Emu natudia ese Dirava idia lalokau henia diba, bema idia diba Dirava ia noho momokani bona ia ese ia lalokau henidia. Dirava idia lalokau henia totona, ia idia diba be namo. (1 Ioane 4:8) Hegeregere, namona be do idia diba: Dahaka dainai Dirava ese taunimanima ia havaraia? Dahaka dainai Dirava ese hisihisi ia koua lasi? Vaira negai Dirava be taunimanima totona dahaka do ia karaia?—Filipi 1:9 duahia.

Emu natudia ese Dirava idia lalokau henia totona, namona be idia dekenai oi hahedinaraia Dirava oi lalokau henia. Unai idia itaia neganai, idia ese emu haheitalai do idia tohotohoa.—Deuteronomi 6:5-7; Aonega Herevadia 22:6 duahia.

Dirava ena Hereva be mai ena siahu. (Heberu 4:12) Unai dainai emu natudia oi durua Baibel ena hereva badadia idia dibaia. Iesu be taunimanima edia kudouna ia hamarerea totona henanadai ia henia, ia kamonai, bona siri edia anina ia herevalaia. Emu natudia edia kudouna oi hamarerea totona, Iesu ena hadibaia dalana oi tohotohoa diba.—Luka 24:15-19, 27, 32 duahia.

Danu, Baibel lalonai Dirava ese taunimanima ia kara henia daladia edia sivarai ese natudia do ia durua Dirava idia dibaia bona lalokau henia. Unai bamona pablikeisen ma haida be www.pr418.com ai idia noho.—2 Timoteo 3:16 duahia.