BEMA oi be lagani haida gunanai Indonesia ena motumotu maragina, Sangir Besar dekenai oi lao, reana iseda Keristani taihu toi be kone dekenai oi itaia. Momo be iseda taihu idia diba, badina edia haroro gaukara ai taunimanima idia durua Baibel idia lalopararalaia totona. To hora haida lalonai, iseda taihu be gaukara idauna idia karaia.

Idia be davara dekenai idia lao, nadi badadia idia gogoa bona kone dekenai abia lao. Nadi haida edia bada be soka bolo bamona. Unai taihu be helai gauna maragina latanai idia helai bona hama amo unai nadi idia makohia maragimaragi. Unai murinai, plastik baketi lalonai idia udaia bona vadavada amo edia noho gabuna dekenai idia huaia daekau. Bena baege badadia lalonai idia udaia bona motuka amo idia abia lao dala idia hanamoa gaukarana totona.

Unai taihu ta ladana be Hulda. Iena goada be hegeregere dainai, hora ma haida lalonai unai gaukara ia karaia. Bona unai gaukara amo ia abia pei be ena famili ia durua dina ta ta ena dabu gaudia ia hoia totona. To, hari ia ura ena moni haida ia haboua ena tablet ta do ia hoia totona, unai amo JW Library^® app ia gaukaralaia diba. Hulda ia diba unai app ai do ia itaia vidio bona gau ma haida ese ia do idia durua Baibel ia lalopararalaia bona ena haroro gaukara ia hanamoa.

Wiki 6 lalonai, Hulda be daba ibounai ma hora rua ia gaukara, unai amo nadi momo do ia makohia bona motuka maragina ta ia hahonua diba. Hari, ena moni be hegeregere ena tablet ta ia hoia totona.

Hulda ia gwau: “Ena be nadi lau makohia dainai egu tauanina ia hisihisi bona lau hesiku, to haroro gaukara ai unai tablet matamata lau gaukaralaia bona Keristani heboudia totona lau hegaegae neganai, unai hisihisi ibounai lau laloaboio.” Danu, ia gwau, pendemik lalonai tablet ese ia durua kongrigeisen hebou dekenai ia konek bona haroro gaukara ia karaia totona. Hulda ida ita moale badina iena tahua gauna ia hagugurua.