundu ngu ma puratene. Posi yokutja, ongumbiro katjiṋa tji tu tjita uriri kutja atu he rikende tjinene ohunga nomauzeu wetu. Ombeibela i tu huhumiṋa kutja, “Jehova * u ri popezu na avehe, mbe isana ku je;: na avehe, mbe isana ku je mouatjiri. . . . NEje ma zuu ondjuriro jauo.”—Epsalme 145:18, 19, EEP.
Kunao, matu yenene okukara nongamburiro kutja Jehova Mukuru u zuvira ozongumbiro zovakarere ve. Norusuvero eye u tja: “Tji mamu ku ku Ami namu kumbu ku Ami, Ami me mu zuvire.”—Jeremia 29:12.
MUKURU U VANGA KUTJA U KUMBE KU YE.
‘Panḓera pokukumba.’—Ovaroma 12:12.
Ombeibela i tu tunduuza kutja tu ‘kare pokukumba’ nu tu “ningire ku Ndjambi aruhe.” Tjiri, oukahu kutja Jehova Mukuru u vanga kutja tu kumbe ku ye.—Mateus 26:41; Ovaefese 6:18.
Ongwaye Mukuru tje vanga kutja tu kumbe ku ye? Otjotjihorera, omurumendu omukwate u kara nondjoroka indu omuatje we tji ma ningire ombatero ku ye. Otjingaperi kutja, ihe mape ya a tjiwa rukuru kutja omuatje we ma hepa tjike poo u noumune uṋe. Posi yokutja, indu tja tjiwa kutja omuatje we ma hepa ombatero okuza ku ye, tji mu raisira kutja omuatje we u nongamburiro mu ye nu ve noupanga ouwa. Momuano otjingewo, indu tji matu kumbu ku Jehova Mukuru tu raisa kutja tu nongamburiro mu ye. Nu tu vanga okukara noupanga wopopezu kuna ye.—Omiano 15:8; Jakobus 4:8.
MUKURU TJIRI U RIKENDERA OVE.
“Omerikendero weṋu aehe yumbeye kombanda Ye, Eye tjinga e mu pa imbi mbi mwa hepa.”—1 Petrus 5:7.
Mukuru u vanga kutja tu kumbe ku ye, mena rokutja we tu suvera nu u rikendera kweṱe. Eye u tjiwa omauzeu wetu nozongendo zetu, nu u vanga okutuvatera.
Ombara David aa ningire ombatero ku Jehova Mukuru mongumbiro nu ee mu raere omeripura noumune we. (Epsalme 23:1-6) Hapo Mukuru wa ri noumune uṋe ohunga na David? Eye wa suvere David nu aa puratene kozongumbiro ze. (Oviungura 13:22) Momuano otjingewo, Mukuru u puratena kozongumbiro zetu mena rokutja u rikendera kweṱe.
“AMI MBA SUVERA MUHONA, ORONDU EYE U ZUVIRA OZONGUMBIRO”
Ingo omambo womutjange wEpsalme umwe mOmbeibela. Eye wa ri nongamburiro kutja Mukuru u zuvira ozongumbiro ze, nu iho tje mu vatera nomasa. Tje mu vatera kutja ma tumbuke popezu na Mukuru, nokumuna omasa okutjinda oruhoze nomauzeu mehupo.—Epsalme 116:1-9.
Indu tji tu nongamburiro kutja Mukuru u zuvira ozongumbiro zetu, tji tjita kutja tu kayende komurungu okukumba ku ye. Tara kotjihorera tjomurumendu omukambure wena Pedro, ngwa tura komanene wa Spain. Eye wa zepaisa omuzandona we wozombura 19 moumba wotjihauto. Mena romuhihamwatima we, Pedro wa kumba ku Mukuru okumuraera ongaro me ri. Nu wa kayenda komurungu okutjita nao kutja ma mune omahuhumiṋino nombatero ndjaa hepa. Pa tjitwa tjike? Pedro wa tja: “Jehova we ndji huhumiṋa nomukazendu wandje okupitira movakambure ovakwetu.”
Potuingi ozongumbiro zetu ze zirwa okupitira momahuhumiṋino nombatero ndji matu munu okuza komapanga nge rikerendera kweṱe
Nandarire kutja okukumba ka ku kotorere omuatje we, okutjita nao kwa vatera Pedro neṱunḓu re momiano ominanḓengu tjinene. Omukazendu we wena María Carmen, wa tja: “Okukumba kwe ndji vatera kutja mbi tuurunge omuhihamwatima wandje. Ami ee tjiwa kutja Jehova Mukuru aa puratene kwami, mena rokutja tji mba za nokukumba mba ri nohange momuinyo.”
Ombeibela novihorera vyovandu pekepeke vi raisa oukahu kutja Mukuru u zuvira ozongumbiro. Posi yokutja, otjingaperi kutja Mukuru ka zuvire ozongumbiro azehe. Ongwaye Mukuru tje zuvira ozongumbiro tjiva uriri?
^ par. 5 Jehova ena ra Mukuru.—Epsalme 83:19, EEP.
