Hapo me sokukumba ku imba mbe varwa otja ovayapuke?
Eziriro okuza mOmbeibela
Kako. Ombeibela i raisa kutja tu sokukumba ku Mukuru erike mena ra Jesus. Jesus wa raera ovahongewa ve kutja: “Nopu mwa sokukumba nai: Tate yetu ngu u ri momayuru: Ena roye ngari yapurwe.” (Mateus 6:9) Eye kena pa raera ovahongewa ve okukumba ku imba mbe varwa otja ovayapuke, ovaengeli poo komundu ngamwa pendje na Mukuru.
Jesus wina wa raera ovemukongorere kutja: “OwAmi ondjira nouatjiri. kape nomundu ngu ma i ku Tate nokuhinaami.” (Johanes 14:6) Jesus erike ongwa pewa ousemba i Mukuru okutuyarikaṋena kuye.—Ovaheberi 7:25.
Hapo tjike indu tji me kumbu ku Mukuru na ku imba mbe varwa otjovayapuke?
Jesus wa tja nai indu tjaa rorwa i Satan: “Rikotamena ku Muhona Ndjambi woye, nu u karere Ye erike!” Mukuru u vanga kutja ovandu ve rikotamene nokukumba ku ye erike.—Jesaja 48:11.
Tu hihamisa Mukuru indu tji matu kumbu komundu warwe poo ku imba mbe varwa otja ovayapuke novaengeli ovayapuke. Indu omuapostele Johanes tja kondja okurikotamena komuengeli, eye we mu tjaera na tja: “Ngoo roro, o tjiti nao! Owami omukarere omukweṋu nowovakriste ovakweṋu mbe panḓera pomahongononeno Jesus nga zuvarisa. Rikotamena ku Ndjambi.”—Omavandururiro 19:10.