Omahongero wOmbeibela nge yandjwa pEtuwo retu rOmerikotameneno tjinene ye tjama nOuhona waMukuru, Jesus wina mbwaa zuvarisa.​—Lukas 8:1.

Omatuwo nga ootuveze twetu twomerikotameneno uatjiri. Omazuvarisiro wombuze ombwa yOuhona ye hongorerwa okuza pEtuwo rwOmerikotameneno. (Mateus 24:14) Omatuwo nga ya haṋika mounene na mombuniko, posi yokutja aehe ya ungurwa ouhirona nu kamu tuwa ovihareke ovingi mbi he ri ohepero. Pomatuwo omengi nga pe hitira ozombongo zokombanda yaimwe. Ozombura nḓa zu ko, eṱe twa tunga Omatuwo wOmerikotameneno omayovi omengi (ape omatuwo yetano meyuva) kokutja tu yenene okukara noruveze pu mape woronganene ozombongo otja tji maze kurire ko. Ihi tji yenenisiwa vi?​—Mateus 19:26.

Ozo ze tungwa novimariva vyouharupu mbi za korutavi rwomberoo. Oviyandjewa mbi, vi hindwa korutavi rwomberoo kokutja vi yazemisiwe kozombongo okutunga poo okuṱuna na vyo Omatuwo wOmerikotameneno.

Owo ye tungwa i ovandu mbe riyandja oveni, nu mbe kurira mozongaro zehupo nḓa panguka, nu kave sutwa. Momahi omengi muna Ovimbumba vyOvatunge vOmatuwo wOmerikotameneno. Ovimbumba vyovatunge mbi, vi ryanga okuza kombongo imwe nga ku yarwe mehi mu ve ri ndo, na kotukondwa twokokure, okuhongorera otjiungura atjihe tjokutunga nu ve honga Ovahongonone mbe kara mehi ndo okutunga. Ovarumendu ovakambure mbe nondjiviro ombwa yokutunga ve hongorera otjiungura hi motupa mu va toororwa okuungura, nu ovarumendu mbe nondjiviro wina ve riyandjera okuungura. Pomatungiro aehe, ouṋepo wombongo ndjo u ya motjivaro otjingi okuvatera okutunga. Ombepo yaJehova nombatero yovandu mbe riyandja nomitima avihe mba, ombi tjita kutja oviungura mbi vi rire ondoṋeno.​—Epsalme 127:1; Ovakolose 3:23.

• Ongwaye otuveze twetu twomerikotameneno tji tu isanewa Etuwo rOuhona?

• Pe ya vi kutja tu tunge Omatuwo wOmerikotameneno mouye auhe?