‘Ndjambi ma pyoṋa omahoze aehe momeho wawo. Nonḓiro kai tji nakukara po rukwao; noruhoze nomaririro, ­nomuhihamo kavi tji nakukara po rukwao.’—Omavandururiro 21:3, 4.

Mai ku vatere okutjiwa kutja Mukuru kangu eta omauzeu ngu tu muna.—Jakobus 1:13.

Okutjiwa kutja Mukuru u tu ṱira ondjenda tji matu munu ouzeu, otjiṋa otjihuhumiṋe.—Sakarja 2:8.

Mai ku pe omaundjiro wokutja okumuna ouzeu maku yanda.—Epsalme 37:9-11.

Ii tjinene, mena romapu yevari nga:

• Mukuru wa tonda omauzeu nouhasemba mbu tu muna. Tara komuano Jehova mbwa hihamwa indu otjiwaṋa tje ­tjaatji tatumisiwa rukuru. Ombeibela mai tja, eye we ve ṱira ondjenda “mena rondjemeno yawo koveveta­tumise na koveveṋiṋikize.”—Ovapangure 2:18.

  Mukuru wa tonda ovandu mbe tatumisa ovakwao. Okutara kotjihorera, Ombeibela mai tja, eye wa tonda “omake nge zepa ovandu ovehinandjo.”—Omiano 6:16, 17.

• Mukuru u rikenda na eṱe kourike wetu. Jehova u tu tunduuza kutja tu yumbe omerikendero wetu ayehe kombanda ye ‘eye tjinga e tu pa imbi mbi twa hepa.’—1 Petrus 5:7.

  Okupitira mOuhona we, moruyaveze rwopopezu Jehova ma kaisa po omauzeu wovandu avehe. (Mateus 6:9, 10) Ngunda amatu undju oruveze ndwo, eye u huhumiṋa imba mbe nonḓero yatjiri mu ye.—Oviungura 17:27; 2 Ovakorinte 1:3, 4.