TAUNIMANIMA IDIA URA MA TA ESE IDIA IA LALOKAU HENIA. Headava, famili, o hetura karana ia goada diba lasi bema lalokau be lasi. Unai dainai lalokau be mai anina bada iseda helt bona moale davaria dalana dekenai. To, “lalokau” ena anina be dahaka?

Unai lalokau be tau bona hahine ese idia hahedinaraia lalokauna lasi, to unai lalokau danu be mai anina bada. Unai lalokau be ia idau lalokau ma haida amo badina unai ese ta ia durua ma haida edia namo ia tahua guna totona. Unai lalokau be Dirava amo ia mai hakaua hereva ese ia biagua dainai hebogahisi bona hemami ia hahedinaraia.

Baibel ese lalokau be inai bamona ia herevalaia: “Lalokau be ia boga-auka, bona ia hebogahisi. Lalokau be ia mama lasi, ia heagi lasi, bona ia hekokoroku lasi. Lalokau be dala kererena ai ia kara lasi, ia be sibona ena namo ia tahua lasi, bona ia badu haraga lasi. Bona ia be ta ena kerere ia laloatao noho lasi lalokau be kara maoromaoro lasi karana ia moalelaia lasi, to hereva momokani ia moalelaia. Lalokau be gau ibounai dekenai ia gini goada, . . . gau ibounai lalonai ia be mai ena helaro, bona gau ibounai ia haheaukalaia. Lalokau be ia ore diba lasi.”​—⁠1 Korinto 13:4-8.

Unai bamona lalokau be “ia ore diba lasi” to do ia noho hanaihanai. Oibe, unai lalokau ia goada noho diba. Badina ia haheauka, hebogahisi, bona dika ia gwauatao, unai be “taunimanima ia hatamonaia gauna hereadaena.” (Kolose 3:14). Unai bamona lalokau ese hetura karana ia hatamonaia, herevana ta ta be mai edia kerere to do idia noho namo bona moale diba. Hegeregere, headava taudia mani oi laloa.

Iesu Keriso ese headava taudia totona mai anina bada hakaua herevadia ia hadibaia. Hegeregere ia gwau: “tau ese ena tamana bona sinana do ia rakatania bona ena hahine danu do ia hakapua, bona idia ruaosi be tauanina tamona ai do idia lao’ . . . Dirava ese ia hakapua taudia, be ta ese do ia hapararaia lasi be namo.” (Mataio 19:5, 6) Mai anina bada hakaua herevadia rua ia hahedinaraia.

“IDIA RUAOSI BE TAUANINA TAMONA AI DO IDIA LAO.” Headava lalonai, tau bona hahine be tura namodia, bona lalokau ese unai headava ia gimaia diba, unai amo do idia heudahanai lasi​—⁠headava tau (o headava hahine) ia heudahanai anina be, ia ese ma ta be “tauanina tamona” ai idia halaoa, to unai be iena adavana lasi. (1 Korinto 6:16; Heberu 13:4) Heudahanai ese badinaia (o trust) heheni karana bona headava ia hadikaia diba. Unai kara dainai, headava taudia edia natudia idia lalohisihisi, idia gari, idia badu, bona idia laloa ta be idia ia lalokau henia lasi.

“DIRAVA ESE IA HAKAPUA TAUDIA.” Headava danu be helaga. Unai hereva idia abia dae headava taudia be idia gaukara goada edia headava ia goada totona. Hekwakwanai idia vara neganai, idia ura lasi edia headava idia hadikaia. Edia lalokau be ia goada bona idia haheauka. Oibe, edia lalokau be “gau ibounai dekenai ia gini goada” dainai, hekwakwanai negadiai, idia gaukara goada edia headava lalonai lalotamona bona maino ia noho totona.

Bema tama sina huanai sibodia edia ura dadaraia lalokauna ia noho, ruma bese lalonai edia natudia do ia durua bada. Mauri lagani 20 hahine ta, ladana Jessica, ia gwau: “Egu tamana bona sinana be mai momokani ida ta ta idia lalokau heheni bona matauraia. Lau itaia egu sinana be egu tamana ese ia karaia disisen ia matauraia neganai, unai ese lau ia durua ena kara lau tohotohoa totona.”

Lalokau be Dirava ena kara badana. Badina Baibel ia gwau: “Dirava be lalokau.” (1 Ioane 4:8) Danu, ita hoa lasi badina Baibel ese ia hahedinaraia Iehova be “moale Diravana.” (1 Timoteo 1:11) Ita danu ita moale diba bema ita hekwarahi iseda Havaraia Tauna ena kara badadia ita tohotohoa​—⁠hegeregere iena lalokau karana unai. Efeso 5:1, 2 ia gwau: “Dirava umui tohotohoa, badina umui be iena lalokau natudia. Bona lalokau ai do umui raka noho.”