EHONGWA 32
Ouhona wa Mukuru u honapara
Ouhona wa Mukuru wa uta okuhonapara meyuru okuza mombura ndji 1914. Nu wina omayuva omasenina wovandu okuhonapara otji ya uta. Matu tjiwa vi? Matu tara ku imbi Ombeibela mbya hunganeka, noviṋa mbi tjitwa mouye, nomuano ovandu mu ve ritjinda okuza mombura ndji 1914.
1. Ovikwaye Ombeibela mbya hunganeka?
Embo ra Daniel ra raisa kutja Ouhona wa Mukuru mau utu okuhonapara komaandero “wozombura hambombari.” (Daniel 4:16, 17) Ozombura ozengi kombunda yanao, Jesus wa hungirira koruveze ndwo otja ‘omayuva womihoko,’ nu wa honga kutja ozombura nḓo ngunda kaze ya yanda. (Lukas 21:24) Otja tji matu kamuna, ozombura hambombari nḓo za yanda mombura ndji 1914.
2. Okuza mombura ndji 1914, ovikwaye mbi tjitwa mouye nu omomuano uṋe ovandu mu ve ritjinda?
Ovahongewa va Jesus ve mu pura nave tja: “Otjiraisiro tjomeero woye notjomaandero wouye mbwi ma rire tjiṋe?” (Mateus 24:3) Jesus we ve raera oviṋa ovingi mbi mavi tjitwa kombunda yaindu tja utu okuhonapara meyuru otjOmbara yOuhona wa Mukuru. Oviṋa tjiva mbi, vi kamburira mo ovita, ondjara nomanyinganyingiro wehi. (Lesa Mateus 24:7.) Ombeibela wina ya hunganeka kutja ozongaro zovandu “momayuva omasenina” maze tjiti kutja ehupo ri rire ‘ezeu.’ (2 Timoteus 3:1-5) Oviṋa mbyo tjinene aatu vi munu okuza mombura ndji 1914.
3. Ongwaye ozongaro mouye tji za ririra ko ozombi indu Ouhona wa Mukuru tji wa uta okuhonapara?
Katjisupi Jesus tja za nokurira Ombara yOuhona wa Mukuru, eye wa rwa ku na Satan nozondemone ze meyuru. Satan wa pandjara ovita mbyo. Ombeibela i tja eye wa “nakaurirwa kombanda yehi puna ovaengeli” ve. (Omavandururiro 12:9, 10, 12) Satan u nomazenge tjinene mena rokutja ma tjiwa kutja me ye ku nyonwa. Ku nao, eye ongu eta omauzeu nomihihamo kombanda yehi. Ku nao, katjikumise kutja ongwaye ozongaro mouye tji ze ri ozombi tjinene. Ouhona wa Mukuru mau yekuisa po omazeu ayehe ngo.
KONḒONONA OUKOTO
Konḓonona kutja omomuano uṋe mu matu tjiwa kutja Ouhona wa uta okuhonapara mombura ndji 1914, nokutja ihi matji sokutuṱuna vi.
4. Otja komarekeneno, Ouhona wa Mukuru wa uta okuhonapara mombura ndji 1914
Mukuru wa tjita kutja Ombara Nebukadnesar ya Babilon otjikuru ma rote oviṋa mbi mavi katjitwa moruyaveze. Oruroto ndwo nomakahururiro Daniel nga yandja, ye raisa kutja oruroto ndwo ru hungira ohunga nouhonapare wa Nebukadnesar, nOuhona wa Mukuru wina.—Lesa Daniel 4:17. a
Lesa Daniel 4:20-26, nu okuzambo u ungurise okawongo okuzira omapuriro ngu maye kongorere mba:
-
(A) Ovikwaye Nebukadnesar mbya muna moruroto rwe?—Tara kezeva 20 no 21.
-
(B) Ovikwaye mbi mavi tjitwa komuti?—Tara kezeva 23.
-
(C) Ovikwaye mbi mavi tjitwa kombunda ‘yozombura hambombari’?—Tara kezeva 26.
Oruroto ohunga nomuti ru na tjike nOuhona wa Mukuru?
OMAPROFETERO (Daniel 4:20-36)
Ouhonapare
(A) Omuti omure tjinene
Ouhonapare mbwa teka
(B) “Kee omuti,” nu nga pe kapite ‘ozombura hambombari’
Ouhonapare mbwa utu okuhonapara rukwao
(C) “Ove mo rire ombara rukwao”
Momayenenisiro omatenga . . .
-
(D) Omuti aau kuramene po uṋe?—Tara kezeva 22.
-
(E) Oruṋe tja isa okuhonapara? —Lesa Daniel 4:29-33.
-
(F) Ovikwaye mbya tjitwa ku Nebukadnesar komaandero “wozombura hambombari”? —Lesa Daniel 4:34-36.
OMAYENENISIRO OMATENGA
Ouhonapare
(D) Nebukadnesar Ombara ya Babilon
Ouhonapare mbwa teka
(E) Kombunda yombura ndji 606 K.O.Z., Nebukadnesar wa pandjara ozondunge nu kaa yenene okuhonapara oure wozombura hambombari
Ouhonapare mbwa utu okuhonapara rukwao
(F) Nebukadnesar wa kotora ozondunge na utu okuhonapara rukwao
Momayenenisiro oyetjavari . . .
-
(G) Omuti aau kuramene po oouṋe? —Lesa 1 Ekuruhungi 29:23.
-
(H) Oruṋe tji va isa okuhonapara? Matu tjiwa vi kutja owo kaave honapara indu Jesus tja ri kombanda yehi? —Lesa Lukas 21:24.
-
(I) Ouhonapare mbwi wa uta okuhonapara pi, nu oruṋe?
OMAYENENISIRO OYETJAVARI
Ouhonapare
(G) Ozombara za Israel nḓe kuramena po ouhonapare wa Mukuru
Ouhonapare mbwa teka
(H) Omayandekero wa Jerusalem ya tjita kutja ape ha kara ozombara zOvaisrael oure wozombura 2 520
Ouhonapare mbwa utu okuhonapara rukwao
(I) Jesus ma utu okuhonapara meyuru otjOmbara yOuhona wa Mukuru
Ozombura hambombari ze noure mbu ṱa pi?
Otupa tjiva twOmbeibela tu tu vatera okuzuva nawa otupa twarwe. Otjotjihorera, membo rOmavandururiro ozombura ndatu nohinga ze kuramena po omayuva 1 260. (Omavandururiro 12:6, 14) Ihi matji hee kutja ombura imwe momaprofetero wOmbeibela i ṱeki pomayuva 360. Ku nao, ‘ozombura hambombari’ ze ṱeki pomayuva 2 520. MOmbeibela povikando tjiva embo ndi eyuva ri kuramena po ombura. (Numeri 14:34) Ku nao, ozombura hambombari nda tamunwa membo ra Daniel ze kuramena po ozombura 2 520.
5. Oviṋa mouye vya runduruka okuza mombura ndji 1914
Jesus wa hunganeka kutja oviṋa mouye mavi sana pi indu tja zu nokurira Ombara. Lesa Lukas 21:9-11, nu okuzambo hungirira kepuriro ndi:
-
Ozongaro zeṋe mu inḓo nḓu wa muna poo nḓu wa zuva?
Omuapostele Paulus wa kahurura kutja ovandu mave kara vi momayuva omasenina wouhonapare wovandu. Lesa 2 Timoteus 3:1-5, nu okuzambo hungirira kepuriro ndi:
-
Hapo wa rora okumuna ovandu amave ritjindi nao?
6. Omananeno wOuhona wa Mukuru maye sokutuyanḓiparisa
Lesa Mateus 24:3, 14, nu okuzambo hungirira komapuriro nga:
-
Otjiungura tjiṋe otjinanḓengu tji tji raisa kutja Ouhona wa Mukuru nai u honapara?
-
Mo yenene vi okukara norupa motjiungura hi?
Ouhona wa Mukuru nai u honapara meyuru nu moruyaveze rwopopezu mau yekuhonaparera po ehi. Lesa Ovaheberi 10:24, 25, nu okuzambo hungirira kepuriro ndi:
-
Auhe wetu ma sokutjita vi otja ‘tji ma munu kutja Eyuva raMuhona ri ri pokuya’?
Indu tji wa tjiwa otjiṋa tji matji yenene okuvatera nokuyama omiinyo vyavarwe, ove otjo tjita vi?
OMUNDU MAPE YA A PURA KUTJA: “Ongwaye Ovahongonone va Jehova tji ve tja 1914 ombura onanḓengu tjinene?”
-
Ove otjo zira vi?
OKUYARUKIRA PO OUSUPI
Omaprofetero novivarero vyOmbeibela nozongaro mouye, vi raisa kutja Ouhona wa Mukuru nai u honapara. Eṱe tu raisa kutja tu kambura moviṋa mbi mokuzuvarisa ohunga na vyo nokukara pozombongarero zombongo.
Okurizemburukisa
-
Pa tjitwa tjike komaandero wozombura hambombari nḓa hunganekwa membo ra Daniel?
-
Ongwaye tji u kambura kutja Ouhona wa Mukuru wa uta okuhonapara mombura ndji 1914?
-
Mo raisa vi kutja u kambura kutja Ouhona nai u honapara?
RIHONGA OVINGI
Rihonga imbi ovatjange vomakuruhungi mbi va hungira ohunga nomarundurukiro nga tjitwa mouye okuza mombura ndji 1914.
“Ongaro yomeritjindiro ya ririra ko ombi” (Penduka!, April 2007)
Lesa omuano omaprofetero nge ri mu Mateus 24:14 mu ya ṱuna kehupo romurumendu umwe.
“Ami mba suverere okunyanda o-Baseball” (Oruhungu No. 3 2017)
Matu tjiwa vi kutja omaprofetero nge ri mu Daniel ekondwa 4 ye hungirira kOuhona wa Mukuru?
“Oruṋe Ouhona wa Mukuru tji wa uta okuhonapara? (Orupa 1)” (Oruhungu, 1 ku Oktoba, 2014)
Ovikwaye mbi raisa kutja ‘ozombura hambombari’ nḓa tamunwa mu Daniel ekondwa 4 za yanda mombura ndji 1914?
“Oruṋe Ouhona wa Mukuru tji wa uta okuhonapara? (Orupa 2)” (Oruhungu, 1 ku Novemba, 2014)
a Tara kotupa tuvari otusenina mehongwa ndi, tu tu ri kehi yorupa ndwi Rihonga ovingi.
Mo yenene okutara ku imbi wina
OMAPURIRO NGE PURWA i yovandu OVENGI
Ovahongonone va Jehova ve yandja omerihongero wOmbeibela momuano uṋe?
Ove mo yenene okuungurisa Ombeibela ngamwa aihe indu tji mo rihongo Ombeibela otjari pu nOvahongonone va Jehova. Mo yenene okuṋanga eṱunḓu roye arihe poo omapanga woye okukara pomerihongero woye wOmbeibela.
