Ombeibela potuingi i tja Jesus “Omuna waNdjambi.” (Johanes 1:49) Omambo nga “Omuna waNdjambi” ye raisa kutja Mukuru Omuute poo Oruharwi rwomuinyo, mu mamu kamburire mo omuinyo wa Jesus. (Epsalme 36:9; Omavandururiro 4:11) Ombeibela kai hongo kutja Mukuru wa rira ihe yomuatje momuano tjingewo mbwi ovandu mbu ve panduka ovanatje.

 Ombeibela wina i tja ovaengeli ‘ovanatje ovazandu vaNdjambi.’ (Genesis 6:2) Ombeibela i tja omundu omutenga Adam wa ri omuzandu ‘waNdjambi.’ (Lukas 3:38) Mena rokutja Jesus ongwa ri otjiutwa otjitenga tja Mukuru nu eye erike ongwa memwa i Mukuru omuini, Ombeibela opu i zokutja Jesus Omuna omukwatwaerike wa Mukuru.

•  Hapo Jesus wa ri keyuru ngunda e hi ya kwatwa otjomundu kombanda yehi?

•  Ovikeṋa Jesus mbya tjiti ngunda e hi ye ya kombanda yehi?

 Otjiperi. Jesus wa ri otjiutwa tjombepo meyuru ngunda e hi ye ya okukwatwa otjomundu kombanda yehi. Jesus omuini wa tja we ya “okuza keyuru.”—Johanes 6:38; 8:23.

 Mukuru wa mema Jesus ngunda e hi ya mema oviṋa avihe. Ombeibela i tja nai ohunga na Jesus:

•   “Eye Omuna omukwatwaerike, ngwa ri po komeho yoviutwa avihe.”—Ovakolose 1:15.

•   “Mu Ye omu mu za avihe Ndjambi mbya uta.”—Omavandururiro 3:14.

 Jesus wa yenenisa omaprofetero nge tja: ‘Omuze womuhoko we mau yaruka nga koruveze orukuru.’—Mika 5:2; Mateus 2:4-6.

 Eye wa ri nouvara wokombanda meyuru. Jesus eye aa hungirire kouvara mbwi indu tja kumba kutja: “Tate, Ndji pa ondjozikiro . . . indji ondjozikiro ndji mba ri na yo pOve, ouye ngunda au hiya utwa.”—Johanes 17:5.

 Eye wa vatera Ihe okumema oviṋa avihe vyarwe. Jesus wa ri posi ya Mukuru “otja omuungure onongo.” (Omiano 8:30) Ombeibela i tja nai ohunga na Jesus: “Mu Ye Ndjambi oma uta oviṋa avihe, mbi ri meyuru na mbi ri kombanda yehi.”—Ovakolose 1:16.

 Mukuru wa ungura oviṋa avihe okupitira mu Jesus. Oviutwa mbi vi kamburira mo oviutwa avihe vyombepo na wina evaverwa arihe. (Omavandururiro 5:11) Momuano warwe, omaunguriro wakumwe pokati ka Mukuru na Jesus ya ri tjimuna nga womunane wozoplana nomutunge. Omunane wozoplana u perenda nu omutunge u ungurisa otjiperendero hi okutungira ko ondjuwo.

 Eye wa ri Embo. Indu tji mai hungire ohunga na Jesus tja ri meyuru, Ombeibela i tja Jesus “Embo.” (Johanes 1:1) Ihi matji hee kutja Mukuru wa ungurisa Omuna we okuyandja ondjivisiro nomaronga koviutwa vyarwe vyombepo.

 Wina pe munika aayo Jesus wa ri omuhungirire po wa Mukuru kovandu kombanda yehi. Mukuru mape ya aa hungirire okupitira mu Jesus otjEmbo indu tja yandja omaronga ku Adam na Eva motjikunino tja Eden. (Genesis 2:16, 17) Jesus mape ya ongwa ri omuengeli ngwa hongorere po Ovaisrael mokuti onguza nu ra ri eraka re Ovaisrael ndaave sokupuratena ko.—Eksodus 23:20-23. a