Hari, infomeisen idauidau be momo herea guna bamona lasi, infomeisen haida ese oi ia durua diba emu seifti bona helt naria totona. To infomeisen oi tahua neganai, inai gaudia dainai oi naria namonamo:

•   Nius kereredia

•   Ripoti koikoidia

•    Badina lasi sivaraidia

 Hegeregere, COVID-19 pendemik negana ai, United Nations secretary-general ia gwau taunimanima momo ese infomeisen kereredia idia halasia. Helt ena kahana dekenai sisiba hereva koikoi bona muramura koikoi idia herevalaia. TV, reidio bona intanet ai, sivarai koikoidia bona anina lasi sivaraidia momo idia halasia. Momo ese taunimanima bona orea idauidau dekenai inai heheni bona lalodika herevadia idia halasia.

 Oibe, infomeisen kereredia gwauraia karana be guna ia vara danu. To, Baibel ia gwau iseda nega ai, “kara dika taudia bona koikoi taudia ese edia kara dika do idia habadaia momokani, idia ese ma haida do idia hakaua kerere bona ma haida ese idia do idia hakaua kerere.” (2 Timoteo 3:1, 13) Bona ia auka lasi intanet ai nius koikoidia oi itaia o ma ta dekenai oi siaia haraga totona. Unai dainai iseda email, social media, bona fon amo ita abia nius momo be sivarai maorodia lasi.

 Edena dala ai, infomeisen kereredia bona anina lasi sivaraidia amo sibona oi gimaia diba? Inai Baibel ena hakaua herevadia ese oi idia durua diba.

•   Oi itaia o kamonai gaudia ibounai oi abia dae lasi

   Baibel ena hereva: “Diba bada lasi tauna ese hereva ibounai ia abia dae, to aonega tauna be do ia karaia gaudia ia laloa namonamo guna.”​—Aonega Herevadia 14:15.

   Bema ita naria namonamo lasi, intanet ai laulau mai ena toretore o vidio kwadogidia amo haida ese ita idia koia diba. Hegeregere, idia gwauraia meme be nega momo hevaseha totona idia gaukaralaia. Ta ena laulau bona vidio idia haidaua bona gau idauna idia hahedinaraia diba. Taunimanima ese ma haida edia vidio idia karaia diba bona unai vidio lalonai guna idia karaia o gwauraia lasi gaudia idia hahedinaraia.

   “Infomeisen kereredia idia stadilaia taudia momo idia itaia social media ai, nega momo laulau bona vidio kwadogidia ai hereva maorodia edia anina idia haidaua, hegeregere meme.”​—Axios Media.

   Sibona oi nanadaia: ‘Inai sivarai be momokani eiava ia be meme sibona, a?’

•   Sivarai ia mai gabuna bona ena hereva oi laloa

   Baibel ena hereva: “Namona be gau ibounai umui tahua namonamo.”​—1 Tesalonika 5:21.

   Sivarai ta oi abia dae o oi do siaia lasi neganai, oi tahua namonamo, bema unai be momokani. Edena dala ai?

   Namona be oi tahua namonamo bema unai nius ia mai gabuna o halasia tauna oi trast diba. Nius oreadia bona orea ma haida ese sivarai idia gwauraia dalana amo edia politikol lalohadai idia durua. Nius ta ai oi itaia gaudia be ma ta ida oi hahegeregerea. Nega haida, turadia ese edia email bona social media ai idia itaia gaudia dainai infomeisen kereredia idia siaia. Unai dainai nius oi abia dae haraga lasi, bema ia mai gabuna oi diba lasi.

   Namona be oi tahua unai sivarai be sivarai gunana lasi bona ia be momokani. Namona be sivarai ena deit bona hamomokania gaudia oi tahua. Bema infomeisen aukana be hereva haida sibona amo idia gwauraia eiava ripoti ta ese ita ia doria kara ta ita karaia totona, namona be ita naria namonamo.

   “Namona be ita abia infomeisen ita sekea be gau badana, imana ita huria karana be mai anina bada hegeregerena.”​—Sridhar Dharmapuri, Senior Food Safety and Nutrition Officer for the U.N.

   Sibona oi nanadaia: ‘Inai nius be ta ena lalohadai eiava sivarai ena kahana ta sibona ia gwauraia, a?’

•   Hereva momokani ese oi ia hakaua be namo, to sibona emu ura lasi.

   Baibel ena hereva: “Sibona ena lalohadai ia badinaia tauna be kavakava.”​—Aonega Herevadia 28:26.

   Nega momo bema infomeisen be iseda ura hegeregerena, unai ita abia dae sibona. Bona intanet kampani ese oi ura henia nius, bona intanet ai oi tahua gaudia amo idia diba, edena infomeisen be iseda social media dekenai do idia siaia. To nega haida ita ura kamonai gaudia be anina lasi.

   “Ena be taunimanima idia laloa namonamo diba, to edia ura, bona gari gaudia dainai nega momo sivarai ta idia kamonai neganai unai idia abia dae haraga.”​—Peter Ditto, social psychologist.

   Sibona oi nanadaia: ‘Inai infomeisen lau abia dae badina ia be lau ura kamonai herevana, a?’

•   Infomeisen kereredia gwauraia karana hadokoa

   Baibel ena hereva: “Namo lasi sivarai koikoi umui gwauraia loaloa.”​—Esodo 23:1.

   Laloatao, ma haida dekenai oi gwauraia infomeisen ese edia lalohadai bona kara ia haidaua diba. Bema oi laloa namonamo lasi bona infomeisen kererena be ma haida dekenai oi siaia, dika ia havaraia diba.

   “Ma haida dekenai infomeisen oi do siaia lasi neganai, gau badana be sibona oi nanadaia, ‘lau abia dae unai be sivarai momokanina bona ma haida dekenai do lau siaia, a?’ Bema taunimanima ibounai be unai bamona idia karaia, intanet ai sivarai kereredia be momo lasi.”​—Peter Adams, senior vice president of the News Literacy Project.

   Sibona oi nanadaia: ‘Inai infomeisen be ma haida dekenai lau siaia, badina lau diba inai be sivarai momokanina, a?’