Dirava Ena Ladana be Daika? Dirava sibona ia gwau: “Lau sibona be [Iehova, NWT], egu ladana be unai.” (Isaia 42:8) Dirava ena ladana be Baibel lalonai nega 7,000 bamona ia hedinarai. To, Baibel momo ai inai ladana ena gabu ai dagi ladana, hegeregere “Lohiabada” idia hatoa. Dirava ia ura ena turana ai oi lao, unai dainai oi ia hagoadaia ‘iena ladana badana do oi gwauraia hedinarai.’—Salamo 105:1.

Iehova Ena Dagi Ladadia. Baibel be Iehova totona inai dagi ladadia ia gaukaralaia hegeregere “Dirava,” “Siahu Ibounai,” “Havaraia Tauna,” “Tamana,” “Lohiabada.” Baibel lalonai, taunimanima ese idia gwauraia guriguri momo ai, mai hemataurai ida Iehova ena dagi ladana ta bona ena ladana korikori, Iehova do idia gwauraia.—Daniela 9:4.

 Dirava Ena Toana. Dirava be lauma. (Ioane 4:24) Baibel ese ia hahedinaraia “tau ta ese . . . Dirava ia itaia lasi.” (Ioane 1:18) Baibel ese ena hemami ia hahedinaraia. Taunimanima ese ia idia hahisia diba, eiava idia “ia ura henidia” diba.​—Aonega Herevadia 11:20; Salamo 78:40, 41.

Dirava Ena Kara Badadia. Dirava be bese bona noho dala idauidau taudia edia toana ia laloa lasi. (Kara 10:34, 35) Danu, ia be ‘bogahisihisi bona hariharibada Diravana. Badu dekenai ia haraga lasi, to bogahisihisi bona lalokau dekenai ia be haraga.’ (Esodo 34:6, 7) To, Dirava ena kara badadia foa do oi moalelaia.

Siahu. Ia be “Siahu Ibounai Dirava” dainai, iena siahu ia gaukaralaia diba ia gwauhamatalaia gaudia ia hagugurua totona.—Genese 17:1.

Aonega. Dirava ena aonega ese taunimanima edia ia hanaia. Baibel ese ena anina be inai bamona ia herevalaia, ia tamona be “aonega Diravana.”​—Roma 16:27.

Hahemaoro Goeva. Dirava be hanaihanai kara maoromaoro ia karaia. Iena kara be “namo momokani,” bona ia “kara dika lasi.”​—Deuteronomi 32:4.

Lalokau. Baibel ia gwau “Dirava be lalokau.” (1 Ioane 4:8) Dirava be lalokau ia hahedinaraia sibona lasi, to ia be lalokau. Ia karaia gau ibounai be iena lalokau hereadaena dainai ia karaia, bona dala idauidau ai ita ia durua.

Dirava be Taunimanima Ia Tura Henia. Dirava be iseda lalokau guba Tamana. (Mataio 6:9) Bema ia ita abidadama henia, iena turana ai do ita lao. (Salamo 25:14, NWT) Unai dainai, Dirava ia ura guriguri amo ia kahirakahira do oi lao bona “emui lalohekwarahi ibounai be ia dekenai umui negea, badina ia be umui ia laloa bada.”​—1 Petero 5:7; Iamesi 4:8.

Iesu be Dirava Lasi. Iesu be idau, badina Dirava ese sibona ia havaraia tau ginigunana. Unai dainai Baibel ese ia gwauraia Dirava ena Natuna. (Ioane 1:14) Iehova ese Iesu ia havaraia murinai, ia be “gaukara karaia tauna bamona” ia gaukaralaia gau ibounai ia karaia.​—Aonega Herevadia 8:30, 31; Kolose 1:15, 16.

 Iesu be Nega Ta Ia Gwau Lasi Ia be Dirava. To, ia gwau: “Lau be ena gwaukau tauna bona Ia ese lau ia siaia.” (Ioane 7:29) Iena hahediba tauna ta ia hereva neganai, Iesu be Iehova ia gwauraia “egu Tamana bona emui Tamana” bona “egu Dirava bona emui Dirava.” (Ioane 20:17) Iesu ia mase murinai, Iehova ese ia hatorea isi lou bona guba dekenai ia lao, bona Iena idibana kahanai Iesu dekenai siahu ia henia.​—Mataio 28:18; Kara 2:32, 33.

Iesu Keriso ese Oi Ia Durua Diba Dirava Kahirakahira Oi Lao Totona

Iesu be tanobada ai ia mai ita dekenai iena Tamana ia hadibaia totona. Iehova sibona be Iesu totona inai bamona ia hereva: “Inai be egu Natuna, egu lalokau, iena hereva umui kamonai.” (Mareko 9:7) Iesu be Dirava ia diba namonamo. Ia gwau: “Ta ese Tamana ia diba lasi to Natuna sibona, bona Natuna ia ura tauna sibona dekenai ia do ia hahedinaraia.”​—Luka 10:22.

Iesu ese Dirava ena kara ia tohotohoa namonamo. Iesu be ena Tamana ena kara ia tohotohoa namonamo dainai, ia gwau: “Lau ia itaia tauna be Tamana danu ia itaia vadaeni.” (Ioane 14:9) Iesu ese iena Tamana ena lalokau karana ia hahedinaraia totona, iena hereva bona kara amo taunimanima be Dirava kahirakahira idia lao diba. Ia gwau: “Dala be lau, hereva momokani be lau bona mauri be lau. Tau ta be Tamana dekenai ia mai diba lasi, to lau sibona amo.” (Ioane 14:6) Danu ia gwau: “Tomadiho momokani taudia ese lauma ai bona momokani ai Tamana do idia tomadiho henia. Badina Tamana be unai bamona taudia ia tahua noho, ia idia tomadiho henia totona.” (Ioane 4:23) Mani inai oi laloa! Iehova be oi bamona taudia ia tahua noho, ia dibaia namonamo totona.