Dahaka Dainai Baibel Ita Lalopararalaia?
“Baibel be tomadiho momo ese idia dibaia bukana. To ia be idaunegai idia torea bukana dainai China taudia ese idia gaukaralaia diba lasi.”—LIN, CHINA.
“Lauegu Hindu tomadiho bukadia lau lalopararalaia diba lasi. Unai dainai Baibel be edena bamona lau lalopararalaia diba?”—AMIT, INDIA.
“Lau abia dae Baibel be buka gunana ta bona lau kamonai ia be idia hoihoilaia momo bukana. To ena kopi ta lau do itaia lasi.”—YUMIKO, JAPAN.
Tanobada ena kahana ibounai dekenai taunimanima momo ese Baibel idia laloa bada. To Baibel ai idia noho gaudia momo idia diba namonamo lasi. Unai be momokani badina Asia ai taunimanima milioni momo be Baibel idia diba namonamo lasi, bona Baibel idia hariharilaia momo tanodia ai taunimanima momo danu be unai bamona.
To reana do oi henanadaia, ‘Dahaka dainai Baibel lau lalopararalaia be namo?’ Unai buka helagana ena anina lalopararalaia karana ese oi do ia durua henunai idia noho gaudia oi badinaia totona:
Moale do oi davaria
Ruma bese hekwakwanai hanaia daladia
Lalohekwarahi oi haheaukalaia daladia
Taunimanima kara namo henia daladia
Moni gaukaralaia namonamo
Japan ai ia noho hahinena, Yoshiko, mani ita laloa. Ia ura Baibel ai idia noho gaudia ia dibaia bona dala ia karaia ia duahia totona. Dahaka namo ia davaria? Ia gwau: “Baibel ese lau ia durua mauri ena anina lau diba bona vaira nega lau laloa totona. Bona lau mamia egu mauri be mai anina.” Matamanai ita herevalaia tauna, Amit, ia ura Baibel ia tahua namonamo. Ia gwau: “Lau hoa, badina Baibel ai taunimanima do ia durua hereva namodia idia noho.”
Baibel ese taunimanima milioni momo edia mauri ia haidaua vadaeni. Oi sibona ese Baibel oi tahua namonamo bona oi do ia durua dalana oi itaia diba, ani?
